ހަތަރުފުރޮޅުލީ އުޅަނދުފަހަރު މާލޭގައި ޕާކުކުރުމުގައި ކުރިމަތިވެފައިވާ ޖާގައިގެ ދަތިކަމުގެ މައްސަލަ އަންނަ އަހަރުގެ އެޕްރީލް މަހުގެ ނިޔަލަށް ޙައްލުކުރެވޭނެ ކަމަށް ހައުސިންގް މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މީގެ އެތައް ޤަރުނެއް ކުރިން މާލޭގައި ގެދޮރަށާއި އެހެން ކަކަމަށް ބިން ކަނޑައެޅި މަގުތައް ކަނޑައަޅައިފައިވަނީ އެކި ބާވަތުގެ އެއްގަމު އުޅަނދުފަހަރަށް ފަހި ވިސްނުމެއްގައި ކަމަށް ޤަބުލުކުރެވޭކަށް ނެތެވެ. އެހެންނަމަވެސް މާލޭގައި މީހުން ގިނަވެ، ބިންހުސްވެ، ގޯތިގެދޮރާއި މަގުތަކުގައި މިވަނީ ކާރޫބާރު ބޮޑުވެފައެވެ. އަދި މާލޭގެ ޖާގައިގެ ނިސްބަތުން، އެއްގަމު އުޅަނދުފަހަރު މިވަނީ އާދަޔާ ޚިލާފަށް އިތުރުވެފައެވެ. މާލޭގެ ތޮއްޖެހުން ކުޑަކުރައްވައި ޢާންމު ރައްޔިތުންނަށް ރައްކާތެރި އަދި ފަސޭހަ މާޙައުލަކަށް ހެއްދެވުމަށް ތަފާތު މަޝްރޫޢުތަކެއް ސަރުކާރުން ގެންދަވަނީ ހިންގަވަމުންނެވެ. އޭގެތެރޭގައި ހުޅުމާލެ ތަރައްޤީ ކުރެއްވުމާއި ހުޅުލެއާއި މާލެއާ ދެމެދު ބްރިޖެއް އެޅުއްވުމާއި އިންޑަސްޓްރިއަލް ވިލެޖެއް ޤާއިމްކުރެއްވުމާއި މާލޭގެ މަގުތައް ރަނގަޅު ފެންވަރަކަށް ހެއްދެވުމާއި މާލޭގައި މައިޒާންތަކާއި ޕާކުތައް ހެއްދެވުމާއި ވެހިކަލް ޕާކުރެއްވުމުގެ ޚާއްޞަ އިންތިޒާމްތަކެއް ހަމަޖެއްސެވުމަށް ހިންގަވާ މަޝްރޫޢުތައް ހިމެނެއެވެ.
ރަސްމީ ތަފާސްހިސާބުތަކާ ޙަވާލާދެއްވައި ސަރުކާރުން ހާމަކުރައްވާ ގޮތުގައި މާލޭގައި 55،000 އަށްވުރެ ގިނަ ސައިކަލް ދުއްވަމުން ގެންދެއެވެ. އަދި 6،000 އަށްވުރެ ގިނަ ކާރު މާލޭގައި ދުއްވަމުންދެއެވެ. ދެހާހެއްހާ ޕިކަޕް ދުއްވަމުންދެއެވެ. މިއީ މާލޭގެ ޖާގައިގެ ނިސްބަތުން އާދަޔާޚިލާފު ގިނަ ޢަދަދެކެވެ.
ވެހިކަލްތައް މަގުމަތީގައި ބަހައްޓާފައި ހުންނަ ގޮތަށް ބަލާއިރު، ވެހިކަލް އެތެރެކުރަނީ ނުވަތަ އެކަމަށް ހުއްދަދެއްވަނީ މަގުމަތީގައި މިގޮތަށް ޕާކުރަންތޯ ސުވާލު އުފެދޭވަރަށް މަގުމަތީގައި ވެހިކަލް އެބަހުއްޓެވެ. މިގޮތަށް ނުދުއްވާ އެތައް ދުވަހެއްވީ ވެހިކަލްވެސް ހުރެއެވެ. އަދި ގެނެސް ބޭނުންކުރަން ނުފަށާ ވެހިކަލްވެސް ހުރެއެވެ.
