އެމެރިކާގެ އަސްކަރިއްޔާއިން އީރާންގެ އަސްކަރީ މަނަވަރު، 'ދެނާ'އަށް ޙަމަލާދީ، ފައްތައިލުމާ ގުޅިގެން އީރާންގެ ޚާރިޖީ ވަޒީރު ޢައްބާސް ޢަރާޤިޖީ ވަރުގަދަ އިންޒާރެއް ދެއްވައިފިއެވެ. އެމެރިކާގެ އަސްކަރިއްޔާއިން އީރާންގެ މަނަވަރަށް ޙަމަލާ ދީފައިވަނީ އިންޑިޔާ ކަނޑުގެ ސަރަޙައްދުން ދަތުރު ކުރަމުން ދަނިކޮށެވެ. ޢަރާޤިޖީ ވިދާޅުވީ، އެ މަނަވަރަށް ޙަމަލާ ދީފައިވަނީ، އިންޑިޔާގެ ކަނޑުގެ ސިފައިންގެ މެހެމާނެއްގެ ގޮތުގައި ދަތުރު ކުރަމުން ދަނިކޮށް ކަމުގައެވެ.
130 ފަޅުވެރިންނާ އެކު ދަތުރު ކުރަމުން ދިޔަ އީރާންގެ މަނަވަރަށް ދީފައިވަނީ ޙަމަލާއަކީ "ލާއިންސާނީ ޖަރީމާ"އެއްގެ ގޮތުގައި ޢަރާޤިޖީ ސިފަކުރެއްވިއެވެ. އަދި، އެމެރިކާއަށް އެ ކަމުގެ ހިތި ނަތީޖާއާ ކުރިމަތިލާން ޖެހޭ ކަމުގައި ވިދާޅުވެ، އޭނާވަނީ އެމެރިކާއަށް ވަރުގަދަ އިންޒާރެއް ދެއްވާފައެވެ. އެމެރިކާގެ އަސްކަރިއްޔާއިން އީރާންގެ މަނަވަރަށް ޙަމަލާ ދީފައި ވަނީ ބައިނަލްއަޤުވާމީ ކަނޑުގެ ސަރަޙައްދުގައި އޮއްވައި، އެއްވެސް އިންޒާރަކާ ނުލައެވެ.
އެމެރިކާއިން އީރާންގެ އަސްކަރީ މަނަވަރަކަށް ޙަމަލާދީ، ފައްތައިލާފައި މި ވަނީ، ޔަހޫދީންނާ ގުޅިގެން އީރާނާ ދެކޮޅަށް ފަށާފައިވާ ހަނގުރާމައިގެ ދަށުންނެވެ. ރައީސް ޑޮނަލްޑް ޓްރަމްޕާއި ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫގެ އަމުރަށް އީރާނަށް ޙަމަލާ ދޭން ފަށާފައި ވަނީ ފެބުރުވަރީ 28ވަނަ ދުވަހުއެވެ. އީރާނުން ވެސް ދަނީ އެ ޤައުމުގެ މިނިވަންކަމާއި އިސްތިޤުލާލުގެ ދިފާޢުގައި ހަނގުރާމަ ކުރަމުންނެވެ.
މަނަވަރު ފައްތައިލި ހާދިސާއާ ގުޅިގެން މަސްރަޙް އިތުރަށް ގޯސްވެފައިވާއިރު، އީރާނާއި ޢިރާޤު ގުޅޭ ސަރަޙައްދީ ރޮނގު ކައިރީގައި "ނިރުބަވެރި ޖަމާޢަތްތަކުން" ހަރަކާތްތެރިވަމުންދާ ކަމުގައި ވިދާޅުވެ ޢަރާޤިޖީވަނީ ކަންބޮޑުވުން ފާޅުކުރައްވާފައެވެ. އަދި، ސަރަޙައްދީ ރޮނގު ކައިރީގައި ދިފާޢީ ކަންކަން ވަރުގަދަ ކުރުމަށް އޭނާ ވަނީ ގޮވައިލައްވާފައެވެ. އޭނާ އިޝާރާތް ކުރައްވާފައި އެ ވަނީ އީރާނާއި ޢިރާޤުގެ ކުރުދީ ދަރިކޮޅުގެ ހަނގުރާމަވެރި ޖަމާޢަތްތަކަށް ކަމުގައި ބެލެވެއެވެ.
އީރާނާ ދެކޮޅަށް ފަށާފައިވާ ހަނގުރާމައިގެ ތެރެއަށް ކުރުދީ ދަރިކޮޅުގެ ހަނގުރާމަވެރި ޖަމާޢަތްތައް ވެއްދުމަށް އެމެރިކާއިން ކުރަމުން ދިޔަ ޙީލަތްތެރި ރޭވުންތައް ދާދިފަހުން ވަނީ ފަޟީޙަތްވެފައެވެ. މި ކަމުގެ އަޑީގައި އޮތް އެމެރިކާގެ ޖާސޫސީ އިދާރާ (ސީއައިއޭ)އެވެ. އީރާންގެ ވެރިކަން ވައްޓައިލުމާ ގުޅޭ ގޮތުން ސީއައިއޭން ކުރުދީ ޖަމާޢަތްތަކާ މަޝްވަރާ ފަށާފައި ވަނީ މީގެ މަސްތަކެއް ކުރިންނެވެ. ނަން ހާމަކޮށްފައި ނުވާ އެމެރިކާ ސަރުކާރުގެ އޮފިޝަލުންތަކެއް ބުނީ، ޢިރާޤުގެ ކުރުދިސްތާން ސަރަޙައްދުގައި ދިރިއުޅޭ ހަނގުރާމަވެރި ޖަމާޢަތްތަކާއި، އީރާންގެ ސަރުކާރާ ދެކޮޅު ފަރާތްތައް ހަނގުރާމައިގެ ތެރެއަށް ވައްދައި، އީރާން ސަރުކާރާ ދެކޮޅަށް ތެދުކުރުމަށް ސީއައިއޭން މަސައްކަތް ކުރަމުންދާ ކަމުގައެވެ.
