ލުބުނާނުގައި މި ވަގުތު ތިބި އީރާން ސަރުކާރުގެ އޮފިޝަލުންނާއި މަންދޫބުންނަށް ޙަމަލާދޭނެ ކަމުގައި ބުނެ ޔަހޫދީން ދެމުންދާ އިންޒާރުތަކަކީ ޣައިރުޤާނޫނީ ކުށެއްގެ ގޮތުގައި ސިފަކޮށް، އިންސާނީ ޙައްޤުތަކަށް ވަކާލާތުކުރާ ބައިނަލްއަޤުވާމީ ޖަމުޢިއްޔާ، ހިޔުމަން ރައިޓްސް ވޮޗް (އެޗްއާރްޑަބްލިޔު)ން އެ ކަން ކުށްވެރި ކޮށްފިއެވެ. އެޗްއާރްޑަބްލިޔުން ޝާއިޢު ކުރި ބަޔާނެއްގައި ބުނީ، ޔަހޫދީންގެ އިންޒާރުތަކަކީ "ހަނގުރާމައިގެ ކުށެއް ހިންގުމުގެ ނިޔަތް އޮތްކަން ހާމަވާ" ކަމެއް ކަމުގައެވެ. ހަނގުރާމައިގައި ސީދާ ގޮތުން ބައިވެރިނުވާ އެއްވެސް މީހަކަށް ޙަަމަލާ ދިނުމަކީ ބައިނަލްއަޤުވާމީ ޤާނޫނުތަކުގެ ދަށުން މަނާ ކަމެކެވެ.
ޔަހޫދީންނާއި އެމެރިކާއިން އިސްވެ، އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ. އަދި، ޔަހޫދީން ލުބްނާނަށް ބޮންއަޅަން ފަށާފައި ވަނީ، އީރާންގެ ދިފާޢުގައި ލުބްނާންގެ މުޖާހިދުންގެ ޖަމާޢަތް، ޙިޒްބުاللهން ތެދުވުމާ ގުޅިގެންނެވެ. މި މައްސަލައިގައި ޔަހޫދީން ވަނީ، ލުބްނާނުން ފޭބުމަށް އެ ޤައުމުގައި ތިބި އީރާން ސަރުކާރުގެ ހުރިހާ މަންދޫބުން އަންގާފައެވެ. އަދި، އެ ކަމަށް 24 ގަޑިއިރުގެ މުހުލަތެއްދީ، އެ ގޮތަށް އަމަލު ނުކޮށްފިނަމަ، ޙަމަލާދޭނެ ކަމުގެ އިންޒާރު ދީފައެވެ.
"ހަނގުރާމައިގެ ޤާނޫނުތަކުގައިވާ ގޮތުން އެއްވެސް ޢާންމު ފަރުދަކަށް އަމާޒުކޮށް ޙަމަލާދިނުމަކީ ކަނޑައެޅިގެން މަނާކަމެއް. މީގެ ތެރޭގައި ހަނގުރާމައިގައި އަމަލީ ގޮތުން ބައިވެރިނުވާ އެހެން ޤައުމުތަކުގެ އޮފިޝަލުން ވެސް ހިމެނޭ،" އެޗްއާރްޑަބްލިޔުން މީސްމީޑިޔާއަށް ހިއްސާކުރި ބަޔާނުގައި ބުނެފައިވެއެވެ.
ލުބްނާންގައި ދިރިއުޅޭ އީރާން ސަރުކާރުގެ މަންދޫބުންނަށް އިންޒާރު ދިނުމަށް ފަހު ޔަހޫދީން ވަނީ ލުބްނާންގެ ގިނަ ސަރަޙައްދުތަކަކަށް ނިރުބަވެރި ޙަމަލާތަކެއް އަމާޒުކޮށްފައެވެ. އޭގެ ތެރެއިން، ލުބްނާން ފަރުބަދަ ކައިރީގައި އޮތް އަރަމޫނާއި ސަޢުދިއްޔަތަށް ދިން ޙަމަލާތަކުގައި ހަ މީހުން ޝަހީދުކޮށްލިއެވެ. ލުބްނާންގެ ޞިއްޙީ ވުޒާރާއިން ބުނީ، އެ ޙަމަލާތަކުގައި އިތުރު އަށް މީހުން ޒަޚަމު ކޮށްލާފައިވާ ކަމުގައެވެ. ވެރިރަށް ބައިރޫތަށް ވެސް ޔަހޫދީންގެ ވައިގެ ޙަމަލާތައް އަމާޒުކޮށްފައިވެއެވެ.
އީރާން ހަނގުރާމައާ ގުޅުވައި ޔަހޫދީ ފައުޖުން ލުބްނާންގެ ޢާންމުން ދިރިއުޅޭ ރަށްތަކަށް ދޭން ފެށި ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު ވަނީ 50އަށް އުފުލިފައެވެ. އަދި، 335 އިތުރު މީހަކު ވަނީ ޒަޚަމު ކޮށްލާފައެވެ. މީގެ އިތުރުން، ލުބުނާނުގެ ދެކުނުގެ 16 އަވަށެއްގެ ރައްޔިތުން ގެދޮރު ދޫކޮށް ދިއުމަށް ޔަހޫދީ ފައުޖުން ވަނީ އަމުރުކޮށްފައެވެ.
އީރާނުން ވެސް ދަނީ ޔަހޫދީންނާއި އެމެރިކާއާ ދެކޮޅަށް ރައްދު ޙަމަލާތައް ދެމުންނެވެ. އެމެރިކާއާ ދެކޮޅަށް އަމާޒުކޮށް ދެމުންދާ ޙަމަލާތައް އަމާޒު ކުރަނީ، ގަލްފާއި ޢަރަބި ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކާއި، އެމެރިކާގެ މަސްލަޙަތު އޮތް އިމާރާތްތަކަށް ކަމުގައި އީރާނުން ބުނެއެވެ. މި ގޮތުން، އެކުވެރި ޢަރަބި ޢިމާރާތް (ޔޫއޭއީ)ގެ ދުބާއީގައި ހުންނަ އެމެރިކާގެ ކޮންސިއުލޭޓަށް އީރާނުން ވަނީ ޙަމަލާ ދީފައެވެ. މީގެ އިތުރުން، ޔޫއޭއީގެ އަލް-ފުޖަޔިރާ ބަނދަރަށް ވެސް ޙަމަލާތައް އަމާޒު ކޮށްފައިވާ ކަމުގައި ރިޕޯޓުތައް ބުނެއެވެ.
މި ހަނގުރާމައިގެ ތެރެއިން ހުރްމުޛް ކަނޑުއޮޅި ބަންދުކުރާނެ ކަން އީރާނުން އިޢުލާނު ކުރުމާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް ވަނީ އެ ޤައުމުގެ ތެޔޮ އުފުލާ ޓޭންކަރުތަކަށް ޙިމާޔަތް ދިނުމަށް އަސްކަރީ މަނަވަރުތައް ފޮނުވުމަށް ތައްޔާރަށް ހުންނެވި ވިދާޅުވެފައެވެ. ޔަހޫދީންނާ އެމެރިކާ އިސްވެ ފަށާފައިވާ ހަނގުރާމައާ ގުޅިގެން ދުނިޔޭގެ ތެލުގެ ބާޒާރަށް ވަނީ އޭގެ ނޭދެވޭ އަސަރު ކުރަން ފަށާފައެވެ.