ޓްރާސްޕޯޓް އޮތޯރޓީގެ ޤަވާޢިދުގައި ވާގޮތުން މާލެއަށް ހަތަރުފުރޮޅުލީ އުޅަދެއް އެތެރެކުރެވެނީ ޕާކުކުރާނެ ގަރާޖެއް ހުރެ، އެކަން ލިޔުމުން ހުށައަޅައިގެންނެވެ. އެކަމަކު މި ޤަވާޢިދު ތަންފީޒުކުރެވޭ ކަމާމެދު ސުވާލު އުފެއްދުމުގެ ފުރުޞަތު އެބައޮތެވެ. އަދި މިހާރު ހުރި ވެހިކަލް ޢަދަދަށް ބަލާއިރު ހަތަރުފުރޮޅުލީ ކޮންމެ ވެހިކަލަކަށް މާލެއިން ގަރާޖެއް ހަމަޖައްސާނެ ގޮތަކާމެދުވެސް ހަމަ ސުވާލު އުފެދެއެވެ.
"ކަމާގުޅޭ އިދާރާތަކުން ގަރާޖުނެތް ވެހިކަލްތައް ބަލައި އެ ވެހިކަލްތައް މަގުމަތީގައި ޕާކުކުރާނެ ޒޯންތަކެއް ކަނޑައަޅާނެ، މި މަސައްކަތް ކުރިއަށް އޮތް ދެ ތިންމަހެންހާ ދުވަހުގެ ތެރޭގައި ނިންމައި 2017 ވަނަ އަހަރުގެ އެޕްރީލްމަހުގެ ތެރޭގައި މަގުމަތީގައި ޚާއްޞަކުރެވިފައިވާ ޕެއިޑް ޕާކިން ޒޯންތަކުގައި ހަތަރުފޮރޮޅުލީ ވެހިކަލްތަށް ޕާކުކުރަން އަންގާނެ" މިނިސްޓަރ މުޢިއްޒު ވިދާޅުވިއެވެ.
މާލޭގެ އެންމެ ގިނައިން މީހުން ޙަރަކާތްތެރިވާ ސަރަޙައްދުތަކުގައި ޕާކިން ބިލްޑިންގުތަކެއް ޢިމާރާތްކުރެއްވުމަށް ކުރައްވާ ތައްޔާރީތަކުގެ ދަށުން ލިޔެ ކިއުމުގެ މަސައްކަތާއި މިނޫންވެސް މުހިންމު މަސައްކަތްތައް ސަރުކާރުން ގެންދަވަނީ ކުރައްވަމުންކަމަށް އިންފަރާސްޓްރަކްޗަރ މިނިސްޓްރީން ވަނީ ހާމަކުރައްވާފައި.
"އެކަންތައް ހަމަޖެހުނީމަ ފުރުސަތު ހުޅުވާލަނަން ޕާކިން ބިލްޑިންގުތަށް އަޅާނެ ފަރާތައް ހޯދުމަށް.. މިތަންތަނަކީ ހަމައެކަނި ޕާކިންއަށް ބޭނުންކުރާ ތަންތަނަށް ނަހަދައި، ބިލްޑިންގުގެ އެހެން ފުލޯތަކުގެ ބޭނުން ފުރިހަމަޔަށް ހިފޭގޮތަށް ބަހައްޓަނީ" މިނިސްޓަރ މުޢިއްޒު ވިދާޅުވިއެވެ.
މާލޭގައި ދުއްވާ ހަތަރުފުރޮޅުލީ އުޅަދުތައް ޕާކުކުރާނެ ވަކި ސަރަޙައްދުތަކެއް ކަނޑައަޅައި، މި ޕާކިން ސަރަޙައްދުތައް ކުރިއަށް އޮތް 3 މަސްދުވަހުގެ ތެރޭގައި ތަރައްޤީކުރެއްވުމަށް ސަރުކާރުން ވަނީ ނިންމަވާފައެވެ.
"އަތޮޅެއްގެ ރަށަކުން މީހަކު މާލެ އަންނައިރު، އޭނާގެ ހިތަށް ނުތަނަވަސްކަން ގެންނަ އެއްކަމަކީ، މާލޭގައި ހިނގާނެ ގޮތް... ދުއްވާ އެއްޗެއްގައި ދަތުރުކުރާނެ ގޮތް.. މާލޭގައި އުޅޭ މީހުން އުޅޭ ދަތިކަން.." މިނިސްޓަރ މުޢިއްޒު ވިދާޅުވިއެވެ.
އަންނަ އަހަރުގެ އޭޕްރީލް މަހަށްފަހު މިކަމަށް އެދެވޭ ޙައްލެއް ލިބޭނެ ކަމަށް މިނިސްޓަރ މުޢިއްޒު ވިދާޅުވިއެވެ.