ދަރިމައިވުމުގެ މައްސަލަތަކާއި، ކުޑަކަމުދާ ނިޒާމްގެ ބަލިތަކާއި، ކިޑްނީ ބަލިތަކަށް ފަރުވާދޭ މަރުކަޒެއް، އައި.ޖީ.އެމްގައި ޤާއިމްކުރައްވައި، އެމަރުކަޒުން އަންނަ ހަފްތާގެ ތެރޭގައި ޚިދުމަތް ދެއްވަން ފަށްޓަވާނެކަމަށް އައި.ޖީ.އެމް.އެޗުން ވިދާޅުވެއްޖެއެވެ.
ޞިއްޙީ ދާއިރާ، ހަރުދަނާކުރައްވައި، ޞިއްޙީ ނިޒާމްގެ ތެރެއިން ރައްޔިތުންނަށް، އެކަށީގެންވާ ބޭސްފަރުވާ ލިބޭނޭ އިންތިޒާމް ހަމަޖެއްސެވުމަށް ސަރުކާރުން ކުރައްވަމުން ގެންދަވާ މަސައްކަތުގެ ތެރެއިން މިހާރު އެންމެ ބާރު ދުވެލީގައި ކުރައްވަމުން ގެންދަވާ މަސައްކަތަކީ ޤައުމުގެ މައި ހޮސްޕިޓަލް އައި.ޖީ.އެމް.އެޗް ތަރައްޤީ ކުރެއްވުމުގެ މަސައްކަތެވެ.
އެ ހޮސްޕިޓަލުން ޚިދްމަތް ލިބިގަންނަ މީހުންގެ ޢަދަދު އިންތިހާއަށް އިތުރުވެފައިވާއިރު، އެ އެންމެންނަށް އެއްފުރާޅެއްގެ ދަށުން ޚިދްމަތް ފޯރުކޮށްދެވޭ ފަދަ ގޮތަކައް އައި.ޖީ.އެމްއެޗްގެ އިންފްރާސްޓަރކްޗަރއަށް ބޮޑެތި ބަދަލުތަކެއް ގެންނަވައި، ޖާގައިގެ ދަތިކަން ޙައްލު ކުރެއްވުމަށް ގެންދަވަނީ ގިނަ މަޝްރޫޢުތައް ހިންގަވަމުންނެވެ.
ހަމައެއާއެކު، ރާއްޖެއިން ބޭރަށް އެކި ބަލިތަކަށް ފަރުވާ ހޯދަންދާ ދިވެހިން ގިނަވެ، ދައުލަތުގެ މާލިއްޔާއިން މިކަމަށް ކުރަންޖެހޭ ޚަރަދު ބޮޑުވުމުގެ ސަބަބުންނާއި، ޢާއްމުން އެ ޚިދްމަތް ލިބިގަތުމަށް ރާއްޖެއިން ބޭރަށްދާން އުފުލަންޖެހޭ ތަކްލީފް ކުޑަކުރުމުގެ ގޮތުން، ރާއްޖެއިން ލިބެން ނެތް ޚާއްޞަ ބަލިތަކުގެ ފަރުވާއާއި އެކި އޮޕަރޭޝަންތައް އައި.ޖީ.އެމް.އެޗްގައި ކުރެވޭނޭ އިންތިޒާމް ހަމަޖެއްސެވުމަށް ކުރަމުންދާ މަސައްކަތް ފާހަގަކޮށްލެވެއެވެ.
މިއަހަރުގެ ޖުލައިމަހު، އެ ހޮސްޕިޓަލުގައި ހިތުގެ ޚާއްޞަ ފަރުވާގެ ޚިދުމަތް ފައްޓަވާފައިވާއިރު، މިހާރު އަމާޒަކީ ދަރިން ލިބުމުގައި ފިރިހެނުންނަށް ދިމާވާ މައްސަލަތަކާއި، ކުޑަކަމުދާ ނިޒާމްގެ މައްސަލަތަކާއި، ކިޑްނީގެ ބަލިތަކައް ފަރުވާކުރުމާއި، އެކަމާ ގުޅުން ހުރި ޚާއްޞަ ފަރުވާދެވޭނޭ ޤައުމީ މަރުކަޒެއް އެ ހޮސްޕިޓަލުގައި ޤާއިމް ކުރުމުގެ މަސައްކަތެވެ.
