ހުޅުމާލޭއިން ދޫކޮށްފައިވާ ބިންތަކުގެ ތެރެއިން ތަރައްޤީނުކޮށް ހުރި ބިންތަކަށް ކުނިއަޅަމުންދާކަން ފާހަގަކުރެވޭ ކަމަށާއި، މިމައްސަލަ ޙައްލުކުރުމަށް މަސައްކަތްތަކެއް ކުރަމުން އަންނަކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ބުނެފިއެވެ.
ހުޅުމާލެ ތަރައްޤީކުރުމުގެ މަޝްރޫޢަކީ މިހާތަނަށް ރާއްޖޭގައި ހިންގާ މަޝްރޫޢުތަކުގެ ތެރެއިން އެންމެ ފާހަގަކޮށްލެވޭ، އަދި އެންމެ ބޮޑު އެއް މަޝްރޫޢެވެ. ފަޅެއް ހިއްކައި އެތަނުގެ ފުރަތަމަ ފިޔަވަހި ތަރައްޤީކޮށް، މިހާރު 2 ވަނަ ފިޔަވަހީގެ މަސައްކަތްތައް ކުރިއަށްދާއިރު ހުޅުމާލެއަކީ އެންމެ ބޮޑެތި މަޝްރޫޢުތައް ކުރިއަށްދާ އެއް ރަށަށްވެސްމެއެވެ. ތަރައްޤީގެ މިފަދަ މަޝްރޫޢުތަކާއެކު ހުޅުމާލޭގައި ދިރިއުޅޭ މީހުންނާއި އެތަނަށް ޒިޔާރަތްކުރާ މީހުންވެސް ޢާއްމު އިޖްތިމާޢީ މިންގަޑުތަކަށް ޙުރުމަތްތެރިކޮށް ހިތުމަކީ މުހިއްމު ކަމެކެވެ. އެހެންނަމަވެސް ހުޅުމާލޭގެ ބައެއް ސަރަޙައްދުތަކަށް ކުނިއަޅަމުންދާ މައްސަލަ އެޗްޑީސީން ފާހަގަކުރެއެވެ.
އެޗްޑީސީގެ މުނިސިޕަލް ޑިރެކްޓަރ އިސްމާޢީލް ޝާން ރަޝީދު ވިދާޅުވީ ހުޅުމާލޭގައި ދިރިއުޅުމަށް ދޫކޮށް ތަރައްޤީނުކޮށް ހުރި ގޯތިތަކާއި އެނޫން ބޭނުންތަކުގައި ދޫކޮށްފައިވާ ހުސްބިންތަކަށް ކުނި އަޅަމުންދާކަން ފާހަގަކުރެވޭ ކަމަށެވެ. އަދި ކުނިގޮނޑަށް ކުނިއުކާލުމުގެ ބަދަލުގައި މިގޮތަށް ހުންނަ ހުސްބިންތަކަށްވެސް ކުނިއަޅާކަން ފާހަގަކުރެވިފައިވާކަމަށް އޭނާ ވިދާޅުވިއެވެ. ޝާން ވިދާޅުވީ މިގޮތަށް ހުރި ބިންތަކަށް ކުނި ގިނަވެ، ޞިއްޙީ އެކި މައްސަލަތައްވެސް ދިމާވަމުންދާ ކަމަށެވެ.
މި މައްސަލަތައް ޙައްލުކުރުމުގެ ގޮތުން މިހާރު ހުޅުމާލޭގައި ހުރި ޑަސްބިންތަކުގެ އިތުރަށް އިތުރު ޑަސްބިންތަކެއް ހުޅުމާލޭގައި މައި މަގުތަކުގައި ބެހެއްޓުމަށް އެޗްޑީސީން ވަނީ ނިންމާފައެވެ. ޝާން ވިދާޅުވީ އިތުރަށް ހޯދާ ޑަސްބިންތައް މައި މަގުތަކުގައި ބަހައްޓާނެ ކަމަށެވެ.
ހުޅުމާލެއިން ދޫކުރާ ބިންތަކުގައި ވަށާފާރު ރާނައި، ރައްކާތެރިކޮށް ބެހެއްޓުން ލާޒިމްކުރެއެވެ. އެޗްޑީސީން ބުނީ މިފަދަ ތަންތަންވެސް ބަލައި، މޮނިޓަރކޮށް ސާފުކޮށް ބެލެހެއްޓުމަށް މަސައްކަތް ކުރަމުން އަންނަ ކަމަށެވެ.
މީގެ އިތުރުންވެސް ހުޅުމާލެގައި ހުރި އެކި މައްސަލަތައް ޙައްލުކުރުމަށްވެސް ކަމާބެހޭ ފަރާތްތަކާ ގުޅިގެން ވެސް މަސައްކަތްތައް ކުރަމުން ގެންދާކަމަށް އެޗްޑީސީން ހާމަކުރެއެވެ.