އިބްރާހިމް ނާޞިރު އިންޓަރނޭޝަނަލް އެއަރޕޯޓު, އިންޑިއާގެ ޖީއެމްއާރު ކުންފުންޏަށް ދިނުމަކީ އިޤްތިޞާދީ ގޮތުން ހިންގި ބޮޑު ޖަރީމާއެއް ކަމަށާއި، އޭރުގެ ސަރުކާރުން ކުރި ވިޔާނުދާ ކަމެއްގެ ނާޖާއިޒް ނަތީޖާ ރައްޔިތުންނާ ބައްދަލުކުރަމުންދާކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އަދި ކުރީ ސަރުކާރުން ކުރިކަމެއްގެ ނަތީޖާ ނުބައިވުމުން އެކަން ޙައްލުކުރަން މިިޖެހުނީ އެހެންބަޔަކަށްކަމަށްވެސް ރައީސް ވިދާޅުވިއެވެ.
ދިވެހިންގެ އެއްބައިވަންތަކަމާއި، މިނިވަންކަމާއި ގުޅިފައިވާ އެންމެ މުހިއްމު އެއް ރަމްޒަކީ ދިވެހިންގެ އެއަރޕޯޓެވެ. އިބްރާހިމް ނާޞިރު އިންޓަރނޭޝަނަލް އެއަރޕޯޓަށް މިއަހަރުބައި ގަރުނު ފުރިގެންގޮސްފައިވާއިރު އެއަރޕޯޓަށް ލިބިގެންދާ ކޮންމެ ކުރިއެރުމަކާއި، ތަރައްޤީއަކީ އަޅުގަނޑުމެން ދިވެހިންނާއި ގުޅިފައިވާ، އަދި މުޅި ޤައުމުގެ އިޤްތިޞާދާއިވެސް ގުޅިލާމެހިފައިވާ ކަމެކެވެ. ދިވެހިންގެ އެއަރޕޯޓަކީ ރާއްޖޭގެ އިޤްތިޞާދުގެ މައިދޮރާއްޓެވެ. ރާއްޖޭގެ ސިނާޢީ ދާއިރާ މުޅިން ބަދަލުކޮށްލާ، ރާއްޖެ މިހާރު މިދެކޭ އުމްރާނީ ތަރައްޤީގެ މައި ބިންގަލަކީވެސް ދިވެހިންގެ އެއަރޕޯޓެވެ.
ނަމަވެސް 40 އަހަރަށްވުރެ ގިނަ އަހަރު ވަންދެން ދިވެހިންގެ އެއަރޕޯޓް ދިވެހިންގެ އަތުގައި އޮތުމަށްފަހު، ރައީސް ނަޝީދުގެ ސަރުކާރުގައި އެއަރޕޯޓް ތަރައްޤީކޮށް ހިންގުމަށް އިންޑިއާގެ ޖީއެމްއާރު ކުންފުންޏާ ހަވާލުކުރިއެވެ. ރާއްޖޭގެ މައި ދޮރާށި އިންޑިއާގެ ޖީއެމްއާރަށްދިން އެއްބަސްވުމަކީ އެއަރޕޯޓް 25 އަހަރަށް އަދި ބޭނުވެއްޖެ ނަމަ 30 އަހަރަށް ވެސް އިތުރުކުރެވޭ ގޮތަށް ވެފައިވާއެއްބަސްވުމެކެވެ. މި އެއްބަސްވުމުގައި އެއަރޕޯޓްގައި ވިސާފްރީ ޒޯނެއް އިންޑިއާގެ ރައްޔިތުންނަށް ހަދައިދީ، ރާއްޖޭގެ ޤާނޫނު ނުހިނގާ ސަރަޙައްދެއްހަދާ، 6000 އިންޑިއާމީހުންގެ އާބާދީއެއް ވަޒަންވެރިކުރުންވެސް އެއެއްބަސްވުމުގައި ހިމަނާފައިވާކަމަށް އެއިރުގެ އިދިކޮޅު ފަރާތްތަކުން ބުނެފައިވެއެވެ.
