ތުރަބްޒޮންސްޕޯއަށް ސަލާހް ކުޅުނު ފުރަތަމަ މެޗު އެއްވަރު

ޓާކިޝް ސުޕަރ ލިގްގައި ތުރަބްޒޮންސްޕޯއަށް މިޞްރުގެ ކެޕްޓަން މުހަންމަދު ސަލާހް ކުޅުނު ފުރަތަމަ މެޗު އެއްވަރު ވެގެން ނިމިއްޖެއެވެ.

ވޭތިވެދިޔަ 9 ސީޒަންގައި އިންގްލިޝް ޕްރިމިއަރ ލީގުގެ ލިވަޕޫލަށް ކުޅުމަށްފަހު ދާދިފަހުން ތުރަބްޒޮންސްޕޯއަށް ބަދަލުވި ސަލާހް އެޓީމަށް ކުޅުނު ފުރަތަމަ މެޗުގައި ކަސިމްޕާސާ އާއި ބައްދަލުކޮށް ނިމިގެންދިޔައީ އެއް ލަނޑު އެއް ލަނޑުން އެއްވަރު ވެގެންނެވެ. އިސްތަންބޫލްގައި ކުޅުނު މިމެޗްގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ ތުރަބްޒޮންސްޕޯއެވެ. މިލަނޑު އެޓީމަށް ކާމިޔާބު ކޮށްދިނީ ނޯއާ ސަވިއޯލޯއެވެ.

މިމެޗުގައި ކަސިމްޕާސާ މެޗުގެ ނަތީޖާ ހަމަހަމަ ކޮށްފައިވަނީ ދެވަނަ ހާފުގެ ކުރީކޮޅު ލިބުނު ޕެނަލްޓީ އަކުންނެވެ. މިލަނޑު އެޓީމަށް ކާމިޔާބު ކޮށްދިނީ އެޑްރިއަން ބެނެޑީޒަކްއެވެ. ފްރީ ޓްރާންސްފަރއެއްގެ ދަށުން ތުރަބްޒޮންސްޕޯއަށް ބަދަލުވި ސަލާހް މިމެޗުގައި ކުޅެން އަރުވާފައިވަނީ 58 ވަނަ މިނެޓުގައި ބަދަލު ކުޅުންތެރިއެއްގެގޮތުގައެވެ. މިމެޗުގައި ސަލާހް ކުޅުނީ އޭނާ އާންމުކޮށް ކުޅޭ ކަނާތު ވިންގަށެވެ. އަދި މިމެޗުގައި އޭނާވަނީ ލަނޑު ޖަހާނެ ރަނގަޅު ފުރުސަތުތަކެއް އެޓީމަށް ތަނަވަސް ކޮށްދީފައެވެ. ނަމަވެސް މިއިން އެއްވެސް ފުރުސަތެއްގެ ބޭނުން އެޓީމަށް ހިފޭގޮތެއް ނުވިއެވެ.

މެޗަށްފަހު ވާހަކަ ދައްކަމުން ތުރަބްޒޮންސްޕޯގެ ކޯޗު ފާތިހު ޓެކޭ ބުނީ ސީޒަނުގެ ފުރަތަމަ މެޗު ނިމިގެންދިޔައީ އެންމެ ބޭނުންވި ގޮތަކަށް ނޫނެވެ. މިއީ އެޓީމަށް މޮޅުވެވެން ޖެހޭވަރުގެ މެޗެއް ކަމަށާއި ނަމަވެސް އެކަން ވާގޮތް ނުވީކަމަށް އޭނާ ބުންޏެވެ. ފާތިހު ހާމަކުރިގޮތުގައި މިއަންނަ ބުރާސްފަތި ދުވަހަކީ އެޓީމަށް ވަރަށް މުހިންމު ދުވަހެކެވެ. ޓާކިޝް ސުޕަރ ލިގްގެ ތިންވަނަ ޓީމުގެގޮތުގައި މިދިޔަ މިދިޔަ ސީޒަން ނިންމާލި ތުރަބްޒޮންސްޕޯ މިއަންނަ ބުރާސްފަތި ދުވަހުގެރޭ ނިކުންނާނީ ޔުއޭފާ ޔޫރޮޕާ ލީގުގެ ޕްލޭ އޮފްގައި ހަންގޭރީގެ ފެރެންސްވަރޯސް އާއި ދެކޮޅަށެވެ. ފާތިހު ބުނިގޮތުގައި ފެރެންސްވަރޯސް އަކީ އެޓީމަށްވުރެ ހުރިހާ ގޮތަކަކުންވެސް މޮޅު ޓީމެއް ކަމުން އެމެޗު ވަރަށް އުނދަގޫ ވާނެއެވެ.

އުމުރުން 34 އަހަރުގެ ސަލާހް ތުރަބްޒޮންސްޕޯއަށް ސޮއިކޮށްފައިވަނީ މިމަހުގެ ކުރީކޮޅު ދެ އަހަރު ދުވަހުގެ އެއްބަސްވުމެއްގެ ދަށުންނެވެ. މިޞްރުގައި ފުޓްބޯޅައިގެ ރަސްގެފާނުގެ ލަގަބު ހޯދާފައިވާ ސަލާހްވަނީ އޭނާ ލިވަޕޫލަށް ކުޅުނު އިރު އެޓީމާއެކު އިންގްލިޝް ޕްރިމިއަރ ލީގުގެ ތަށި ދެ ފަހަރު ކާމިޔާބު ކުރުމުގެ އިތުރުން ޔުއޭފާ ޗެމްޕިއަންސް ލީގުގެ ތަށިވެސް އެޓީމަށް ހޯދައިދީފައެވެ.