ބެލްގްރޭޑް އެކްސްޕޯގައި ރާއްޖެއިން ބައިވެރިވަނީ

ސަރބިއާގެ ބެލްގްރޭޑުގައި އަންނަ އަހަރު ކުރިއަށްގެންދިއުމަށް ހަމަޖެހިފައިވާ ބެލްގްރޭޑް އެކްސްޕޯގައި ބައިވެރިވުމަށް ވިޒިޓް މޯލްޑިވްސް ކޯޕަރޭޝަން، ވީއެމްސީން އެއްބަސްވެއްޖެއެވެ.

ބެލްގްރޭޑުގައި ބޭއްވި ދެވަނަ އަހަރީ ޕްލޭނިން ބައްދަލުވުމެ ތެރެއިން ބެލްގްރޭޑް އެކްސްޕޯ 2027ގައި ބައިވެރިވުމުގެ އެއްބަސްވުމުގައި ވީއެމްސީގެ ފަރާތުން ސޮއި ކުރެއްވީ ސީއީއޯ އަދި މެނޭޖިންގް ޑައިރެކްޓަރު އިބްރާހިމް ޝިއުރީއެވެ.

"ޕްލޭ ފޯ ހިއުމަނިޓީ: ސްޕޯޓް އެންޑް މިއުޒިކް ފޯ އޯލް" މި ޝިއާރުގެ ދަށުން ބާއްވާ ބެލްގްރޭޑް އެކްސްޕޯ 2027 ކުރިއަށްދާނީ އަންނަ އަހަރުގެ 15 މެއި އިން 15 އޮގަސްޓަށް ބެލްގްރޭޑްގައެވެ. މި ހަރަކާތުގައި 120 އަށްވުރެ ގިނަ ގައުމުން ބައިވެރިވާނެ ކަމަށް ވަނީ ލަފާކޮށްފައެވެ. އަދި ހަތަރު މިލިއަނަށްވުރެ ގިނަ މީހުން ޒިޔާރަތް ކުރާނެ ކަމަށްވެސް ލަފާކުރެއެވެ.

މި އެއްބަސްވުމާއެކު، އެކްސްޕޯގެ އިބްތިދާއީ ޕްލޭނިންގް މަރުހަލާ ނިމި، އަމަލީ ތައްޔާރީތަކުގެ ދެވަނަ މަރުހަލާ ފަށާފައިވާ ކަމަށް ވީއެމްސީން މައުލޫމާތު ދެއްވައެވެ. އެގޮތުން، މީގެ ކުރިން ބޭއްވުނު ބައިނަލްއަގުވާމީ މަޝްވަރާތަކަށް ބިނާކޮށް، ރާއްޖޭގެ ފަތުރުވެރިކަމުގެ ކުރިއެރުމާއި، ތިމާވެށި ރައްކާތެރިކުރުމަށް ކުރާ މަސައްކަތްތަކާއި، ސަގާފަތާއި އަމިއްލަވަންތަކަން ދައްކާލުމަށް ތައްޔާރީތައް ފަށާފައިވާކަމަށް ވިދާޅުވިއެވެ.

މި އެކްސްޕޯއަކީ ބޯލްކަން ސަރަހައްދާއި ވިލާތުގެ މާކެޓުތަކަށް ރާއްޖެ އިޝްތިހާރު ކުރުމަށް ލިބޭ ފުރުސަތެއްކަން ވީއެމްސީން ފާހަގަކުރައްވައެވެ. އަދި ރާއްޖޭގެ ދެމެހެއްޓެނިވި ފަތުރުވެރިކަމާއި ކަނޑުފަޅުތައް ހިމާޔަތްކުރުމަށް ކުރާ މަސައްކަތްތައް ދުނިޔެއަށް ދައްކާލުމުގެ މަގުވެސް މި އެކްސްޕޯގެ ސަބަބުން ފަހިވެގެންދާނެ ކަމަށް ވިދާޅުވިއެވެ.

ވިޒިޓް މޯލްޑިވްސްގެ ސީއީއޯ އިބްރާހިމް ޝިއުރީ ވިދާޅުވީ، އެކްސްޕޯގެ ތައްޔާރީތައް ކުރިއަށްދަނީ ސަރުކާރުގެ ކަމާބެހޭ މުއައްސަސާތަކާ ގުޅިގެން ކަމަށެވެ. އަދި މި އެކްސްޕޯއާއެކު އުފެދިގެންދާނެ ގުޅުންތަކުގެ ސަބަބުން ފަތުރުވެރިކަމާއި، ސަގާފަތާއި، ދެމެހެއްޓެނިވި ތަރައްގީ އަދި ގައުމީ އަމިއްލަވަންތަކަން އެއް މަންސައަކުން ދުނިޔެއަށް ދައްކާލުމަށް ފަސޭހަވެގެންދާނެކަމަށް ޝިއުރީ ވިދާޅުވިއެވެ.

ވިޒިޓް މޯލްޑިވްސް އިން ދެން ކުރިއަށްގެންދާނީ އެކްސްޕޯގެ އިންތިޒާމު ކުރާ ކޮމިޓީއާ ގުޅިގެން ރާއްޖޭގެ ޕެވިލިއަން ފަރުމާކުރުމާއި ހަރަކާތްތައް ރޭވުމުގެ މަސައްކަތް ކަމަށް އެ ކުންފުނިން ވިދާޅުވިއެވެ. މިއީ ވިލާތުގެ މާކެޓުތަކުގައި ރާއްޖޭގެ މަގުބޫލުކަން ދެމެހެއްޓުމަށާއި، ދުނިޔޭގެ ފެންވަރުގައި ރާއްޖޭގެ ފަތުރުވެރިކަމާއި ތިމާވެށީގެ މަސައްކަތްތައް އިޝްތިހާރު ކުރުމަށް އެޅޭ މުހިންމު ފިޔަވަޅެއްކަން ވީއެމްސީން ފާހަގަކުރެއްވިއެވެ.