މިނިސްޓްރީ އޮފް ހެލްތުގެ ފްރޮންޓް އޮފީސް ތަރައްޤީ ކުރުމަށްޓަކައި، ޗައިނާ ސަރުކާރުން 80،000 އެމެރިކާ ޑޮލަރުގެ އެހީއެއް ދީފިއެވެ.
މިއީ ޗައިނާ ސަރުކާރުން ރާއްޖޭގެ ޞިއްޙީ ދާއިރާ ތަރައްޤީކުރުމަށްޓަކައި ވެދޭ އެހީގެ ދަށުން، މިނިސްޓްރީ އޮފް ހެލްތުން ޚިދްމަތް ލިބިގަންނަ ޢާއްމުންނަށް ލުއި ފަސޭހަ ގޮތެއްގައި ޚިދްމަތްދެވޭނޭ ފެންވަރަށް، އެމިނިސްޓްރީގެ ފްރޮންޓް އޮފީސް ތަރައްޤީ ކުރުމަށް ޗައިނާ ސަރުކާރުން ވެދިން އެހީއެއްކަމަށް މިނިސްޓްރީ އޮފް ހެލްތުން ވިދާޅުވެއެވެ.
މިފައިސާގެ އެހީ ޙަވާލު ކުރުމަށްޓަކައި މިއަދު ހެލްތު މިނިސްޓްރީގައި ބޭއްވި ރަސްމިއްޔާތުގައި، އެހީއާއި ޙަވާލުވެވަޑައިގެންނެވީ މިނިސްޓަރ އޮފް ހެލްތު އަބްދުﷲ ނާޒިމް އިބްރާހިމްއެވެ. އަދި ފައިސާގެ އެހީ ޙަވާލުކޮށްދެއްވީ ދިވެހި ރައްޖޭގައި ހުންނަވާ ޗައިނާގެ އެމްބެސެޑަރ ވާންގ ފުކާންއެވެ.
ފައިސާގެ އެހީގެ ޗެކާ ޙަވާލުވެވަޑައިގަތުމަށްފަހު ވާހަކަފުޅު ދައްކަވަމުން ހެލްތު މިނިސްޓަރ ވިދާޅުވީ، ޗައިނާ އަކީ ރާއްޖޭގެ ތަރައްޤީގެ ބައިވެރިއެއްކަމަށާއި، ރާއްޖޭގެ ތަރައްޤީއަށް ޗައިނާއިން އަގު ނުކުރެވޭފަދަ އެހީތެރިކަން ފޯރުކޮށްދީފައިވާކަމަށެވެ. އަދި ޚާއްޞަކޮށް ސިއްޙީ ދާއިރާއަށް ވެދެމުން ގެންދާ އެހީ ފާހަގަ ކުރައްވާ ޗައިނާ ސަރުކާރަށް ޝުކުރު އަދާކުރެއްވިއެވެ.
މިނިސްޓަރ ވިދާޅުވީ، ޗައިނާއިން ވެދިން މާލީ އެހީތެރިކަމާއެކު، ހެލްތު މިނިސްޓްރީގެ ފްރޮންޓް އޮފީސް ތަރައްޤީ ކުރުމުގެ މަސައްކަތް 90 ދުވަހުގެ ތެރޭގައި ނިންމަވާލައްވާނޭކަމަށެވެ. އަދި ފްރޮންޓް އޮފީސް ތަރައްޤީކޮށް ޚިދްމަތް ދެއްވަން ފެއްޓެވުމުން، ކައުންޓަރުތަކުން ޢާއްމުންނަށް ދެމުންގެންދާ ޚިދްމަތް އިތުރަށް އަވަސްވެ، ފަސޭހަކަމާއެކު ޚިދްމަތް ލިބޭނޭގޮތް އިންތިޒާމް ފަހިވެގެންދާނޭކަމަށެވެ.
ޗައިނާއިން ރާއްޖެއަށް ޞިއްޙީ ދާއިރާއިން ދީފައިވާ އެހީތެރިކަމަށް ބަލާއިރު،2015 ވަނަ އަހަރު "ބްރައިޓް ޖަރނީ" ގެ ނަމުގައި ބޭއްވި އައި.ކޭމްޕް ފާހަގަކޮށްލެވެއެވެ. މި ކޭމްޕުގައި ކާމިޔާބު ކަމާއެކު 107 މީހެއްގެ ކެޓަރެކްޓް ސަރޖަރީ ހަދާފައިވާއިރު، މިކަމަށް ބޭނުން ކުރި އެންމެހައި ފަންނީ އާލާތްތައް ވަނީ ރާއްޖެއަށް ހަދިޔާ ކޮށްފައެވެ. މިއާލާތްތަކުގެ އަގު 370،000 ޑޮލަރަށްއަރައެވެ.