ޔުނިޓީ ފުޓްސަލް ޗެލެންޖު، 9 ޓީމާއެކު ފަށަނީ
-
މިއީ މި މުބާރާތުގެ ދެވަނަ އެޑިޝަން
-
މުބާރާތުގެ ޗެމްޕިއަން ޓީމަށް 50،000ރ ގެ ފައިސާގެ އިނާމެއް ލިބޭނެ
-
ރަނަރަޕް ޓީމަށް 20،000ރ ގެ ފައިސާގެ އިނާމެއް ލިބޭނެ
އައްޑޫ ސިޓީގައި ބާއްވާ އެންމެ ބޮޑު އެއް ފުޓްސަލް މުބާރާތް، ޔުނިޓީ ފުޓްސަލް ޗެލެންޖުގެ ދެވަނަ އެޑިޝަންގެ މެޗުތައް މިރޭ ފަށާނެއެވެ.
ޝީޝާ ޔުނިޓީ ފުޓްސަލް ޗެލެންޖު 2026 ގެ ނަމުގައި ކުރިއަށް ގެންދާ މި މުބާރާތަކީ، އައްޑޫ އަތޮޅުގެ ހުރިހާ ރަށަކުން ވެސް ޓީމުތަކަށް ބައިވެރިވެވޭގޮތަށް ހުޅުވާލައިގެން ކުރިއަށް ގެންދާ މުބާރާތެކެވެ.
މި މުބާރާތުގައި ޖުމްލަ ނުވަ ޓީމަކުން ވަނީ ބައިވެރިވެފައެވެ.
މުބާރާތް ކުރިއަށް ދާނީ 9 ޓީމު ދެ ގުރޫޕަކަށް ބަހާލައިގެންނެވެ. ގްރޫޕް އޭގައި ފަސް ޓީމު ހިމެނޭއިރު ގްރޫޕް ބީގައި ހިމެނެނީ ހަތަރު ޓީމެވެ.
ގްރޫޕް ސްޓޭޖުގެ މެޗުތައް ނިމި ކޮންމެ ގުރޫޕަކުން ވެސް އެންމެ މަތިން ޕޮއިންޓު ހޯދާ ދެ ޓީމެއް މުބާރާތުގެ ސެމީ ފައިނަލަށް ދަތުރުކުރާނެއެވެ.
މުބާރާތުގެ ޗެމްޕިއަން ޓީމަށް 50،000ރ ގެ ފައިސާގެ އިނާމެއް ހުށަހަޅާފައިވާއިރު ރަނަރަޕް ޓީމަށް 20،000ރ ގެ ފައިސާގެ އިނާމެއް ވަނީ ހުށަހަޅާފައެވެ.
މުބާރާތުގެ ފައިނަލް މެޗު އޮންނާނީ މި މަހުގެ 18 ވަނަ ދުވަހުއެވެ. މި މުބާރާތުގެ ހުރިހާ މެޗެއް ކުޅޭނީ އައްޑޫ ހިތަދޫ، ފުޓުބޯޅަ ދަނޑުގައި އޮންނަ ފުޓްސަލް ޕިޗުގައެވެ.
އައްޑޫއަށް ނިސްބަތްވާ ކުޅުންތެރިން ކުރިއެރުވައި ފުރުސަތު ދިނުމުގެ ބޮޑު އަޒުމެއްގައި ކުރިއަށް ގެންދާ މި މުބާރާތުގައި، ރަށުން ބޭރު ތިން ކުޅުންތެރިން ކޮންމެ ޓީމަކަށް ވެސް ޓީމު ލިސްޓުގައި ޖެހުމުގެ ފުރުސަތު އޮންނާނެއެވެ.
މި މުބާރާތަކީ ޔުނިޓީ ފައުންޑޭޝަނުން ކުރިއަށް ގެންދާ މުބާރާތެކެވެ. މުބާރާތުގެ ފުރަތަމަ އެޑިޝަން ކުރިއަށް ގެންގޮސްފައި ވަނީ މިދިޔަ އަހަރުއެވެ.
މި މުބާރާތުގެ ފުރަތަމަ އެޑިޝަންގެ ފައިނަލް މެޗު، ޕީއެސްއެމްގެ "ޔެސް ޓީވީ" އިން ވަނީ ވަގުތުން ދުރަށް ދައްކާފައެވެ. މުބާރާތުގެ ފުރަތަމަ އެޑިޝަންގެ ޗެމްޕިއަންކަން ހޯދީ ކުލަބު ރަސްގެދަރަ އިންނެވެ.
ރަސްގެދަރަ މުބާރާތުގެ ޗެމްޕިއަންކަން ހޯދީ ފައިނަލް މެޗުގައި އެސްކޭޕީ ޔުނައިޓެޑް ބަލިކޮށްގެންނެވެ.