އިނގިރޭސި ޕްރިމިއަރ ލީގުގައި ބްރައިޓަންއާ ދެކޮޅަށް ކުޅުނު މެޗުގައި އާސެނަލްގެ ކުޅުންތެރިން ރީތި ފުޓުބޯޅައެއް ކުޅުމުގެ ބަދަލުގައި އުޅުނީ ވަގުތު ބޭކާރުކުރަން ކަމަށް ބްރައިޓަންގެ ކޯޗު ފެބިއަން ހާޒެލާ ބުނެފިއެވެ.
ބްރައިޓަންގެ ދަނޑުގައި 31,575 ސަޕޯޓަރުންގެ ކުރިމަތީގައި ކުޅުނު މި މެޗުން އާސެނަލް މޮޅުވީ 0-1 ގެ ނަތީޖާއަކުންނެވެ.މި މެޗަށްފަހު ވާހަކަދައްކަމުން ބްރައިޓަންގެ ކޯޗު ވަނީ އާސެނަލްއަށް ބޮޑެތި ފާޑުކިޔުންތަކެއް އަމާޒުކޮށްފައެވެ.
ކޯޗު ފެބިއަން ހާޒެލާ ބުނީ މެޗުގައި ފުޓުބޯޅަ ކުޅެން އުޅުނީ އެންމެ ޓީމެއް ކަމަށާއި އާސެނަލް އިން މަސައްކަތްކުރީ މެޗުގެ ވަގުތު ބޭކާރުކުރަންކަމަށް އޭނާ ބުންޏެވެ. މި މެޗަށް އާސެނަލްއިން އައީ ވެސް، ރީތި ފުޓުބޯޅައެއް ކުޅުމުގެ ބަދަލުގައި، ވަގުތު ބޭކާރުކޮށް، ސަޕޯޓަރުން މުނިފޫހިފުލުވުމުގެ "ޕްލޭނެއް" ގައި ކަމަށް އޭނާ ތުހުމަތުކުރިއެވެ.
ފެބިއަން ހާޒެލާ ވަނީ އާސެނަލްގެ ކޯޗު، މިކެލް އާޓެޓާއަށް ވެސް ފާޑުކިޔުންތަކެއް އަމާޒުކޮށްފައެވެ. އެގޮތުން، ދުވަހަކު ވެސް މެޗަކުން މޮޅުވާން، ވަގުތު ބޭކާރުކޮށްގެން "ހަޑި ފުޓުބޯޅަ" އެއް ކުޅެން ކުޅުންތެރިންނަށް އިރުޝާދުދޭނެ ކޯޗަކަށް ނުވާނެކަމަށް އޭނާ ބުންޏެވެ. ބޭނުންވަނީ ހަމައެކަނި ޓްރޮފީއެއް ނޫނީ މަގާމެއް ނޫން ކަމަށާއި، ކުޅުންތެރިން ކުރިއަރައި، ފުޓުބޯޅައިގެ ރީތި އުސޫލުތައް ދަމަހައްޓަންކަމަށް ވެސް އޭނާ ބުނެފައިވެއެވެ.
މި މެޗު ބެލި އެއްވެސް މީހަކު މެޗު ބެލުމަށްފަހު ބަލާހިތުން މި މެޗު ބެލީމޭ ނުބުނާނެ ކަމަށާއި އެހެން ބުނާނީ ހަމައެކަނި އާސެނަލްއަށް މަރުދަންޖެހޭ އެ ޓީމުގެ ސަޕޯޓަރެއްކަމަށް ވެސް، ހިތްހަމަނުޖެހިފައިހުރެ ހާޒެލާ ބުންޏެވެ.
ބްރައިޓަން އަތުން ހޯދި މޮޅާއެކު އާސެނަލްއިން ލީގު ތާވަލުގެ އެއްވަނައިގައި ހަތް ޕޮއިންޓުގެ ލީޑެއް ވަނީ ނަގާފައެވެ. އެއީ ޓައިޓަލް އަށް ދެން އެންމެ ވާދަކުރާ މެންޗަސްޓަރ ސިޓީ، އެންމެފަހުން ކުޅުނު މެޗުގައި ނޮޓިންހަމް ފޮރެސްޓާ ކުޅެ 2-2 އިން އެއްވަރުވުމާ ގުޅިގެންނެވެ.
އާސެނަލްއަށް ލީގު ތާވަލުގެ އެއްވަނަ ލިބެނީ 30 މެޗުން 67 ޕޮއިންޓާއެކުއެވެ. ދެވަނައިގައި ސިޓީ އޮތީ އެއް މެޗު މަދުން ކުޅެ، 60 ޕޮއިންޓާއެކުއެވެ. އާސެނަލް އަތުން ބަލިވި ބްރައިޓަން އަށް 29 މެޗުން 37 ޕޮއިންޓާއެކު ލިބެނީ ތާވަލުގެ 13 ވަނައެވެ.