ތަފާސްހިސާބުތަކާއި އަދަދުތަކުން މުހިންމު މައުލޫމާތުތަކެއް

ސަރުކާރުގެ އެންމެ އިސް ވާޖިބަކީ އެ ސަރުކާރެއް ނިސްބަތްވާ ރައްޔިތުންނަށް ދިރިއުޅުމުގެ ފެންވަރު މަތިކޮށްދީ ރައްޔިތުންނަށް ބޭނުންވާ އެކި ޚިދުމަތްތައް ވީ އެންމެ ފުރިހަމައަށް ފޯރުކޮށްދިނުމެވެ. މި ޒިންމާ އެންމެ ރަނގަޅަށް އަދާކުރެވޭނީ، ސަރުކާރަކުން ކުރަމުންދާ މަސައްކަތް އެކަށީގެންވާ ގޮތެއްގައި އެ ރައްޔިތުންނަށް ލިބިގެންނެވެ. ނޫސްވެރިން އަދާކުރަނީ މި ދައުރެވެ.

މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ތަފާތު އެކި ދައިރާތަކުން ތަފާސްހިސާބުތައް ހިއްސާކޮށްދެއްވިއެވެ. އޭގެ ތެރެއިން ފާހަގަކޮށްލެވުނު އެއް ތަފާސްހިސާބަކީ ސަރުކާރުން މީޑިއާއާއި ބޭއްވި ގާތް ގުޅުން ހާމަކޮށް ހިއްސާކޮށްދެއްވި ތަފާސްހިސާބެވެ. ސަރުކާރުގެ އިދާރާތަކުން މައުލޫމާތު ދިން އެކަންޏެއް ނޫނެވެ.

ވަޒީރުންގެ ފެންވަރުގައި މައުލޫމާތު ފޯރުކޮށްދިނުމާއި ކަންކަން ސާފުކޮށްދިނުމަށް މަސައްކަތް ކުރެވިފައިވާކަން ހާމަކޮށްދިނެވެ. ބޭރުގެ މީޑިއާތައް ހިމެނޭހެން އެމަނިކުފާނުގެ ކެބިނެޓުގައި ހިމެނިވަޑައިގަންނަވާ ވަޒީރުން 424 ފަހަރު އެކި މީޑިއާތަކަށް މައުލޫމާތު ދެއްވާފައިވެއެވެ. ޚުދު ރައީސުލްޖުމްހޫރިއްޔާވެސް މިކަމުން އިސްތިސްނާ ނުވާކަން އެނގެނީ، ނޫސްވެރިންގެ ސުވާލުތަކަށް ޖަވާބު ދެއްވުމަށް މުޅި އެއް ދުވަސް ހާއްސަކުރައްވާ އެކަމުގެ ރެކޯޑެއް ހެއްދެވީމައެވެ. ގާތްގަނޑަކަށް 15 ގަޑިއިރު ނޫސްވެރިންގެ ސުވާާލުތަކަށް ޖަވާބު ދެއްވުމުގައި އެމަނިކުފާނު ހޭދަ ކުރެއްވިއެވެ.

ނިމިދިޔަ 2025 ވަނަ އަހަރު އެމަނިކުފާނާއި ސަރުކާރުން ނޫސްވެރިންނާއި ބެހެއްޓެވި ގާތްކަން ދަމަހައްޓައި އިތުރަށް ގުޅުން ބަދަހިކުރުމަށް މިއަހަރު ވަނީ އަމާޒު ހިފާފައެވެ. މިއަހަރުގެ ރިޔާސީ ބަޔާނުގައި އެކަން ފާހަގަކުރެއްވިއެވެ.

"މީޑިއާއާ އަޅުގަނޑު ބާއްވަމުން އަންނަ ގާތް ރަޙްމަތްތެރި ގުޅުން އިތުރަށް ގާތްކުރުމަށްޓަކައި، މީޑިއާއަށް ސީދާ އަޅުގަނޑު މަޢުލޫމާތު ދިނުމުގެ ގޮތުން، މި އަހަރުގެ މާރިޗު މަހުން ފެށިގެން، ޢާންމު އުސޫލެއްގެ މަތިން، އިރާދަކުރެއްވިއްޔާ ކޮންމެ ހަފްތާއެއްގެ ހޯމަ ދުވަހު ހެނދުނު 10:00 ން 11:00 އަށް ނޫސްވެރިންނާ އަޅުގަނޑު ބައްދަލުކުރާނަން.... ހަމައެހެންމެ، މި އަހަރުގެ މާރިޗު މަހުން ފެށިގެން، ކެބިނެޓުގެ ކޮންމެ ވަޒީރަކުވެސް ހަފްތާއަކު އެއްފަހަރު އެއްގަޑިއިރަށް ނޫސްވެރިންނާ ބައްދަލުކުރައްވާނެ. " ރައީސުލްޖުމްހޫރިއްޔާ ވިދާޅުވިއެވެ.

