މަޖީދީމަގު ތަރައްޤީކުރެއްވުމުގެ މަޝްރޫޢުގެ ދަށުން، މަގުގެ ހިނގާ ސަރަޙައްދުތަކުން ހިނގާ މީހުންނަށް ހިޔާވެވޭނެ ނިޒާމެއް ޤާއިމުކުރައްވާނެކަމަށް ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލޭ ރީ-ޑިވޮލޮޕް މަޝްރޫޢުގެ ދަށުން ސަރުކާރުން މާލޭގެ 13 މަގެއް ރަނގަޅު ފެންވަރެއްގައި ތަރައްޤީކުރެއްވުމަށް ވަނީ ނިންމަވާފައެވެ. މިގޮތުން އެންމެ ފުރަތަމަ ތަރައްޤީކުރުމުގެ މަސައްކަތް ފަށްޓަވާފައި ވަނީ މާލޭގެ މައިމަގު ކަމުގައިވާ މަޖީދީމަގެވެ. މަޖީދީމަގު ތަރައްޤީކުރުމުގެ މަޝްރޫޢު ކުރިއަށްދާ ގޮތާ ގުޅޭގޮތުން މީޑިއާއަށް މަޢުލޫމަތު ދެއްވަމުން ހައުސިން މިނިސްޓަރ ޑރ. މުޙައްމަދު މުޢިއްޒު ވިދާޅުވީ، ހަލުވި ދުވެއްޔެއްގައި މަޖީދީގެ މަސައްކަތް ކުރިއަށްދާކަމަށާއި، ކަނޑައަޅާފައިވާ ތާވަލާ އެއްގޮތަށް މަގުގެ މަސައްކަތް ނިންމަވާލެއްވުމަށް އަމާޒު ކަނޑައަޅުއްވާފައިވާ ކަމަށެވެ. މިނިސްޓަރ ވިދާޅުވީ މަޖީދީމަގުގެ މަސައްކަތް މުޅިން ނިމިގެންދާއިރު މަގުގެ ދެފަރާތުގައި ހިނގާމީހުންނަށް ޚާއްޞަ ކުރެވިފައިވާ ދުވާރު ހިޔާކުރައްވަން ނިންމަވާފައިވާކަމަށެވެ. މިނިޒާމު ޤާއިމުކުރުމަށްޓަކައި އެކަމަށް ބޭނުންވާ ފަންނީ މަސައްކަތްތައް މިހާރު ފަށްޓަވާފައިވާކަމަށްވެސް މިނިސްޓަރ މުޢިއްޒު ވިދާޅުވިއެވެ.
މަގުގައި ހިނގާ ބިނގާވެ އުޅޭ ފަރާތަކަށް ލުއިފަސޭހަކަން ފޯރުކޮށްދެއްވުމުގެ ގޮތުން، ޒަރޫރީ ބޭނުންތަކަށް އެންމެ ގިނައިން ބޭނުންކުރަމުންދާ މަޖީދީމަގުގެ ދުވާރު ހިޔާކުރުމަށް ސަރުކާރުން ނިންމާފައިވާއިރު، މަޖީދީ މަގުގެ ހުރިހާ މަސައްކަތެއް އަންނަ ފެބުރުއަރީ މަހުގެ ފުރަތަމަ ހަފްތާގެ ތެރޭގައި ނިންމާލުމަށް ވަނީހަމަޖެހިފައެވެ. އަދި މިހާރު މަޖީދީ މަގުގެ ތަރައްޤީކުރުމުގެ މަޝްރޫޢުގެ ދަށުން ކުރިއަށްދަނީ މަގުގެ 3 ވަނަ ސެގްމެންޓުގެ މަސައްކަތްތައްކަން ފާހަގަކޮށްލެވެއެވެ.
މާލޭގެ މަގުތައް ރަނގަޅު ފެންވަރަކަށް ތަރައްޤީކުރުމުގެ މަޝްރޫޢޫގެ މަސައްކަތް ނިންމެވުމަށް ކަނޑައަޅުއްވާފައިވާ ތާރީޚަކީ 2018 ވަނަ އަހަރުގެ ސެޕްޓެމްބަރު މަހުގެ ނުވަވަނަ ދުވަހެވެ.