ނަމަވެސްޖީއެމްއާރަށް އެއާޕޯޓް ދިގުމުއްދަތަކަށް ދިނުމަށްފަހު ކުރީގެސަރުކާރުން ބުނަމުންދިޔައީ ޖީއެމްއާރްގެ ސަބަބުން ދިވެހި ރާއްޖެއަށް ބޮޑެތި ފައިދާތަކެއްކުރާނެކަމަށެވެ. އެގޮތުން ޖީއެމްއާރުން އެއާޕޯޓު ހިންގާއިރު 25 އަހަރުގެ ތެރޭގައި ދައުލަތަށް 45 ބިލިއަން ރުފިޔާ ލިބޭނެކަމަށް އޭރުގެ ސަރުކާރުން ބުނަމުންދިޔައެވެ. ނަމަވެސް ދިވެހިންގެ ފަޚުރެއް ކަމަށް ދެކޭ އެއަރޕޯޓް ކުއްޔަށް ދީގެން އަހަރު ދުވަސްތެރޭގައި ލިބުނީ އެންމެ 16 މިލިއަން ރުފިޔާކަމަށް ސަރުކާރުން ވިދާޅުވެއެވެ.
އެއަރޕޯޓް ހިންގުން ޖީ.އެމް.އާރާއި ހަވާލުކުރެއްވިތާ 2 އަހަރު ފަހުން އެކުންފުންޏާއެކު ސަރުކާރުންވެފައިވާ އެއްބަސްވުމުގައި ހުރި ބައެއް މައްސަލަތަކުގެ ސަބަބުން ރާއްޖޭގެ އިޤްތިޞާދަށް ބޮޑެތި ގެއްލުންތަކެއް ލިބެމުންދާތީ، އެ އެއްބަސްވުން ސަރުކާރުން ބާތިލުކުރައވާފައިވަނީ 2012 ވަނަ އަހަރުގެ ޑިސެމްބަރު މަހުގެ 7 ވަނަ ދުވަހުއެވެ. ބޭރު ކުންފުންޏަކަށް ރާއްޖޭގެ މައި ދޮރާށީގެ ހުރިހާ ކޮންޓްރޯލާއި ބާރުތައް ދީފައި އޮތްއޮތުން ނިމުމަކަށްގެންނަވާ އެއަރޕޯޓް ހިންގުން މޯލްޑިވްސް އެއަރޕޯޓްސް ކޮމްޕެނީ ލިމިޑެޓްގެ ދަށަށް ސަރުކާރުން ބަދަލްކުރެއްވިއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ވިދާޅުވީ އެއަރޕޯޓް ކުއްޔަށް ދީގެން އަހަރު ދުވަސްތެރޭގައި ލިބުނު އެންމެ 16 މިލިއަން ރުފިޔާއެއީ، އެންމެ އާދައިގެ ވިޔަފާރިއަކުން ވެސް އަހަރު ދުވަސްތެރޭގައި ލިބޭނެ މިންވަރެއް ކަމުގައެވެ. އެއާޕޯޓް ބޭރުބަޔަކަށް އެހާ ގިނަ ދުވަހަށް ހަވާލުކުރުމުން ދިވެހިންގެ އިގްތިސާދަށް ބޮޑެތި ގެއްލުން ލިބެމުންދާކަމަށް އޭރުގައި އިދިކޮޅު އަދި މިހާރު ސަރުކާރުގައި ތިބި ފަރާތްތަކުން ފާޅުގައި ގޮވަމުންދިޔައެވެ. އަދި ސިލްސިލާ މުޒާހަރާތައް ކުރަމުން ގެންދިޔައެވެ.
ޖީއެމްއާރާއެކު ވެވުނު އެއްބަސްވުން އުވާލާ، ފޮނުވާލުމުގެ ކެމްޕޭނުގައި އިސްކޮށް ހަރަކާތްތެރިވި ފަރާތްތަކުން ވިދާޅުވީ ޖީއެމްއާރު އަތުން އެއާޕޯޓް އަތުލުމަށް ފަށާފައިވާ ހަރަކާތް ސިލްސިލާކޮށް ކުރިއަށްދާނެ ކަމަށާއި އެގޮތުން އެކި ފޯރަމްތަކުގައި ޖީއެމްއާރާ ދެކޮޅަށް އަޑު އުފުލައި ޖީއެމްއާރްއަތުން އެއާޕޯޓް އަތުލާނެކަމަށް އެފަރާތްތަކުން ތަކުރާރުކޮށް ވިދާޅުވަމުން ގެންދިޔައެވެ.
