އީރާނާ ދެކޮޅަށް ކުރަމުންދާ ހަނގުރާމަ އިތުރަށް ފުޅާކުރުމަށް އެމެރިކާގެ އެއްގަމު ސިފައިން ފޮނުވުމުގެ ފުރުޞަތު ދޫކޮށްލާފައި ނުވާނެ ކަމުގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމުން، އަސްކަރީ ދާއިރާގެ ތަޖުރިބާކާރުންނާއި މާހިރުން އެ ކަމާ މެދު ސުވާލު އުފައްދައިފިއެވެ. އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ. ހަނގުރާމައިގައި ޝަހީދު ކޮށްލާފައިވާ އީރާންގެ ރައްޔިތުންގެ އަދަދު ވަނީ 1,045އަށް އުފުލިފައެވެ.
އީރާނާ ދެކޮޅަށް ކުރަމުންދާ ހަނގުރާމައިގައި އެއްގަމު ސިފައިން ބޭނުން ކުރުމުގެ ވިސްނުން ދޫކޮށްލައްވާފައި ނުވާނެ ކަމުގައި ޓްރަމްޕް ވިދާޅުވި ނަމަވެސް، މި ފަދަ މޭރުމަކުން ވިދާޅުވުމަކީ އެމެރިކާގެ ކުރީގެ ރައީސުން ޢާންމު ގޮތެއްގައި އަމަލު ކުރައްވާފައިވާ ގޮތް ނޫން ކަމުގައި މަސްރަޙް ދިރާސާ ކުރާ ފަރާތްތަކުން ބުންޏެވެ. ޓްރަމްޕް ވިދާޅުވީ، އެހެން ރައީސުންނެކޭ އެއް ފަދައިން އެއްގަމު ސިފައިން ނުފޮނުއްވާނަމޭ ވިދާޅުވާން ބޭނުންފުޅުނުވާ ކަމުގައެވެ. އަދި، މަޖުބޫރުވެއްޖެ ނަމަ، އެ ކަން ކުރުމަށް ތައްޔާރަށް ހުންނެވި ކަމުގައެވެ.
ނަމަވެސް، އީރާނަށް އެމެރިކާގެ އެއްގަމު ސިފައިން ފޮނުވައިގެން، ހަނގުރާމައިގައި ކާމިޔާބީތަކެއް ހޯދުމަކީ ދަތި، އުނދަގޫ ކަމެއްގެ ގޮތުގައި މަސްރަޙް ދިރާސާ ކުރާ ފަރާތްތަކުން ޤަބޫލު ކުރެއެވެ. ސަބަބަކީ، އީރާންގެ ޖުޣުރާފިޔާއެވެ. ޢާންމުކޮށް ދެ ޤައުމެއްގެ އަސްކަރިއްޔާގެ އެއްގަމު ސިފައިންގެ މެދުގައި ކުރާ ހަނގުރާމައެއްގެ ބަދަލުގައި، އެމެރިކާއަށް އޮތީ ވަކިވަކި "ޚާއްޞަ އޮޕަރޭޝަންތަކެއްގެ" މައްޗަށް އެކުލެވިގެންވާ ހަނގުރާމައެއް ކުރުން ކަމުގައި މަސްރަޙް ދިރާސާ ކުރާ ފަރާތްތަކުން ބުންޏެވެ.
އަސްކަރީ ދާއިރާގެ ތަޖުރިބާކާރެއް ކަމުގައިވާ ކާނަލް ނިޟާލް އަބޫ ޛައިދު ވިދާޅުވީ، އެމެރިކާއާއި ޔަހޫދީން ވެސް ވިސްނަނީ އެ ފަަދަ ހަނގުރާމައެއްގެ ގޮތުގައި ބޭއްވުމަށް ކަމަށް ދެކެވަޑައިގަންނަވާ ކަމުގައެވެ. އަސްކަރީ ބަހުރުވައިން ނަމަ، "ޕިކް-އަޕް" އޮޕަރޭޝަންތަކެއް ހިންގުމެވެ. މާނައަކީ، ޚާއްޞަ ތަމްރީނު ލިބިފައިވާ މަދު އަދަދެއްގެ ސިފައިން ވަކި ސަރަޙައްދުތަކަށް ސިއްރުން ފޮނުވުމާއި، ޖާސޫސީ މަޢުލޫމާތު އެއްކުރުމާއި، ފިލައިތިބެ ޙަމަލާދިނުމަށް ފަހު ފޭބުމުގެ އުސޫލެވެ. އީރާނަކީ އުސް ފަރުބަދަތަކެއް ހިމެނޭ ޤައުމެކެވެ. އަދި، އެ ޤައުމުގެ ބިމުގެ ޙާލަތާއި އާބާދީގެ ބޮޑުކަމަށް ބަލާއިރު، އެމެރިކާ ސިފައިން އެ ޤައުމަށް ފޮނުވައިގެން މުޅި ޤައުމު އެމެރިކާއާއި ޔަހޫދީންގެ އަތްދަށަށް ގެންދިޔުމަކީ ފަސޭހަ ކަމަކަށް ނުވާނެ ކަމުގައި އަބޫ ޛައިދު ވިދާޅުވިއެވެ. މިއީ، ޔަހޫދީން ވެސް ޤަބޫލުކުރާ ޙަޤީޤަތެކެވެ.
