ޔޫކްރެއިންގެ ރައީސް ވޮލޮޑިމީރް ޒެލެންސްކީ ވެރިކަމުން ދުރުކޮށް، އެ ޤައުމުގެ ޒައާމަތާ އައު ވެރިއަކު ހަވާލުވުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވައިފިއެވެ.
މިދިޔަ ހޮނިހިރު ދުވަހު ޓްރަމްޕް މިފަދައިން ގޮވާލައްވާފައި މިވަނީ، ރަޝިއާ އާއެކު ޑީސަލް ފޯރުކޮށްދިނުމުގެ އެއްބަސްވުމެއް އެމެރިކާއިން އިޢުލާނު ކުރިތާ އެއްދުވަސް ފަހުންނެވެ. މި އެއްބަސްވުމަށްފަހު، ރަޝިއާގެ ތެޔޮ ސާފުކުރާ ކާރުޚާނާތަކަށް ޔޫކްރޭނުން ދެމުންދާ ހަމަލާތަކާ ގުޅިގެން ޓްރަމްޕް ވަނީ ޒެލެންސްކީއަށް ވަރަށް ބޮޑަށް ފާޑުވިދާޅުވެފައެވެ. އަދި މިކަމާ ގުޅިގެން ޒެލެންސްކީ ވެސް ވަނީ ޓްރަމްޕަށް ވަރުގަދަ ރައްދެއް ދެއްވާފައެވެ.
ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، ޔޫކްރެއިނުން އައު ރައީސަކު އިންތިޚާބުކުރަންވީ ވަގުތު ޖެހިއްޖެ ކަމަށެވެ. އަދި ރަޝިއާގެ ތެޔޮ ސާފުކުރާ ކާރުޚާނާތަކަށް ޔޫކްރެއިނުން ދެމުންދާ ހަމަލާތަކުގެ ސަބަބުން ދުނިޔޭގެ ބާޒާރުގައި ޑީސަލް ލިބުމަށް ބޮޑެތި ހުރަސްތަކެއް އެޅެމުންދާ ކަމަށް އޭނާ ވިދާޅުވިއެވެ. މީގެއިތުރުން، އެމެރިކާގެ ދަނޑުވެރިންނާއި ގެރިބަކަރި ގެންގުޅޭ ފަރާތްތަކަށް ދަތިކުރުމުގެ ނިޔަތުގައި ޒެލެންސްކީ މަސައްކަތް ކުރައްވާ ކަމަށް ތުހުމަތު ކުރައްވަމުން ޓްރަމްޕް ވިދާޅުވީ، ސުލްޙަ ޤާއިމުކުރުމަށް ލިބުނު ފުރުޞަތުތަކުގެ ބޭނުން ޒެލެންސްކީ ނުހިއްޕެވި ކަމަށެވެ.
މި ވާހަކަތަކަށް ރައްދު ދެއްވަމުން ޒެލެންސްކީ ވިދާޅުވީ، ރަޝިއާގެ ޑީސަލާ ދެކޮޅަށް އެޅި ދަތިކުރުމުގެ ފިޔަވަޅުތައް އެމެރިކާއިން އުވާލުމަކީ ރަޝިއާގެ ސަރުކާރަށް ލިބުނު ބޮޑު ހިތްވަރެއް ކަމަށެވެ. އެގޮތުން، އޭގެ ނަތީޖާއެއްގެ ގޮތުން ރަޝިއާއިން ހޮނިހިރު ދުވަހު ޔޫކްރޭނުގެ ދެކުނުގެ ސިޓީއެއް ކަމަށްވާ ޒަޕޮރީޜިއާއަށް ބޮން އަޅައި، ތިން ކުޑަކުދިން ހިމެނޭހެން 20 މީހުން މަރާލާފައިވާ ކަމަށް އޭނާ ހާމަކުރެއްވިއެވެ. މަރުވި މީހުންގެ ތެރޭގައި މީހުްން ދިރިއުޅޭ އިމާރާތެއް ވެއްޓި، އޭގެ ދަށުވި އުމުރުން 6 އަހަރުގެ އަންހެން ކުއްޖަކު ވެސް ހިމެނެއެވެ. މިއީ ހުސްވި ހަފުތާގައި ޔޫކްރޭނަށް ދިން ހަމަލާތަކުގެ ތެރެއިން، ގިނަ ޢަދަދެއްގެ ބަޔަކު މަރުވި ތިންވަނަ ހަމަލާއެވެ. މިދިޔަ ހަފުތާގެ ބުދަ އަދި ބުރާސްފަތި ދުވަހު ދިން ހަމަލާތަކުގައި ވެސް އާންމުންގެ 80 އަށް ވުރެ ގިނަ މީހުން ވަނީ މަރުވެފައެވެ.
