ފިނި މޫސުމާ ދިމާކޮށް ރަޝިއާއިން ޔޫކްރެއިންގެ ކީވް އަދި އެހެން ސަރަޙައްދުތަކުގެ ހަކަތައިގެ ވިއުގަތަކަށް އަމާޒުކޮށް ވަރުގަދަ ހަމަލާތަކެއް ދީފިއެވެ. ޔޫކްރެއިންގެ އޮފިޝަލުން ބުނީ، މި ހަމަލާތަކުގައި ކުޑަކުއްޖަކާއެކު ހަތް މީހުން މަރުވެފައިވާ ކަމުގައެވެ. މިއީ، ފާއިތުވި މަސްތަކުގައި ހަކަތަ އުފައްދާ މަރުކަޒުތަކަށް ދިން އެންމެ ވަރުގަދަ ހަމަލާތަކެވެ. މި ހަމަލާތަކާ ގުޅިގެން ކީވް އަދި ވަށައިގެންވާ ތިން ސަރަޙައްދަކުން ކުއްލި ޙާލަތުގައި ކަރަންޓު ކަނޑާލަން ޖެހުނެވެ. މީގެ ސަބަބުން ޓްރޭމްތަކާއި ބަސްތަކުގެ ދަތުރުތައް ހުއްޓި، ފެނުގެ ޚިދުމަތަށް ވެސް ބުރޫއަރާފައިވެއެވެ.
ޔޫކްރެއިންގެ އަސްކަރިއްޔާއިން ބުނީ، ރަޝިއާއިން ފޮނުވާލި 285 ޑްރޯންގެ ތެރެއިން 254 ޑްރޯން ވައްޓާލާފައިވާ ކަމުގައެވެ. މީގެ އިތުރުން، ރަޝިއާއިން ވަނީ ބެލިސްޓިކް މިސައިލްގެ ހަމަލާތަކެއް ވެސް ދީފައެވެ. ރައީސް ވޮލޮޑޮމީރް ޒެލެންސްކީ ވިދާޅުވީ، ފަސް ސަރަޙައްދެއްގެ މުހިންމު އުމްރާނީ ވަސީލަތްތަކަށް ހަމަލާދީފައިވާއިރު، އިތުރު ފަސް ސަރަޙައްދަކަށް ގެއްލުންވެފައިވާ ކަމުގައެވެ. ލިމަން ކައިރީގައިވާ އަސްކަރީ މަރުކަޒަކަށް ޒިޔާރަތްކުރެއްވުމަށްފަހު، ރަޝިއާގެ ސިފައިންގެ އަތްދަށުން 176 އަކަކިލޯމީޓަރުގެ ސަރަޙައްދެއް އަނބުރާ ހޯދާފައިވާ ކަން އޭނާ ފާހަގަކުރެއްވިއެވެ.
ޔޫކްރެއިންގެ ބޮޑުވަޒީރު ސަރްހީ ކޮރައިޓްސްކީ ވިދާޅުވީ، މިއީ ބަހާރު މޫސުން ނިމުނު ފަހުން ދިން މި ފަދަ އެންމެ ބޮޑު ހަމަލާތައް ކަމުގައެވެ. ޚާރިޖީ ވަޒީރު އަންދްރީ ސީބީހާ ވިދާޅުވީ، މިއީ ފިނިމޫސުމާ ދިމާކޮށް ރައްޔިތުންނަށް ދަތިކުރުމަށް ރަޝިއާއިން ގަސްދުގައި ދިން ހަމަލާތަކެއް ކަމުގައެވެ. ނަމަވެސް، ޢާންމުންނަށް އަމާޒުކޮށް ހަމަލާދޭ ކަން ރަޝިއާއިން ދޮގުކުރެއެވެ. ރަޝިއާއިން ބުނީ، ހަމަލާތައް އަމާޒުކޮށްފައި ވަނީ ކީވްގެ ކަރަންޓު އުފައްދާ މަރުކަޒުތަކަށާއި، އޮޑެއްސާގެ ސިނާއީ މަރުކަޒެއްގެ އިތުރުން އިސްމާއިލްގެ ބަނދަރަށް ކަމުގައެވެ.
މި ހަމަލާތަކުގެ އަސަރު އަވައްޓެރި ޤައުމުތަކަށް ވެސް ވަނީ ކޮށްފައެވެ. މޮލްޑޯވާއަށް ތިން ޑްރޯނެއް ވަދެފައިވާއިރު، ހުޅަނގުގެ ދިފާޢީ އިއްތިޙާދުގެ (ނޭޓޯ) މެންބަރުން ކަމުގައިވާ ރުމޭނިއާއާއި ޕޮލެންޑުން ދިފާޢުގައި އަސްކަރީ މަތިންދާބޯޓުތައް ބޭނުންކުރިއެވެ. އަދި، ޕޮލެންޑުގެ ބައެއް ވައިގެ ބަނދަރުތަކުގެ ދަތުރުތައް މަޑުޖައްސާލިއެވެ. ޔޫކްރެއިންގެ އިންސާނީ ހައްގުތަކާބެހޭ އޮފިޝަލް ދުމީތުރޯ ލޫބިޔައެޓްސް ވިދާޅުވީ، ޢާންމުން ރައްކާތެރިވާނެ ތަންތަން މަދުވެ، މަދަނީ ދިފާއީ ނިޒާމު ފޭލުވެފައިވާ ކަމުގައެވެ. ހަނގުރާމައިގެ ރައްދުގައި ޔޫކްރެއިނުން ވެސް ދަނީ ރަޝިއާގެ ތެޔޮ ސާފުކުރާ ކާރުޚާނާތަކާއި ތެޔޮ ރައްކާކުރާ ގުދަންތަކަށް ހަމަލާދެމުންނެވެ.