އެމެރިކާގެ ގިނަ އަދަދެއްގެ ސިފައިން އީރާނަށް ފޮނުވުމަކީ ޓްރަމްޕް ސަރުކާރުގެ ސިޔާސަތު ނޫން ކަމުގައި އޭނާގެ ހަނގުރާމައާ ބެހޭ ވަޒީރު ޕީޓް ހެގްސެތު ވެސް ވަނީ ހާމަކުރައްވާފައެވެ. އޭނާ ވިދާޅުވީ، 200,000 ސިފައިން ފޮނުވައިގެން 20 އަހަރަށް ދެމިގެންދާނެ ހަނގުރާމައެއް ފެށުމުގެ ވިސްނުން ނުގެންގުޅުއްވާ ކަމުގައެވެ. މަސްރަޙް ދިރާސާ ކުރާ ފަރާތްތަކުން ބުނީ، އެ ފަދަ ހަނގުރާމައެއް ފެށުމުގެ ޤާބިލުކަން އެމެރިކާގެ އަސްކަރިއްޔާގެ ކިބައިގައި މި ވަގުތު ނެތް ކަމުގައެވެ. އަދި، އެ ފަދަ ހަނގުރާމައަކަށް ތައްޔާރުވުމަށް މަދުވެގެން އެއް އަހަރު ބޭނުންވާނެ ކަމަށާއި، އީރާނާ ދެކޮޅަށް އެ ފަދަ ހަނގުރާމައެއް ހިންގުމަށް އެއަށްވުރެ މާ ގިނަ އަދަދެއްގެ ސިފައިންގެ ލަޝްކަރެއް ޖަމާކުރަން ޖެހޭނެ ކަމުގައެވެ.
އީރާނަށް ޙަމަލާ ދޭން ނިންމެވި ސަބަބާ ގުޅޭ ގޮތުން ވެސް ޓްރަމްޕް އެކި ފަހަރު ދައްކަވަމުން ގެންދަވަނީ އެކި ވާހަކަފުޅެވެ. ފުރަތަމަ ވިދާޅުވީ، އެމެރިކާއިން އީރާނަށް ޙަމަލާ ދިނުމަށް ތައްޔާރުވި ކަމުގައެވެ. އެއަށްފަހު، އޭނާގެ ޚާރިޖީ ވަޒީރު މާކޯ ރޫބިޔޯ ވިދާޅުވީ، ޔަހޫދީން އީރާނަށް ޙަމަލާ ދޭން ތައްޔާރުވުމުން އެ ކަމުގައި އެމެރިކާއިން ބައިވެރިވީ ކަމުގައެވެ. ރޫބިޔޯގެ ވާހަކަފުޅު ދޮގު ކުރައްވައި ޓްރަމްޕް ވަނީ އީރާން ހަނގުރާމަ ފެށްޓެވީ ތިމަންމަނިކުފާނު ކަަމުގައި ވިދާޅުވެފައެވެ. އެންމެ ފަހުން އޭނާ ވިދާޅުވީ، އީރާނާއި އެމެރިކާއާ ދެމެދު ކުރަމުުން ދިޔަ މަޝްވަރާތައް ފޭލުވި ކަމުގައެވެ. އަދި، އީރާނުން ސިއްރުން ނިއުކްލިޔަރ މަޝްރޫޢެއް ހިންގަމުން ގޮސްފައިވާ ކަމުގައެވެ.
ޓްރަމްޕްގެ މި ފަދަ ދެކޮޅުނުޖެހޭ ވާހަކަފުޅުތަކާ އެކު އެމެރިކާ ރައްޔިތުންގެ މެދުގައި އޭނާއަށް އޮތް ތާޢީދު ފަނޑުވަމުންދާ މަންޒަރު ދަނީ ފެންނަމުންނެވެ. ހަނގުރާމައިގައި އަސްކަރީ ގޮތުން އެމެރިކާ ސިފައިން ކުރިއެރުންތަކެއް ހޯދާފައިވީ ނަމަވެސް، އެމެރިކާ ރައްޔިތުންގެ މެދުގައި މި ހަނގުރާމައަށް އޮތް ތާޢީދު ފަނޑެވެ. ރޮއިޓަރސް އަދި އިޕްސޮސް ގުޅިގެން ހެދި ދިރާސާއެއްގެ ނަތީޖާއިން ފެންނަ ގޮތުގައި، ޓްރަމްޕް އިސްވެ ފެށްޓެވި ހަނގުރާމައަށް ތާޢީދު ކުރަނީ އެމެރިކާ ރައްޔިތުންގެ ތެރެއިން އެންމެ %27 މީހުންނެވެ.