އީރާނާ ދެކޮޅަށް ދެމުންދާ ޙަމަލާތަކުގައި ސްޕެއިންގެ އަސްކަރީ މަރުކަޒުތައް ބޭނުން ކުރުމުގެ ހުއްދަ އެމެރިކާއަށް ދިނުމަށް ސްޕެއިނުން އިންކާރު ކުރުމުން، ސްޕެއިނާ ދެކޮޅަށް ދަތިކުރުމުގެ ފިޔަވަޅު އަޅުއްވާނެ ކަމުގައި ވިދާޅުވެ، ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ. އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ. ސްޕެއިނުން ވަނީ އީރާނަށް ދެމުންދާ ޙަމަލާތަކުގައި އެމެރިކާ އަސްކަރީ މަތިންދާބޯޓުތަކަށް ސްޕެއިންގެ އަސްކަރީ މަރުކަޒުތައް ބޭނުން ކުރުމުގެ ހުއްދަ ދިނުމާ ދެކޮޅު ހަދާފައެވެ.
މި ކަމާ މެދު ކޯފާވެ، ސްޕެއިނަށް ޓްރަމްޕް އިންޒާރު ކުރައްވާފައި ވަނީ ޖަރުމަނުވިލާތުގެ ޗާންސެލަރ ފްރީދްރިޝް މެޔަޓްޒާއެކު ބޭއްވެވި ބައްދަލުވުމަކަށް ފަހު ނޫސްވެރިންނާ ވާހަކަފުޅު ދައްކަވަމުންނެވެ. ޓްރަމްޕް ވިދާޅުވީ، ސްޕެއިނާ ދެމެދު ކުރާ ވިޔަފާރީގެ މުޢާމަލާތުތައް ހުއްޓައިލުމަށް އެމެރިކާގެ މާލީ ވަޒީރު ސްކޮޓް ބެސެންޓަށް އަންގަވާފައިވާނެ ކަމުގައެވެ. ސްޕެއިނުން އަމަލު ކުރަމުން ދަނީ ވަރަށް ގޯސްކޮށް ކަމުގައި ވެސް ޓްރަމްޕް ވިދާޅުވިއެވެ. "އަޅުގަނޑުމެން ސްޕެއިންއާ އެކު ކުރާ ހުރިހާ ވިޔަފާރިއެއް ހުއްޓައިލާނަން. ސްޕެއިންއާ އެއްވެސް ގުޅުމެއް ބާއްވާކަށް ބޭނުމެއް ނޫން،" ޓްރަމްޕް ވިދާޅުވިއެވެ.
މި މައްސަލަ ހޫނުވީ، އީރާނަށް ޙަމަލާދިނުމުގައި ބޭނުންކުރުމަށް ސްޕެއިންގެ ދެކުނު ރޯތާ އަދި މޮރޮންގައި އޮތް އަސްކަރީ މަރުކަޒުތައް ބޭނުންކުރުމުގެ ހުއްދަ އެ ޤައުމުގެ ސަރުކާރުން އެމެރިކާއަށް ނުދިނުމުންނެވެ. މި ނިންމުމާ ގުޅިގެން އެމެރިކާއިން ވަނީ އެ މަރުކަޒުތަކުގައި އޮތް އަސްކަރީ މަތިންދާބޯޓުތައް އެހެން ތަނަކަށް ބަދަލުކޮށްފައެވެ. އޭގެ ތެރޭގައި އަސްކަރީ މަތިންދާބޯޓުތަކަށް ވައިގެ މަގުން ތެޔޮ އަޅައިދިނުމަށް ބޭނުން ކުރާ ޓޭންކަރުތަކުގެ އިތުރުން 15 އަސްކަރީ މަތިންދާބޯޓު ހިމެނެއެވެ.
