އެމެރިކާއި ޔަހޫދީން އިސްވެ އީރާނާ ދެކޮޅަށް ފަށާފައިވާ ހަނގުރާމަ ފަސްވަނަ ދުވަހަކަށް ދެމިގެން ގޮސްފައިވާއިރު، ރައްދުގައި އީރާނުން ދެމުންދާ ވަރުގަދަ ޙަމަލާތަކާ ގުޅިގެން ޔަހޫދީ ޢާންމުންނަށް ކުރިމަތިވެފައި އޮތް ނުރައްކަލާއި ނުތަނަވަސްކަން އެތަކެއް ގުނައަކަށް ބޮޑުވެއްޖެއެވެ. ރައީސް ޑޮނަލްޑް ޓްރަމްޕާއި ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫ އަޑީގައި ތިބެގެން އީރާނަށް އިސްވެ ޙަމަލާދީ، މުޅި މެދުއިރުމަތި ހަމަނުޖެހުންގަނޑެއްގެ ތެރެއަށް ވައްޓައިލީ ފެބުރުވަރީ 28ވަނަ ދުވަހުއެވެ.
ޔަހޫދީންނާއި އެމެރިކާގެ ޙަމަލާތަކަށް ބަލަން ތިބުމުގެ ބަދަލުގައި އީރާނުން ވަނީ ރައްދު ޙަމަލާ ދޭން ފަށާފައެވެ. މިއީ، އީރާންގެ މިނިވަންކަމާއި އިސްތިޤުލާލުގެ ދިފާޢުގައި ދޭން ފެށި ޙަމަލާތަކެއް ކަމުގައި އީރާނުން ބުނެއެވެ. ނުރައްކާތެރި ބެލިސްޓިކް އަދި ކްރޫޒް މިސައިލްތަކުގެ އިތުރުން ގިނަ އަދަދެއްގެ އަސްކަރީ ޑްރޯން ބޭނުން ކޮށްގެން އީރާނުން ދަނީ ޔަހޫދީ ދައުލަތުގެ ރަށްތަކާއި އެމެރިކާގެ އަމާޒުތަކަށް ޙަމަލާ ދެމުންނެވެ. އޭގެ ތެރޭގައި، ގަލްފާއި ޢަރަބި ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކާއި، އެމެރިކާގެ މަސްލަޙަތު އޮތް އިމާރާތްތައް ހިމެނެއެވެ.
އީރާނުން އެންމެ ގިނަ އަދަދެއްގެ ހަތިޔާރު ބޭނުންކޮށްގެން، އެންމެ ވަރުގަދަ ޙަމަލާތަކެއް ދެމުން ދަނީ ޔަހޫދީ ދައުލަތަށެވެ. އީރާންގެ ޙަމަލާތަކާ ގުޅިގެން ޔަހޫދީ ދައުލަތުގެ ރަށްތަކުގައި އިންޒާރުގެ ރަނގަބަލީގެ އަޑު ކެނޑިގެން ނުދެއެވެ. އަދި، ޔަހޫދީ ޢާންމުން ތިބީ ބިންގަރާސްތަކަށް ވަދެ، ފިލައެވެ. ޔަހޫދީ ޢާންމުންގެ ދިރިއުޅުން އެފުށްމިފުށަށް ޖެހި، ބިރުވެރިކަމެއްގެ ތެރެއަށް ވެއްޓިފައި މި ވަނީ ޓްރަމްޕާއި ނަަތަންޔާހޫގެ އަމަލުތަކާ ގުޅިގެންނެވެ. ނަމަވެސް، ބިންގަރާސްތަކުގައި ވެސް އީރާންގެ ވަރުގަދަ ޙަމަލާތަކުން ފުރިހަމަ ރައްކާތެރިކަން ލިބޭނެ ގޮތެއް ނެތް ކަމުގައި މަސްރަޙް ދިރާސާ ކުރާ ފަރާތްތަކުން ބުންޏެވެ.
މާރިޗު 4ވަނަ ދުވަހުގެ ހެނދު ވެސް ޔަހޫދީ ފައުޖުން ވަނީ ތަލް އަވީވާއި ޤުދުސް ހިމެނޭ ގޮތުގައި، އެ ޤައުމުގެ ބޮޑު ސަރަޙައްދަކަށް ކުއްލި ނުރައްކަލުގެ އިންޒާރު ނެރެފައެވެ. އީރާނުން ވަނީ އެ ސަރަޙައްދުތަކަށް ޙަމަލާ ދިނުމުގެ އަމާޒުގައި މިސައިލްތަކެއް އުދުއްސައިލާފައެވެ. އީރާންގެ ޙަމަލާތަކުގައި މަރުވަމުންދާ އަދި ޒަޚަމުވަމުންދާ ޔަހޫދީންގެ އަދަދުތައް ސިއްރު ކުރުމަށް ޔަހޫދީ ދައުލަތުން ދަނީ މަސައްކަތް ކުރަމުންނެވެ. ނަމަވެސް، މަސްރަޙް ދިރާސާ ކުރާ ފަރާތްތަކުން ބުނީ، އީރާންގެ ވަރުގަދަ ޙަމަލާތަކުގައި ޔަހޫދީންގެ 11 މީހުން މަރައިލާފައިވާ ކަމުގައެވެ. އަދި، ޒަޚަމު ކޮށްލާފައިވާ މީހުންގެ އަދަދު އެތަކެއް ސަތޭކައަށް އުފުލިފައިވާ ކަމުގައެވެ. އޭގެ ތެރޭގައި ބިންގަރާސްތަކުގައި ފިލައި ތިބި މީހުން ވެސް ހިމެނެއެެވެ.
އީރާނާ ދެކޮޅަށް ފަށާފައިވާ ހަނގުރާމަ މަހެއްހާ ދުވަހަށް ދެމިގެން ގޮސްދާނެ ކަމުގައި ޓްރަމްޕް ވަނީ ވިދާޅުވެފައެވެ. އީރާނުން ބުނީ، ދިގު ހަނގުރާމައެއް ކުރުމަށް އެ ޤައުމުން ފުރިހަމައަށް ތައްޔާރަށް އޮތް ކަމުގައެވެ. އަދި، ޔަހޫދީންނާއި އެމެރިކާގެ ޙަމަލާތަކަށް ފަސްޖެހުމެއް ނެތި ރައްދުދެމުން ދާނެ ކަމުގައެވެ. ޓްރަމްޕްގެ މި ހަނގުރާމައަކީ ބައިނަލްއަޤުވާމީ ޤާނޫނުތަކުގެ އިތުރުން އެމެރިކާގެ ދާޚިލީ ޤާނޫނުތަކާ ވެސް ޚިލާފު ހަނގުރާމައެކެވެ. އަދި، އެމެރިކާގެ ޤާނޫނުހަދާ މަޖިލިސް، ކޮންގްރެސްގެ ހުއްދައާ ނުލައި ފަށްޓަވާފައިވާ ހަނގުރާމައެވެ. ޓްރަމްޕާއި ނަތަންޔާހޫގެ ހަނގުރާމައިގައި އީރާނުން ޝަހީދު ކޮށްލާފައިވާ މީހުންގެ އަދަދު ވަނީ 787އަށް އުފުލިފައެވެ.