ޕްރިމިއަރ ލީގުގައި ބްރައިޓަންއާ ދެކޮޅަށް ކުޅެ މޮޅުވި މެޗުގައި އާސެނަލް އިން ގަސްތުގައި ވަގުތު ބޭކާރުކުރީކަމަށް ބުނެ ބްރައިޓަންގެ ކޯޗު ކުރި ތުހުމަތުތަކަށް އާސެނަލްގެ ކޯޗު މިކެލް އާޓެޓާ އިންކާރުކޮށްފިއެވެ.
މި މެޗުން އާސެނަލް މޮޅުވީ 0-1 ގެ ނަތީޖާއަކުންނެވެ. މެޗަށްފަހު ބްރައިޓަންގެ ކޯޗު ފެބިއަން ހާޒެލާ ވަނީ، ވަގުތު ބޭކާރުކުރި ކަމަށް ބުނެ އާސެނަލްއަށާއި ކޯޗު އާޓެޓާއަށް ބޮޑެތި ފާޑުކިޔުންތަކެއް އަމާޒުކޮށްފައެވެ.
މިކަމާ ގުޅިގެން އާޓެޓާ ވަނީ އާސެނަލްގެ ކުޅުންތެރިން ދިފާއުކޮށް، ފެބިއަން ކުރި ތުހުމަތުތައް ދޮގުކޮށްފައެވެ. އާޓެޓާ ބުނީ، މެޗުތަކުގައި އާސެނަލްގެ ކުޅުންތެރިން ދައްކާ ވާދަވެރިކަން އެއީ ނުހަނު އުފާވާ ކަމެއް ކަމަށާއި، ކުޅުންތެރިން ދެކެ ނުހަނު ލޯބިވާ ކަމަށެވެ. އަދި އިދިކޮޅު ޓީމުތަކުގެ ކޯޗުންނާއި ފާޑުކިޔާ ފަރާތްތަކުން ވެސް އާސެނަލް ކުޅުންތެރިން ދެކެ ވަރަށް ބޮޑަށް ލޯބިވާކަމަށް، އެ މީހުންގެ އަމަލުތަކުން ހީވާކަމަށް އާޓެޓާ ބުންޏެވެ.
އެފަދަ ފަރާތްތަކުން އަބަދުވެސް އާސެނަލްގެ ކުޅުންތެރިންގެ ވާހަކަދައްކާ ކަމަށާއި އެފަދަ ކޮންމެ ފަހަރަކު، އެމީހުން އެ ކުޅުންތެރިންދެކެ ހާދަ ލޯބިވެޔޭ ހިތަށްއަރާކަމަށް ބުނެ އާޓެޓާ ވަނީ ފާޑުކިޔާ ފަރާތްތަކަށް މަޖާޒީ ގޮތަކަށް ރައްދުދީފައެވެ.
ސެޓް ޕީސްތަކުގެ އެހީގައި ހޯދާ މޮޅުތަކުގެ ވާހަކައާއި ވަގުތު ބޭކާރުކުރާކަމުގެ ތުހުމަތުތައް ކުރެވުނު ނަމަވެސް އާސެނަލް އިން ދަނީ އެތައް އަހަރެއް ފަހުން ޕްރިމިއަރ ލީގުގެ ތަށި އުފުލާލުމަށް ދެކޭ ހުވަފެނަށް ބޮޑު އުއްމީދެއް ހޯދާފައެވެ.
އާސެނަލް މިވަގުތު ލީގު ތާވަލުގެ އެއްވަނައިގައި އޮތީ 30 މެޗުން 67 ޕޮއިންޓާއެކުއެވެ. ދެވަނައިގައި އޮތް ސިޓީއާއި އާސެނަލްއާ ދެމެދު ހަތް ޕޮއިންޓުގެ ފަރަގެއް އެބައޮތެވެ. އެހެންނަމަވެސް ސިޓީ ދެވަނައިގައި 60 ޕޮއިންޓާއެކު އޮތީ އެއް މެޗު މަދުން ކުޅެއެވެ.