މީގެ އިތުރުން، ހުޅަނގުގެ ދިފާޢީ އިއްތިޙާދު (ނޭޓޯ)ގެ މެންބަރު ޤައުމުތަކުގެ އުފެއްދުންތެރިކަމުގެ %5 ދިފާޢީ ދާއިރާއާށް ހޭދަކުރުމަށް އެމެރިކާއިން ކުރާ އިލްތިމާސަށް ސްޕެއިނުން އިޖާބަ ދީފައި ނުވާތީ ވެސް ޓްރަމްޕް ވަނީ ނުރުހުން ފާޅުކުރައްވާފައެވެ. އޭނާ ވިދާޅުވީ ސްޕެއިންގެ ކިބައިގައި އެމެރިކާއިން ބޭނުންވާ އެއްވެސް އެއްޗެއް ނެތް ކަމަށެވެ. ޓްރަމްޕްގެ އިޤުތިޞާދީ މުޝީރުން ކަމުގައިވާ ބެސެންޓް އަދި ވިޔަފާރިއާ ބެހޭ މުޝީރު ޖޭމީސަން ގްރިޔަރ ވިދާޅުވީ، ކުއްލިހާލަތުތަކުގައި ޓްރަމްޕަށް ލިބިވަޑައިގަންނަވާ އިޤުތިޞާދީ ބާރުތަކާ ބެހޭ ޤާނޫނުގެ ދަށުން، ސްޕެއިންއާ ދެކޮޅަށް ދަތިކުރުމުގެ ފިޔަވަޅު އެޅުޅުމުގެ ޙައްޤު އޭނާއަށް ލިބިވަޑައިގަންނަވާ ކަމުގައެވެ.
ނަމަވެސް، މެޔަޓްޒް ވަނީ ސްޕެއިންއަކީ ވިލާތުގެ އިއްތިޙާދު (އީޔޫ)ގެ މެންބަރު ޤައުމެއް ކަން ޓްރަމްޕަށް ހަނދާން ކޮށްދެއްވާފައެވެ. މެޔަޓްޒް ވިދާޅުވީ، އީޔޫން އެމެރިކާއާ އެކު ވިޔަފާރީގެ އެއްބަސްވުންތައް ކުރިއަށްގެންދާނީ މުޅި އިއްތިޙާދު ގުޅިގެން ކަމުގައެވެ. އަދި ވަކި ޤައުމަކަށް އަމާޒުކޮށް ޚާއްޞަ ފިޔަވަޅުތަކެއް ނޭޅޭނެ ކަން ވެސް އޭނާ ފާހަގަކުރެއްވިއެވެ.
ޓްރަމްޕްގެ އިންޒާރާ ގުޅިގެން ސްޕެއިންގެ ސަރުކާރުން ވަނީ ނުރުހުން ފާޅުކޮށްފައެވެ. ސްޕެއިނުން ނެރުނު ބަޔާނެއްގައި ބުނީ، އަމިއްލަ ވިޔަފާރިތަކުގެ މިނިވަންކަމަށާއި ބައިނަލްއަޤުވާމީ ޤާނޫނުތަކަށް އެމެރިކާއިން އިޙުތިރާމު ކުރަންޖެހޭނެ ކަމުގައެެވެ. ސްޕެއިންއަކީ ޒައިތޫނި ތެޔޮ އެންމެ ގިނައިން އެކްސްޕޯޓްކުރާ ޤައުމެވެ. އަދި އެއްގަމު އުޅަނދުގެ ދަގަނޑު އެމެރިކާއަށް ވިއްކި ނަމަވެސް، 2025 ވަނަ އަހަރުގެ ތަފާސްހިސާބުތައް ދައްކާ ގޮތުގައި އެމެރިކާއިން ސްޕެއިންއަށް ކުރާ އެކްސްޕޯޓް (26.1 ބިލިޔަން ޑޮލަރު) އިތުރުވުމުގެ ސަބަބުން، 4.8 ބިލިޔަން ޑޮލަރުގެ ފައިދާއެއް އޮތީ އެމެރިކާއަށެވެ. އެހެންކަމުން މި ފިޔަވަޅުގެ ސަބަބުން ލިބޭނެ ގެއްލުން ކުޑަކުރުމުގެ ޤާބިލުކަން ސްޕެއިނަށް އޮތް ކަމުގައި ވެސް އެ ޤައުމުން ބުންޏެވެ.