ހާއްސަ ހާލަތެއް މެދުވެރިވެގެން ނޫނީ، މި ގުޅުން ދަމަހައްޓަވާނެ ކަމަށް އެމަނިކުފާނު ހާމަކުރައްވާފައިވާއިރު، އެމަނިކުފާނު ވިދާޅުވި ގޮތަށް މިމަސައްކަތް ފައްޓަވައި ދެއްވިއެވެ. މާރިޗު މަހުގެ ދެވަނަ ދުވަހު ފުރަތަމަ ބައްދަލުވުން ބޭއްވެވިއެވެ. ނޫސްވެރިންގެ ފުރަތަމަ ބައްދަލުވުމުގައި ރައީސުލްޖުމްހޫރިއްޔާވަނީ، ރާއްޖޭގެ އިޤްތިޞާދީ ހާލަތާއި، ރައްޔިތުންގެ ދިރިއުޅުމާއި ގުޅުންހުރި އަސާސީ މުހިންމު އެތައް މައުލޫމާތެއް ހިއްސާ ކުރައްވާފައެވެ.

“ދަރަނި ދެއްކުމަށް އެއްވެސް ކަންބޮޑުވުމެއް ނެތް، އިޤްޞިދު މެނޭޖްކުރަމުން މި ދަނީ ބޭރަށް ދައްކަން ޖެހޭ ދަރަނި އާއި އެތެރޭގެ ދަރަނި ދެއްކޭގޮތަށް،" ރައީސް ވިދާޅުވިއެވެ.

ކަން ދިމާކުރި ގޮތުން މެދުއިރުމަތީގެ މަސްރަހު ގޯސްވެ، ޤައުމަށް އޭގެ އަސަރު ކުރަމުން ދިޔަ ދަނޑިވަޅެކެވެ. އެހެންކަމުން މި ފުރުސަތު ބޭނުން ހިއްޕަވައި ސަރުކާރުން ރައްޔިތުންނަށް ދޭން ޖެހޭ ޔަޤީންކަން ދެއްވިއެވެ. ޤައުމުގެ ހާލަތާއި ސަރުކާރުގެ ސިޔާސަތުތަކާއި މަސައްކަތްތަކާއި ގުޅޭގޮތުން ނޫސްވެރިން ކުރަން ބޭނުންވި ސުވާލުތަކަށް އެމަނިކުފާނު ޖެހިލުމެއް ނެތި ޖަވާބު ދެއްވިއެވެ.

އެމަނިކުފާނަށް ފަހު މިހާތަނަށް ކެބިނެޓުގައި ހިމެނިވަޑައިގަންނަވާ ވަޒީރުންގެ ތެރެއިން 11 ބޭފުޅަކު ނޫސްވެރިންނާއި އެކު ގަޑިއެއްހާއިރު ހޭދަކުރައްވައިިފިއެވެ. އެ ބޭފުޅުންގެ ވުޒާރާގެ މަސައްކަތްތަކުގެ އަދާހަމަ ގެނެސްދިނުމާއި، މިވަގުތު ޤައުމުގެ ހާލަތާއި ގުޅިގެން އެބޭފުޅުން ކުރައްވާ މަސައްކަތް ހިއްސާކޮށްދެއްވިއެވެ. އެ ދުވަހަކަށް ސީދާ ކަނޑައެޅިފައިވާ މައުޟޫޢުއަށް ނުވިނަމަވެސް މަޢުޟޫގެ ބޭރުންވެސް ޖަވާބުދާރީ ވެވޭނެ ސުވާލުތަކަށް ޖަވާބުދާރީ ވިއެވެ. ރައްޔިތުންނަށް ކޮންމެހެން އެނގެންޖެހޭ ފުރިހަމަ މައުލޫމާތު ދިނުމުގެ ބޭނުމުގައެވެ.

މިހާތަނަށް ނޫސްވެރިންގެ ބައްދަލުވުން ބޭއްވެވި ވަޒީރުން

1. ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު
2. އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒިރު މުޙައްމަދު ސަޢީދު
3. ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރްޔަމް މާރިޔާ
4. މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވަޒީރު ޑރ. އަލީ ހައިދަރު އަހުމަދު
5. މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް
6. އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު
7. ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން
8. ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙްސާން
9. ޞިއްޙީ ވަޒީރު ޢަބްދުﷲ ނާޒިމް އިބްރާހީމް
10. ޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު
11. ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް

ކޮންމެ ވަޒީރަކު ގަޑިއެއްހާއިރުގެ ވަގުތު ހުސްކޮށްލަ ދެއްވާ ވަޑައިގަނެ ރައްޔިތުންނާއި މަޢުލޫމާތު ހިއްސާކޮށްދެއްވަން ކުރާ މަސައްކަތުން ރައީސުލްޖުމްހޫރިއްޔާ އަދި ސަރުކާރުގެވެސް ވިސްނުން ސާފުވެއެވެ. ރައްޔިތުންނަށް އޮޅޭގޮތަށް އެއްވެސްކަމެއް ނުބަހައްޓާ، ދެފުށްފެންނަ ސާފު ވެރިކަމުގެ ނިޒާމެއްގެ ތެރެއިން ވެރިކަން ހިންގުމުގެ އިޙްލާސްތެރި ނިޔަތް އޮތްކަން ސާބިތުކޮށްދިނުމެވެ.