ޔަހޫދީން އިސްތިޢުމާރުކޮށްފައިވާ ފަލަސްޠީނުގެ ހުޅަނގު އައްސޭރި ހަފްތާއެއްގެ މުއްދަތަށް ޔަހޫދީން ބަންދުކޮށްފިއެވެ.
ޔަހޫދީން ނިންމާފައި ވަނީ ހުޅަނގު އައްސޭރިއަށް ވަނުމަށް ބޭނުންކުރާ މަގުތައް ހިމެނޭހެން އެ ސަހަރު އެއްކޮށް އޮކްޓޯބަރު މަހުގެ 3ވަނަ ދުވަހާ ހަމައަށް ބަންދުކުރުމަށެވެ. އެއީ ޔަހޫދީން ފާހަގަ ކުރާ ޗުއްޓީއަކާ ގުޅިގެންނެވެ. އެ މުއްދަތު ނިމެންދެން ޗެކު ޕޮއިންޓުތައް އިތުރަށް ހަރުކަށިކޮށް، އެއް ސަރަޙައްދުން އަނެއް ސަރަޙައްދަށް ފަލަސްޠީނުގެ ރައްޔިތުން ދަތުރު ކުރުމަށް ވަނީ ހުރަސްއަޅައިފައެވެ.
ޔަހުދީން ވަނީ ރާމަاللهއާއި އަލްބީރު ސަރަޙައްދުގައި ކުރިން ވެސް އަޅާފައިވާ ފިޔަވަޅުތައް އިތުރަށް ވަރުގަދަކޮށްފައެވެ. އެ ސަރަޙައްދުގެ ގިނަ މަގުތަކެއް ބަންދުކޮށްފައިވާއިރު ފަލަސްޠީނުގެ ރައްޔިތުންނަށް ވެސް ޔަހޫދީން ދަނީ އުނދަގޫކޮށް ދުއްތުރާ ކުރަމުންނެވެ.
ޔަހޫދީން ވަނީ ތުރްމޫސްޢިއްޔާއާއި ޢަބޫދުއާއި ނަބީ ޞާލިޙްއާއި އަޠާރާއާއި ޠައިބާއަށް ނުވަދެވޭ ގޮތަށް އެ ސަރަޙައްދުތައް ވެސް ބަންދުކޮށްފައެވެ. އަދި ފަލަސްޠީނުގެ ރައްޔިތުން އިތުރަށް ބަލައި ފާސް ކުރުމަށް ޔަބްރޫދުއާއި ޢައިން ސިންޔާއާއި ޖަބަޢުގައި ޗެކް ޕޮއިންޓުތައް ޤާއިމްކޮށްފައިވެއެވެ.
2023ވަނަ އަހަރުގެ އޮކްޓޯބަރު މަހުގެ ތެރޭގައި ޔަހޫދީން ޣައްޒާއަށް ޢުދުވާނީ ހަމަލާތައް ދޭން ފެށުމާއެކު ހުޅަނގު އައްސޭރީގައި ދިރިއުޅޭ ފަލަސްޠީނުގެ ރައްޔިތުންނާ ދެކޮޅަށް ދެމުންދާ ހަމަލާތައް ވެސް ވަނީ އިތުރުވެފައެވެ. ޣައްޒާ ހަނގުރާމަ ފެށި ފަހުން ހުޅަނގު އައްސޭރީގައި ފަލަސްޠީނުގެ 1،206 ރައްޔިތުން ޝަހީދުކޮށްލާފައިވެއެވެ. އަދި 13،300އަށްވުރެ ގިނަ މީހުންނަށް ވަނީ ޒަޚަމްވެފައެވެ. އޭގެ އިތުރުން 26،000އަށްވުރެ ގިނަ ފަލަސްޠީނުގެ ރައްޔިތުން ހައްޔަރުކޮށްފައިވެއެވެ.
ހުޅަނގު އައްސޭރީގައި ޔަހޫދީން ދެމުންދާ ހަމަލާތަކުގެ ތެރޭގައި ގެދޮރާއި އިމާރާތްތައް ސުންނާފަތިކޮށް ބިމާ ހަމަކުރުމާއި މިސްކިތްތަކުގައި ހުޅުޖެހުމާއި ދަނޑުބިންތައް ހަލާކުކުރުން ހިމެނެއެވެ. އޭގެ ސަބަބުން އެތައް ބައެއްގެ ގެދޮރާއި ބިންތަކާއި އާމްދަނީ ވަނީ ގެއްލިފައެވެ.