ރައީސް ޢަބްދުﷲ ޔާމީން ވިދާޅުވީ، ކުރީގެ ސަރުކާރުން ޖީއެމްއާރަށް ދީފައިވަނީ އެއަރޕޯޓްގެ ހިންގުން އެކަނި ނޫންކަމަށެވެ. އެކަން ކޮށްފައިވަނީ، ސަރުކާރުން ދީގެން ނުވާނެ ސޮވެރެންޓް ގެރެންޓީތަކަށް ބަލާއިރު ވަރަށް ބޮޑު އަގެއް އަދާކުރާގޮތަށްކަމަށެވެ. ރައީސްގެ ވާހަކަފުޅުގައި، ބޭރު ކުންފުންޏަކުން އެ ކުންފުނީގެ އަމިއްލަ އިންވެސްޓެއް ރާއްޖޭގައި ކުރުމަށް އެކްސިސް ބޭންކުން ނެގި ލޯނަކަށް ދިވެހި ސަރުކާރުން 17 އިންސައްތަ އިންޓްރެސްޓްގެ ގެރެންޓީ ދިނުމަކީ ޤާނޫނީ ގޮތުން ރައީސްއަކަށް ކުރެވޭނެ ކަމެއްތޯ ސުވާލު އުފެއްދެވިއެވެ. މި ލޯނުގެ ސަބަބުން ފައިސާ ނުދައްކައިފިނަމަ ފައިސާ ނުދައްކާ ކޮންމެ ދުވަހަކަށް 30،000 އެމެރިކާ ޑޮލަރުގެ ދަރަނި ސަރުކާރުގެ ބޮލުގައި އެޅެމުންދިޔަކަން ރައީސް ފާހަގަކުރެއްވިއެވެ. ޖީއެމްއާރުން އެއަރޕޯޓް ތަރައްޤީކުރުމަށް ނެގި އެ ލޯނަށް ވީނުވީއެއް ނޭނގޭއިރު ހަމައެކަނި އެ ފެންނަން އޮތީ ހިސާބުތަކުންކަމަށް ސަރުކާރުން ވިދާޅުވެއެވެ.
އެމްޑީޕީ ސަރުކާރުން 25 އަހަރަށް ޖީއެމްއާރާ އެކު އެކުލަވާލި އެއްބަސްވުން ސަރުކާރުން އުވާލުމުން ސިންގަޕޫރުގެ އާބިޓްރޭޝަންގައި އެއް ބިލިއަން ޑޮލަރަށްވުރެ ބޮޑު ޢަދަދެއް ނަގައިދިނުމަށް އެކުންފުނިން އެދިފައިވެއެވެ. ނަމަވެސް އާބިޓްރޭޝަނުން ނިންމާފައި ވަނީ 250މިލިއަން ޑޮލަރު ޖީއެމްއާރަށް ދެއްކުމަށެވެ.
ޖީއެމްއާރު ކުންފުނި އަތުން އެއަރޕޯޓު ހޯދައި، އެތަނުގެ ހިންގުމާއި އެމްއޭސީއެލް ހަވާލުވި އަހަރު، އެމްއޭސީއެލްއަށް ފައިދާގެ ގޮތުގައި އެއް ބިލިޔަން ރުފިޔާ ލިބުނުކަމަށް އެމްއޭސީއެލް އިން ބުނެއެވެ. ރައީސުލްޖުމްހޫރިއްޔާ ވިދާޅުވިގޮތުގައި 16 މިލިޔަން ރުފިޔާއިން އެއް ބިލިޔަން ރުފިޔާއަށް، އެއަރޕޯޓުން އެމްއޭސީއެލްއަށް ލިބުނު ފައިދާ އިތުރު ކުރެވިފައިވާ އިރު، އެ އަދަދު ޑޮލަރުން ގެނައުމަށް ސަރުކާރުން އުއްމީދު ކުރައްވާކަމުގައެވެ.
އިބްރާހީމް ނާސިރު އިންޓަރނޭޝަނަލް އެއަރޕޯޓަކީ މިހާރު ދެހާސް ހަސަތޭކައަށްވުރެ ގިނަ މުވައްޒަފުންނާއެކުު ދައުލަތަށް މިހާރު އެންމެ ބޮޑު އާމްދަނީއަކާ ފައިދާއެއް ވާ ކުންފުންޏެކެވެ. ސަރުކާރުން ދަނީ ދިވެހިންގެ ޤައުމީ އަމިއްލަ އިންވެސްޓްމަންޓެއްގެ ގޮތުގައި އެއަރޕޯޓް 7 މިލިއަން ދަތުރުވެރިންނަށް މެހެމާންދާރީ އަދާކުރާ، އަދި މި ސަރަހައްދުގެ އެންމެ ރީތި އެއަރޕޯޓްގެ ގޮތުގައި ތަރައްޤީކުރުމުގެ މަސައްކަތްކުރައްވަމުންނެވެ. ދިވެހިންގެ އެއަރޕޯޓް އަނެއްކާވެސް މިވަނީ ތަރައްޤީގެ އައު އުސްމިންތަކަކާ ދިމާލަށް މިސްރާބުޖަހާފައެވެ.