މިއަހަރުގެ ޖެނުއަރީމަހު، ޤައުމީ ޔުނިވަރސިޓީގައި އައު ތިން ކޯހެއް ފެއްޓެވުމަށް ހަމަޖެހިފައިވާ ކަމަށް އެ ޔުނިވަރސިޓީން ހާމަކުރައްވައިފިއެވެ. އެ ޔުނިވަރސިޓީން ހާމަކުރެއްވި ގޮތުގައި އަލަށް ފަށްޓަވާ ތިން ކޯހަކީ ބެޗެލަރސް އޮފް ސައިންސާއި ބެޗެލަރ އޮފް އާރޓްސް އިންޓީރިއާ ޑިޒައިނިންގ އަދި ބެޗްލަރ ކޮމްޕިއުޓަރ ސައިންސްއެވެ.މީގެ ތެރެއިން ބެޗެލަރސް އޮފް ސައިންސް ކޯހަކީ ރާއްޖޭގައި މުޅިން އަލަށް ފަށްޓަވާ ކޯހެއްކަމަށް ޤައުމީ ޔުނިވަރސިޓީން ހާމަކުރައްވައެވެ. މި ކޯސްތަކުގެ ޝަރުޠުތަކުގެ ތެރޭގައި ޖީސީއޭ ލެވެލް އަދި އެޗްއެސްސީ އިމްތިޙާނުން ދެ މާއްދާއިން ފާސްވެފައިވުން ހިމެނެއެވެ.
ކޯސްތަކަށް ކުރިމަތިލުމުގެ ފުރުޞަތު މިމަހުގެ 19 ވަނަ ދުވަހާ ހަމައަށް ހުޅުވިފައި އޮންނާނެކަމަށް އެ ޔުނިވަރސިޓީން ހާމަކުރައްވައެވެ. ޤައުމީ ޔުނިވަރސިޓީގައި މިއަހަރު، އެކި ދާއިރާތަކުން 98 ކޯސް ހިންގަވާނެކަމަށް އެ ޔުނިވަރސިޓީން ވިދާޅުވެއެވެ. މިއަހަރުގެ ފުރަތަމަ ޓާރމްގެ ކިޔެވުން އެ ޔުނިވަރސިޓީގައި ފެށޭނީ މިމަހުގެ 29 ވަނަ ދުވަހުއެވެ.