ހުޅުމާލޭ ދެވަނަ ފިޔަވަހީގެ ދަށުން ތަރައްޤީކުރަން ހަމަޖެހިފައިވާ މުހިންމު މަސައްކަތްތަކެއްގެ ޑިޒައިން ހެދުން ތުރުކީވިލާތުގެ ކުންފުންޏަކާ ޙަވާލުކޮށްފިއެވެ.
މިއަދު ބޭއްވި ރަސްމިއްޔާތެއްގައި ތުރުކީގެ ތާމާޝް ޓާކިޝް އިންޖިނިއަރިންގ ކޮންސަލްޓިން އެންޑް ކޮންޓްރެކްޓިން ކޮމްޕެނީއާ ޙަވާލުކުރީ ހުޅުމާލޭ ދެވަނަ ފިޔަވަހީގެ ކަނެކްޓިންގ ބްރިޖުތަކާއި، ހާބަރާއި، ޓޫރިޒަމް އައިލެންޑް ފަދަ ސަރަޙައްދުތަކާއި، ޗެނަލިންގެ މަސައްކަތް ކުރާނެ ގޮތުގެ ޑިޒައިން މަސައްކަތެވެ. ތާމާޝް ޓާކިޝް އިންޖިނިއަރިންގ ކޮންސަލްޓިން އެންޑް ކޮންޓްރެކްޓިން ކޮމްޕެނީއާއި ހައުސިންގ ޑިވޮލޮޕްމެންޓް ކޯޕަރޭޝަނާ ދެމެދު މިއަދު ވަނީ މިކަމުގެ އެއްބަސްވުމުގައި ސޮއިކޮށްފައެވެ.
މިއެއްބަސްވުމުގެ ދަށުން މިމަޝްރޫޢުގެ ހުރިހާ މަސައްކަތެއް ހިންގާނީ ތާމާޝް ޓާކިޝް އިންޖިނިއަރިންގ ކޮންސަލްޓިން އެންޑް ކޮންޓްރެކްޓިން ކޮމްޕެނީންނެވެ.
މިއެއްބަސްވުމުގައި ސޮއިކުރުމުގެ ރަސްމިއްޔާތުގައި އެޗްޑީސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވީ ހުޅުމާލެ ދެވަނަ ފިޔަވަހީގެ ޢުމްރާނީ ތަރައްޤީގެ މަސައްކަތް ވަރަށް ބާރު ސްޕީޑެއްގައި ކުރިއަށް ގެންދިއުމަށް މަސައްކަތް ކުރަމުންދާކަމަށެވެ. އަދި މިއެއްބަސްވުމުގެ ދަށުން ކުރިއަށްގެންދާ މަސައްކަތަށް ގާތްގަނޑަކަށް 3 މިލިއަން ޑޮލަރު ޚަރަދުވާނޭކަމަށް ސައިމަން ވިދާޅުވިއެވެ.
"އުމްމީދު ކުރަނީ މިހާރު މި މަސައްކަތް ފަށައިގަތުމާއި އެކު މިއަހަރުގެ ތެރޭގައި މީގެ ޢަމަލީ މަސައްކަތް ބުރިޖްތަކާއި އެހެން ހުރިހާ މަސައްކަތްތައްވެސް ފަށައިގަނެވޭނެކަމުގެ ޔަޤީންކަން ލިބިގެންމިއައީ" އެޗްޑީސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވިއެވެ.
މިމަސައްކަތުގެ ޢަމަލީ މަސައްކަތް މިއަހަރުގެ 3 ވަނަ ކުއާޓަރގައި ފެށޭނެކަމަށް ލަފާކުރެވޭ ކަމަށް އެޗްޑީސީން މަޢުލޫމާތުދެއެވެ.