މެދުއިރުމަތީގައި ޙަރަކާތްތެރިވާ އެމެރިކާގެ ހަނގުރާމަމަތީ މަނަވަރުތަކާއި މަތިންދާބޯޓުތައް އޮތް ސަރަޙައްދުތައް ހިމެނޭހެން ޙަމަލާ ދޭންވީ އަމާޒުތަކާ ބެހޭ ޖާސޫސީ މަޢުލޫމާތު ރަޝިޔާއިން އީރާނާއެކު ޙިއްޞާ ކުރަމުންދާ ކަމަށް ބައެއް މަސްދަރުތަކުން ބުނެފިއެވެ.
ރަޝިޔާއިން އީރާނަށް އެހީތެރިވަމުން ދަނީ ކިހާ މިންވަރަކަށް ކަން މިހާތަނަށް ސާފުވެފައެއް ނުވެއެވެ. ނަމަވެސް ރަޝިޔާއިން އީރާނަށް އެހީތެރިވަމުންދާ ކަމުގެ އަޑުތައް ގަދަވެފައި މި ވަނީ މިދިޔަ ހަފްތާއިން ފެށިގެން ޔަހޫދީންނާ ގުޅިގެން އެމެރިކާއިން އީރާނަށް ދެމުންދާ ޙަމަލާތަކުގެ ސަބަބުން އެމެރިކާގެ އުޅަނދުތައް ހޯދުމަށް އީރާނުގެ އަސްކަރިއްޔާއަށް ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައެވެ.
އެމެރިކާ އާއި ޔަހޫދީން ގުޅިގެން އީރާނަށް ދެމުންދާ ވަރުގަދަ ޙަމަލާތަކުގައި މިހާތަނަށް 1،000އަށް ވުރެ ގިނަ މީހުން ވަނީ ޝަހީދުވެފައެވެ. އޭގެތެރޭގައި އީރާނުގެ ރޫޙީ ވެރިޔާ އާޔަތުﷲ ޢަލީ ޚާމަނާއީ އާއި އެމަނިކުފާނުގެ ޢާއިލާގެ މެމްބަރުންތަކެއް ވެސް ހިމެނެއެވެ. އެ ޢުދުވާނުގެ ރައްދުގައި އީރާނުން ވެސް ދަނީ ހުއްޓުމެއްނެތި ޔަހޫދީންގެ ނިރުބަވެރި ދަޢުލަތުގެ އިތުރުން މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ތިބޭ މަރުކަޒުތަކަށް ޢަމާޒުކޮށް ވަރުގަދަ ޙަމަލާތައް ދެމުންނެވެ. އީރާނުގެ ޙަމަލާތަކުގައި އެމެރިކާގެ ހަ ސިފައިން މިހާތަނަށް މަރުވެފައިވެއެވެ. ކުރިއަށް އޮތް ދުވަސްތަކުގައި އެމެރިކާގެ އިތުރު ސިފައިން މަރުވުމުގެ ފުރުޞަތު އޮތް ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވަނީ ވިދާޅުވެފައެވެ.
ރަޝިޔާގެ ރިޔާސީ ގަނޑުވަރު، ކްރެމްލިނުން ވަނީ އީރާނުގެ އިސްވެރިންނާއެކު އެ ޤައުމުން މުއާމަލާތު ކުރަމުންދާ ކަމަށް ބުނެފައެވެ. ރަޝިިޔާއިން އީރާނަށް އެހީތެރިވޭތޯ ސުވާލު ކުރުމުން އެ ސުވާލަށް ކްރެމްލިނުން ޖަަވާބު ދީފައެއް ނުވެއެވެ.
އީރާނު ހަނގުރާމައިގެ ސަބަބުން ރަޝިޔާއަށް ވެސް ދަނީ ފައިދާތަކެއް ކުރަމުންނެވެ. އެ ގޮތުން ރަޝިޔާގެ ތެލާއި ގޭހަށް އޮންނަ ޑިމާންޑު މި ދުވަސްވަރު ވަނީ އިތުރުވެފައެވެ. ޔޫކްރެއިންއާއި ރަޝިޔާއާ ދެމެދު ކުރަމުންދާ ހަނގުރާމައިގެ ސަބަބުން ރަޝިޔާގެ ތެލާއި ގޭހުގެ ދާއިރާއަށް ކުރަމުންދިޔަ ނޭދެވޭ އަސަރު ފޫބެއްދުމަށް އެ ޤައުމަށް ވަނީ ފުރުޞަތެއް ލިބިފައެވެ.
ޔޫކްރެއިން-ރަޝިޔާ ހަނގުރާމައިގައި އެމެރިކާއިން ވެސް ވަނީ ޔޫކްރެއިންއަށް ޖާސޫސީ މަޢުލޫމާތު ފޯރުކޮށްދީފައެވެ.