އައި.ޖީ.އެމް އެޗުން ވިދާޅުވާ ގޮތުގައި މިމަހުގެ 20 ވަނަ ދުވަހުން ފެށިގެން އެ މަރުކަޒުގައި ކުޑަކުދިންގެ ޚާއްޞަ ސުޕަރ ސްޕެޝަލިސްޓް ޑޮކްޓަރުންގެ ޚިދްމަތް ފައްޓަވާނެއެވެ. ހަމަ އެއާއެކު، ކިޑްނީ ބަލިތަކަށް ޚާއްޞަ ސުޕަރ ސްޕެޝަލިސްޓެއް ކަމަށްޗާ ޑރ. އިބްރާހީމް ޝިހާމްވެސް އެ ސެންޓަރުގައި ޚިދްމަތް ދެއްވަން ފައްޓަވާނެއެވެ.
މިހާރު އެ ހޮސްޕިޓަލުން ވަނީ މި ދެ ޑޮކްޓަރުންނަށް ދެއްކުމަށް ވެއިޓްލިސްޓް ކުރުމުގެ ފުރުޞަތު ޢާއްމުކޮށް ހުޅުއްވާލައްވާފައެވެ. ފޯނުން ގުޅައިގެންނާއި، އެ ހޮސްޕިޓަލިގެ ވެބްސައިޓާއި މޯބައިލް އެޕްލިކޭޝަން ބޭނުންކޮށްގެން މި ޚިދްމަތް ލިބޭނޭ އިންތިޒާމް ވަނީ ހަމަޖައްސަވާފައެވެ.
އައި.ޖީ.އެމް.އެޗުން އިންޑިޔާގެ އެންޔޫ ހޮސްޕިޓަލާއެކު ވެވުނު، 15 އަހަރުގެ އެއްބަސްވުމުގެ ދަށުން "ނެޝަނަލް ޔޫރޯ ރީނަލް އެންޑް ފާޓިލިޓީ ސެންޓަރު"ގެ ޚިދްމަތް ދެއްވަން ފަށްޓަވާއިރު، މި ސެންޓަރުގައި ޚިދްމަތް ދެއްވާނޭ ދިވެހި ނަރުހުންނާއި އަދި އެހެނިހެން ޞިއްޙީ ފަރުވާދޭ ފަންނީ ބޭފުޅުން ވަނީ ތަމްރީން ކުރައްވާފައެވެ. އަދި މިތަނަށް ބޭނުންވާ ފަންނީ ޢާލާތްތަކާއި ޚާއްޞަ ޑޮކްޓަރުންނާއި ފަންނުވެރިން ހަމަޖައްސައިދެއްވާފައި ވަނީ އެން.ޔޫ ހޮސްޕިޓަލުންކަމަށް އައި.ޖީ.އެމް.އެޗުން މަޢުލޫމާތު ދެއްވައެވެ.
"ނޭޝަނަލް ޔޫރޯ ރީނަލް އެންޑް ފާޓިލިޓީ ސެންޓަރު" ޤާއިމް ކުރެއްވުމުގެ މަޝްރޫޢަށް ދިވެހި ސަރުކާރުން 2.5 މިލިޔަން ރުފިޔާ، އަދި އެން.ޔޫ ހޮސްޕިޓަލުން ހަ މިލިޔަން ރުފިޔާ ޚަރަދު ކުރައްވާފައިވާ ކަމަށް އައި.ޖީ.އެމް.އެޗުން ހާމަކުރައްވައެވެ.
ކުޑަކަމުދާ ނިޒާމްގެ ބަލިތަކަކީ، އާސަންދައިގެ ޚަރަދުގައި މިހާރުވެސް ރާއްޖެއިން ބޭރަށް ގިނަބަޔަކު ފޮނުއްވަމުން ގެންދަވާ ބަލިތަކެކެވެ. އަދި ދަރިން ނުލިބުމުގެ މައްސަލަތައް ދިމާވެގެން އެކަމުގެ ފަރުވާއަށްވެސް ކޮންމެ އަހަރަކު އެތައް ބަޔަކު ރާއްޖެއިން ބޭރުން ބޭސްފަރުވާ ހޯދަމުންދެއެވެ.