ލަންކާގައި ކުރިއަށްދާ ޓްރޭނިންތަކާމެދު ހިތްހަމަޖެހޭ: ހާޒިގް

ޤައުމީ ކުރިކެޓް ޓީމުން ސްރީލަންކާގައި ހަދަމުންދާ ޓްރޭނިންތަކާމެދު ހިތްހަމަޖެހޭކަމަށާ، ޓްރޭނިންތައް ކުރިއަށްދަނީ މޮޅެތި ބޯލަރުންތަކަކާއެކު ފަސްޓްކްލާސް ދަނޑެއްގައިކަމަށް ޓީމުގެ ކެޕްޓަން ހަސަން ހާޒިގް ބުނެފިއެވެ.

ލަންކާގައި ޤައުމީ ޓީމުން ހަދަމުންދާ ޓްރޭނިންތަކަކީ އައިސީސީ މެންސް ޓީ 20 ވޯލްޑްކަޕް 2028، އޭޝިއަން ސަބް ރީޖަނަލް ކޮލިފިކޭޝަން މުބާރާތުގެ ކުރިން ޕިޗަށް ހޭނިލާ، ލަންކާގެ ކުޅުންތެރިންނާއެކު މެޗު ތަޖުރިބާތަކެއް ހޯދުމުގެ ބޭނުމުގައި ހަދަމުންދާ ޓްރޭނިންތަކެކެވެ. ލަންކާގައި ކުރިއަށްދާ ކޭމްޕާއި ގުޅޭގޮތުން އެކޮޅުގައި ހުރެ ޕީއެސްއެމް ނިއުސްއާ ވާހަކަދައްކަމުން ޓީމުގެ ކެޕްޓަން ބުނެފައިވަނީ ޓްރޭނިންތައް ކުރިއަށްދާ ގޮތާމެދު ވަރަށް ހިތްހަމަޖެހޭކަމަށެވެ.

ޚާއްސަގޮތެއްގައި ލަންކާގެ ހުނަރުވެރި ބޯލަރުންނާއެކު ފެންވަރު ރަނގަޅު ދަނޑެއްގައި ފަރިތަކޮށްލަން ލިބުމަކީ މެލޭޝިއާ މުބާރާތުގެ ކުރިން ޓީމަށް ލިބޭނެ ކުރިއެރުމެއްކަމަށް އޭނާ ބުނެފަވެއެވެ.

"ޓްރޭނިން ކުރިއަށްދާގޮތާ ދޭތެރޭ ހުރިހާ ކުޅުންތެރިންވެސް ވަރަށް ހިތްހަމަޖެހޭ. ފަސްޓް ކްލާސް ދަނޑުތަކެއްގައި ޓްރޭނިން ހަދަމުންމިދަނީ، މޮޅެތި ބޯލަރުންތަކަކާ އެކީގަ. މި ފެންވަރުގެ ދަނޑެއްގައި ޓްރޭނިންތައް ހެދޭތީ ވަރަށް އުފާވޭ. މިހާރުވެސް ޓެސްޓް ކްރިކެޓް ކުޅެމުން އަންނަ ދަނޑެއްވީމަ، ވަރަށް ފާސްޓް އައުޓްފީލްޑާ އެއްޗެހި" ހާޒިގް ބުންޏެވެ.

މުބާރާތުގެ ކުރިން ޤައުމީ ޓީމުން ލަންކާގައި ހަދަމުންދާ ޓްރޭނިންތަކުގެ ތެރެއިން އެކޮޅުގެ ވަރުގަދަ ޓީމުތަކާއެކުވަނީ އެކުވެރިކަމުގެ މެޗުތައްވެސް ކުޅެފައެވެ. މެލޭޝިއާ މުބާރާތުގެ ކުރިން ފެންވަރު ރަނގަޅު ދަނޑެއްގައި މެޗު ތަޖުރިބާ ހޯދުމަށް ކުޅެމުންދާ މިމެޗުތަކުން ޓީމަށް ކުރިއެރުންތަކެއް އަންނާނެކަމަށް ގަބޫލުކުރެވޭކަމަށް ސީބީއެމްއިން ބުނެއެވެ.

މާލޭގައި ޓީމުގެ ފަރިތަކުރުންތައް ބާއްވަމުން އަންނަ މާފަންނު ކުޅިވަރު އެކުވެނީގެ ދަނޑަކީ ހަލާކުވެފައިވާ ދަނޑަކަށްވުމުން، ބައިނަލްއަޤްވާމީ މުބާރާތެއްގައި ވާދަކުރާނަމަ ޤައުމީ ކުޅުންތެރިން ސްރީލަންކާއަށް ގޮސް ޕިޗަށް ހޭނުމަށް ފަރިތަކުރުންތައް އަންނަނީ ބާއްވަމުންނެވެ.

އައިސީސީ މެންސް ޓީ 20 ވޯލްޑްކަޕް 2028، އޭޝިއަން ސަބް ރީޖަނަލް ކޮލިފިކޭޝަން މުބާރާތުގައި ރާއްޖެއިން ވާދަކުރަނީ ގްރޫޕް ބީ ގައި ހޮންގކޮންގ، މެލޭޝިއާ، ސިންގަޕޫރު، ސައުދީއަރަބިއްޔާ، ކެމްބޯޑިއާ އަދި ޗައިނާއާއެކުގައެވެ.

މުބާރާތުގައި ވާދަކުރުމަށް ޤައުމީ ޓީމުގެ މެލޭޝިއާއަށް ދާނީ މިމަހުގެ 5 ވަނަ ދުވަހުއެވެ. އަދި މުބާރާތުގައި ރާއްޖޭގެ ފުރަތަމަ މެޗު ކުޅޭނީ 8 ވަނަ ދުވަހު ޗައިނާއާ ދެކޮޅަށެވެ. އަދި 9 ވަނަ ދުވަހު ސިންގަޕޫރާ ދެކޮޅަށް ކުޅުމަށްފަހު 11 ވަނަ ދުވަހު ނުކުންނާނީ މުބާރާތް ބާއްވާ މެލޭޝިއާއާ ވާދަކުރުމަށެވެ. އެއަށްފަހު 12 ވަނަ ދުވަހު ހޮންގްކޮންގާ ދެކޮޅަށް ކުޅުމަށްފަހު ފަހު މެޗުގައި 14 ވަނަ ދުވަހު ނުކުންނާނީ ސައުދީ އަރަބިއްޔާއާ ދެކޮޅަށެވެ.