ދުނިޔޭގެ ބާޒާރުގައި ޑީސަލްގެ އަގު އުފުލެން މެދުވެރިވީ، މިދިޔަ ފެބުރުއަރީ މަހު އީރާނުގެ ހަނގުރާމަ ފެށުމާ ގުޅިގެންނެވެ. މިއީ ކުރިއަށް އޮތް މަހު ބާއްވާ އެމެރިކާގެ މިޑްޓަރމް އިންތިޚާބާ ދިމާކޮށް ޓްރަމްޕްގެ ރިޕަބްލިކަން ޕާޓީއަށް ސިޔާސީ ގޮތުން ކުރިމަތިވެފައިވާ ބޮޑު ގޮންޖެހުމެކެވެ. ނަމަވެސް، ރަޝިއާ އާއެކު ވެވުނު ޑީސަލް އެއްބަސްވުމާ ގުޅިގެން އެމެރިކާގެ ޤާނޫނު ހަދާ މަޖިލީހުގެ މެންބަރުންނާއި، ޓްރަމްޕްގެ އަމިއްލަ ޕާޓީގެ މެންބަރު ޑޮން ބޭކަން ވެސް ވަނީ ފާޑުވިދާޅުވެފައެވެ.
ހަނގުރާމަ ހުއްޓުވުމަށްޓަކައި އެމެރިކާގެ މިއާމީގައި ޔޫކްރޭނު، ޔޫރަޕް އަދި އެމެރިކާގެ އޮފިޝަލުންގެ މެދުގައި މަޝްވަރާތައް ކުރިއަށް ދަނިކޮށް، ޓްރަމްޕް މިފަދަ އެއްބަސްވުމެއް އިޢުލާނު ކުރެއްވުމަކީ ލިބުނު ކުއްލި ހައިރާންކަމެއް ކަމަށް ޒެލެންސްކީ ފާހަގަކުރެއްވިއެވެ. މި މަޝްވަރާތަކަށް ފަހު ޔޫކްރޭނުގެ ވަފުދު މިހާރު ވަނީ އެނބުރި ޤައުމަށް ދިއުމަށް ދަތުރުފަށައިފައެވެ. އަނެއްކޮޅުން ރަޝިއާގެ ރައީސް ވްލަޑިމީރް ޕޫޓިން ވިދާޅުވެފައިވަނީ، ޔޫކްރޭނުން ދެމުންދާ ޑްރޯން ހަމަލާތަކުގެ ސަބަބުން މި ދަނޑިވަޅުގައި ސުލްޙައިގެ ވާހަކަތައް ކުރިއަށް ގެންދެވެން ނެތް ކަމަށެވެ. ނަމަވެސް، ކުރިއަށް އޮތް ދެ ހަފުތާގެ ތެރޭގައި އެމެރިކާގެ މަންދޫބުން ރަޝިއާއަށް ޒިޔާރަތްކުރާނެ ކަމަށް ޚަބަރުތައް ބުނެއެވެ.
މި ކުރިމަތިލުންތަކާ ގުޅިގެން އިނގިރޭސިވިލާތުގެ ބޮޑުވަޒީރު އެންޑީ ބަރންހަމް ވަނީ ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރައްވާނެ ކަމަށް ވިދާޅުވެ، ކުރިއަށް އޮތް ދުވަސްތަކުގައި ޒެލެންސްކީއާ ބައްދަލުކުރައްވާނެ ކަން އިޢުލާނު ކުރައްވައިފައެވެ. ސުލްހައިގެ މަސައްކަތްތައް މަޑުޖެހިފައިވާއިރު، މި ހަނގުރާމައަށް ހަތަރު އަހަރާއި ބައި ވީއިރު ވެސް މަސްރަޙު ފެންނަނީ އިތުރަށް ގޯސްވަމުންދާ މަންޒަރެވެ.