ޕެލަސް އަތުންވެސް ބަލިވެ ޓޮޓެންހަމްއަށް އިތުރު ހާސްކަން

އިނގިރޭސި ޕްރިމިއަރ ލީގުގައި ކްރިސްޓަލް ޕެލަސް އަތުން ވެސް ބަލިވެ، ލީގުގައި ޓޮޓެންހަމް ޖެހިޖެހިގެން ފަސް މެޗުން ބަލިވެ އިތުރު ހާސްކަމާ ކުރިމަތިލާން ޖެހިއްޖެއެވެ.

އަމިއްލަ ދަނޑުގައި ކުޅެ މި މެޗުން ޓޮޓްނަމް ބަލިވީ 1-3 ގެ ނަތީޖާއަކުންނެވެ. މެޗު ފަށައިގެން ފުރަތަމަ ލަނޑުޖަހައި ލީޑުނެގީ ވެސް ޓޮޓްނަމް އިންނެވެ. 34 ވަނަ މިނެޓުގައި މިކީ ވެން ޑި ވެން ތަނަވަސްކޮށްދިން ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ ޑޮމިނިކް ސޮލަންކީއެވެ.

ޕެލަސް އިން މެޗުގެ ނަތީޖާ ހަމަހަމަކުރީ ލިބުނު ޕެނަލްޓީއެއްގައި، މެޗުގެ 40 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އިސްމާއިލާ ސާ އެވެ. ކްރިސްޓަލް ޕެލަސް އިން ވަނީ މި ހާފުގެ 45 މިނެޓުގެ ކުޅުން ހަމަވެ ދެއްކި އިތުރުވަގުތުގެ ތެރޭގައި އިތުރު ދެ ލަނޑު ޖަހާފައެވެ.

އެގޮތުން އިތުރުވަގުތުގެ ފުރަތަމަ މިނެޓުގައި ޔާގެން ސްޓްރޭންޑް ލާސެންގެ ލަނޑުން ޕެލަސް އިން ފުރަތަމަ ފަހަރަށް މެޗުގައި ލީޑުނެގިއިރު، އޭގެ ހަ މިނެޓުފަހުން، އިތުރުވަގުތުގެ ހަތްވަނަ މިނެޓުގައި އިސްމާއިލާ ސާ ވަނީ ޓޮޓްނަމް އަށް އިތުރު ލަނޑެއް ޖަހައިދީ ލީޑު ފުޅާކޮށްދީފައެވެ.

މެޗުގެ ހާފް ޓައިމްގައި ޓޮޓްނަމްގެ އެތައް ހާސް ސަޕޯޓަރުންތަކެއް ވަނީ ދަނޑު ދޫކޮށް ގޮސްފައެވެ. މި މެޗު ހިމަނައިގެން އެންމެފަހުން ކުޅުނު ފަސް މެޗުން ވެސް ޓޮޓްނަމް ބަލިވެފައިވާއިރު އެ ޓީމަށް އޮތް ހާސްކަމަކީ، ރެލިގޭޝަންގެ ބިރެވެ.

ޓޮޓްނަމް އާއި ރެލިގޭޝަން ޒޯނުގައި އޮތް ވެސްޓް ހަމް ވެސް ޖުމްލަ 29 މެޗު ކުޅެފައިވާއިރު، އެ ދެ ޓީމުގެ ދެމެދުގައި އޮތީ އެންމެ ޕޮއިންޓެއްގެ ފަރަގެވެ. އެހެންކަމުން މިހާރު ޓީމުން ދައްކަމުންދާ ކުޅުން ރަނގަޅު ނުކުރެވިއްޖެނަމަ، 1978 ވަނަ އަހަރަށްފަހު ޓޮޓްނަމް އަށް އިނގިރޭސި ފުރަތަމަ ޑިވިޝަނުން ޖާގަ ގެއްލުމުގެ ބިރު ބޮޑެވެ.

ޓޮޓްނަމްއަށް ކުރިއަށް ދެން އޮތީ ޔޫއެފާ ޗެމްޕިއަންސް ލީގުގައި އެތުލެޓިކޯ މެޑްރިޑާ ދެކޮޅަށް ނުކުންނަން އޮތް މެޗެވެ. އެއީ މި މަހުގެ 11 ވަނަ ދުވަހުއެވެ. އެއަށްފަހު 15 ވަނަ ދުވަހު ޓޮޓްނަމް އިން ލީގުގައި ލިވަޕޫލާ ދެކޮޅަށް ނުކުންނާނެއެވެ.