ފުލުހުންގެ ބެލުމުގެ ދަށުގައިހުރި ގިނަ އަދަދެއްގެ ސިނގިރެޓާއި ދުންފަތް ނައްތާލައިފި

ފުލުހުންގެ ބެލުމުގެ ދަށުގައިހުރި ގިނަ އަދަދެއްގެ ސިނގިރެޓާއި ދުންފަތް ނައްތާލައިފިއެވެ.

ފުލުހުން ވިދާޅުވީ މިމަހުގެ 28 ވަނަ ދުވަހު ދޫނިދޫގައި ނައްތާލި ތަކެއްޗަކީ ހެންވޭރު ގެއެއްގެ އެޕާޓްމަންޓުގައި ހިންގަމުންދިޔަ އޮފީހެއްގައި ޤާނޫނާ ޚިލާފަށް، ސިނގިރެޓް އުފެއްދުމަށް މެޝިން ބަހައްޓައިގެން ސިނގިރެޓް އުފައްދާކަމަށް ތުހުމަތުކުރެވޭ މައްސަލައާ ގުޅިގެން ހިންގި އޮޕަރޭޝަންގައި ފުލުހުންގެ ބެލުމުގެ ދަށަށް ގެެނެސްފައިވާ ތަކެތިކަމަށެވެ.

މި އޮޕަރޭޝަން ހިންގާފައިވަނީ 30 ޖަނަވަރީ 2025 ގައެވެ.

ނައްތާލި ތަކެތީގެ ތެރޭގައި ހިމެނެނީ 4285 ސިނގިރެޓް ކާޓޫން، 232 ފޮށި ސިނގިރެޓް އަދި 93.60 ކިލޯގެ ދުންފަތެވެ.

މި ތަކެތި ނައްތާލާފައިވަނީ ފުލުހުންގެ ބެލުމުގެ ދަށަށް ގެނެވޭ މިފަދަ ތަކެތި ނައްތާލުމުުގައި އަމަލުކުރާނެ އުސޫލުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުންކަމަށް ފުލުހުން ވިދާޅުވިއެވެ.