ލޯކަލް ކައުންސިލްތަކުގެ އިންތިޚާބުގައި ރަށްވެހިވެފައިވާ ރަށް ނޫން އެހެންތަނެއްގައި ވޯޓުލުމަށް، ރީ-ރަޖިސްޓްރީ ކުރުމުގެ ފުރުޞަތު މާދަމާއިން ފެށިގެން ހުޅުވާލައްވާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
މާލޭގައި ދިރިއުޅޭ އެހެން ރަށްރަށުގެ ރަށްވެހިން ރީ-ރަޖިސްޓްރީ ކުރުމުގެ މަސައްކަތް ކުރިއަށްދާނީ ލޯކަލް ކައުންސިލް އިންތިޚާބުގެ ކަންކަން ބަލަހައްޓަވާ މަރުކަޒު ކަމުގައިވާ ބާޖަމާލުއްދީން ޢިމާރާތުގައެވެ. ރަށްރަށުގައި ދިރިއުޅޭ ފަރާތްތަކުން ރީ-ރަޖިސްޓްރީ ކުރުމުގެ ކަންކަން ކުރިއަށް ގެންދަވާނީ އެރަށެއްގެ ރަށު ކައުންސިލް އިދާރާއިންނެވެ.
ރީ-ރަޖިސްޓްރީ ކުރުމުގެ ފުރުޞަތު މާދަމާ އިން ފެށިގެން މިމަހުގެ 20 ވަނަ ދުވަހުގެ ނިޔަލަށް ކުރިއަށްދާނެ ކަމަށް އިލެކްޝަންސް ކޮމިޝަނުން ވިދާޅުވެއެވެ. ޖެނުއަރީ މަހު ބާއްވަވާ ލޯކަލް ކައުންސިލްތަކުގެ އިންތިޚާބުގައި ރަށްރަށާއި، ރާއްޖެއިން ބޭރުގައާ ސިނާޢީ ސަރަޙައްދުތައް ހިމެނޭ ގޮތުން 470 ވޯޓު ފޮށި ބެހެއްޓެވުމަށް ވަނީ ހަމަޖައްސަވާފައެވެ.