އެމެރިކާގެ ބޮޑެތި ނޫސްތަކުން ވެސް ވަނީ މި ކަން ރިޕޯޓުކޮށްފައެވެ. އީރާން ސަރުކާރާ ދެކޮޅަށް ކުރުދީ ޖަމާޢަތްތައް ނެރުމަށް އެ ޖަމާޢަތްތަކަށް ހަތިޔާރު ފޯރުކޮށްދީ، މާލީ އެހީތެރިކަން ފޯރުކޮށްދިނުމަށް އެމެރިކާއިން ހުށަހަޅާފައިވާ ކަމުގައި ރިޕޯޓުތައް ބުނެއެވެ. އަދި، އެމެރިކާގެ ފައިސާގައި ހިފައި ބައެއް ޖަމާޢަތްތަކުން ވަނީ އެ ކަމަށް އެއްބަސްވެފައެވެ. ޢިރާޤުގެ ސަރަޙައްދީ ރޮނގު ކައިރީގައި ކުރުދީ ހަނގުރާމަވެރިން ހަރަކާތްތެރިވާން ފެށުމުން، އީރާންގެ އިސްލާމީ އިންޤިލާބީ ލަޝްކަރު (އައިއާރްޖީސީ)ން ވަނީ އެ ސަރަޙައްދުތަކަށް ޙަމަލާތަކެއް ދީފައެވެ.
އީރާނާ ދެކޮޅަށް އެމެރިކާއާއި ޔަހޫދީން ފަށާފައިވާ ހަނގުރާމަ އިތުރަށް ފުޅާވުމުގެ ނުރައްކާ ބޮޑުވަމުންދާ ކަމުގައި މަސްރަޙް ދިރާސާ ކުރާ ފަރާތްތަކުން ޤަބޫލު ކުރެއެވެ. އެއް ސަބަބަކީ، އެމެރިކާއާ ގުޅުމަށް ހުޅަނގުގެ ބައެއް ބާރުތަކުން ނިންމުމެވެ. މި ގޮތުން، މެދުއިރުމައްޗަށް އަސްކަރީ މުދާ ފޮނުވުމުގެ މަސައްކަތް ފަށްޓަވާފައިވާނެ ކަން އޮސްޓްރޭލިޔާގެ ބޮޑުވަޒީރު އެންތަނީ އަލްބަނޭޒޭ ވަނީ ހާމަކުރައްވާފައެވެ. ނަމަވެސް، ހަނގުރާމައިގައި އޮސްޓްރޭލިިޔާގެ އަސްކަރިއްޔާއިން އަމަލީ ގޮތުން ބައިވެރިވާނެ ކަން ސާފެއް ނޫނެވެ. މީގެ އިތުރުން، އެމެރިކާއާއި އެކުވެރި ޤައުމުތަކާ އެކުގައި ކެނެޑާގެ އަސްކަރިއްޔާއިން ދެމިއޮތްކަން ކެނެޑާގެ ބޮޑުވަޒީރު މައިކް ކާނީ ވެސް ވަނީ ހާމަކުރައްވާފައެވެ.
ފެބުރުވަރީ 28ވަނަ ދުވަހު ޓްރަމްޕާއި ނަތަންޔާހޫ އަޑީގައި ތިބެ ފެށި ޣައިރުޤާނޫނީ ހަނގުރާމައިގައި ޝަހީދު ކޮށްލާފައިވާ އީރާންގެ ރައްޔިތުންގެ އަދަދު ވަނީ 1,045އަށް އުފުލިފައެވެ. އޭގެ ތެރޭގައި 180އެއްހާ ކުޑަކުދިން ހިމެނެއެވެ. އަދި، އެތަކެއް ސަތޭކަ ބަޔަކު ވަނީ ޒަޚަމު ކޮށްލާފައެވެ. ރައްދުގައި އީރާނުން ދެމުންދާ ޙަމަލާތައް އަމާޒު ކުރަމުން ދަނީ ޔަހޫދީ ދައުލަތުގެ ރަށްތަކާއި، ގަލްފާއި ޢަރަބި ޤައުމުތަކުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކާއި، އެމެރިކާގެ މަސްލަޙަތު އޮތް އިމާރާތްތަކަށެވެ. އީރާންގެ ޙަމަލާތަކުގައި ޔަހޫދީންގެ 11 މީހުން މަރައިލައި، އެތަކެއް ސަތޭކަ ބަޔަކު ވަނީ ޒަޚަމު ކޮށްލާފައެވެ. އަދި، އެމެރިކާ ސިފައިންގެ ހަ މީހަކު ވެސް ވަނީ މަރައިލާފައެވެ.