އެފްއޭ ކަޕް: އޮޑިއާއި ނިއު ވާދަކުރާއިރު މާޒިޔާ ނުކުންނާނީ ބުރާ ދެކޮޅަށް

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވާ އެންމެ ޝަރަފުވެރި އެއް މުބާރާތް ކަމުގައިވާ އެފްއޭ ކަޕުގެ ގުރު ނަގައިފިއެވެ.

ގަލޮޅު ދަނޑުގައި ގުރުނެގުމުގެ ރަސްމިއްޔާތު ބާއްވާފައިވާއިރު، މި މުބާރާތުގައި ވާދަކުރާނީ އަށް ޓީމެވެ.

އެއީ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ލީގު ރަނަރަޕް އަދި ޕްރެޒިޑެންޓްސް ކަޕުގެ ޗެމްޕިއަން އޮޑި ސްޕޯޓްސް ކުލަބާއި ނިއުރޭޑިއަންޓް ސްޕޯޓްސް ކުލަބު އަދި ބުރު ސްޕޯޓްސް ކުލަބުގެ އިތުރުން ކްލަބް އީގަލްސް، ވިކްޓްރީ ސްޕޯޓްސް ކުލަބު، ޓީސީ ސްޕޯޓްސް ކުލަބު އަދި ބްލޫ ސްޕޯޓްސް ކުލަބެވެ.

މުބާރާތުގެ ކުއާޓަރފައިނަލުގެ ފުރަތަމަ މެޗުގައި ބައްދަލުކުރާނީ ކްލަބް އީގަލްސްއާއި ބްލޫ ސްޕޯޓްސް ކުލަބެވެ. އެއީ އޭޕްރިލް މަހުގެ 10 ވަނަ ދުވަހުއެވެ. ހަމަ އެ ދުވަހު ކުޅޭ މުބާރާތުގެ ކުއާޓަރފައިނަލު ދެވަނަ މެޗުގައި ނުކުންނާނީ އޮޑި ސްޕޯޓްސް ކުލަބާއި ވާދަވެރި ނިއުރޭޑިއަންޓެވެ.

މުބާރާތުގެ ކުއާޓަރ ފައިނަލުގެ ތިންވަނަ މެޗުގައި ވިކްޓްރީއާއި ޓީސީ ބައްދަލުކުރާއިރު ކުއާޓަރފައިނަލު ފަހު މެޗުގައި ނުކުންނާނީ މާޒިޔާ އާއި ބުރު ސްޕޯޓްސް ކުލަބެވެ. މި މެޗުތައް އޮންނާނީ 11 އޭޕްރިލްގައެވެ.

ނޮކްއައުޓް އުސޫލުން ކުރިއަށްދާ މި މުބާރާތުގައި ސެމީ ފައިނަލް މެޗުތައް ކުޅޭނީ 15 އޭޕްރިލްގައެވެ.

ސެމީގެ ފުރަތަމަ މެޗުގައި ބައްދަލުކުރާނީ އޮޑިއާއި ނިއު ބައްދަލުކުރާ މެޗުން މޮޅުވާ ޓީމަކާއި ބްލޫ ސްޕޯޓްސް ކުލަބާއި ކްލަބް އީގަލްސްގެ ކުރިަމަތިލުމުން ކުރިހޯދާ ޓީމެކެވެ. ސެމީގެ ދެވަނަ މެޗުގައި ވާދަކުރާނީ މާޒިޔާއާއި ބުރުގެ ކުރިމަތިލުމުން ކުރިހޯދާ ޓީމަކާއި ވިކްޓްރީއާއި ޓީސީ ބައްދަލުކުރާ މެޗުން މޮޅުވާ ޓީމެކެވެ. މުބާރާތުގެ ފައިނަލް މެޗު އޮންނާނީ މި މަހުގެ 18 ވަނަ ދުވަހުއެވެ.

އެންމެފަހުން ރާއްޖޭގައި އެފްއޭ ކަޕް ކުޅެފައި ވަނީ 2022 ވަނަ އަހަރުއެވެ. އެފަހަރުގެ މުބާރާތް ކާމިޔާބުކުރީ މާޒިޔާ އިންނެވެ. އެކި ސަބަބުތަކާ ހުރެ އެފަހުން އަދި އެފްއޭ ކަޕް ބޭއްވިފައެއް ނުވެއެވެ.

އެފްއޭ ކަޕްގެ އެންމެ ކާމިޔާބު ޓީމެއްގެ ގޮތުގައި ފާޙަގަކުރެވެނީ ނިއުރޭޑިއަންޓެވެ. ނިއުއިން ޖުމްލަ 12 ފަހަރު މި މުބާރާތް ކާމިޔާބުކުރިއިރު، ދެ ފަހަރަށް އެ މުބާރާތުގެ ތަށި މިލްކުކޮށްފައިވެސް ވެއެވެ.