އެމެރިކާއާއި ޔަހޫދީން ދިން ބޮމުގެ ޙަމަލާތަކުގެ ސަބަބުން އީރާނުގެ ބައެއް އާސާރީ ބިނާތަކަށް ލިބުނު ގެއްލުންތަކާ ގުޅިގެން، އެ ޤައުމުގެ ސަރުކާރުން (އދ)ގެ ތަޢުލީމާއި، ސައިންސާއި ސަގާފީ ތަރިކައާ ބެހޭ އިދާރާ (ޔުނެސްކޯ)އަށް ރަސްމީކޮށް ޝަކުވާ ހުށަހަޅައިފިއެވެ.
ގެއްލުން ލިބުނު ތަންތަނުގެ ތެރޭގައި ތާރީޚީ "ގުލިސްތާން" ޕެލަސް އާއި ތެހްރާންގެ މަޝްޙޫރު ގްރޭންޑް ބާޒާރު ހިމެނެއެވެ. 16 ވަނަ ގަރުނުގެ ތާރީޚެއް އޮތް ގުލިސްތާން ޕެލަސްއަކީ ގާޖާރު ދަރިކޮޅުގެ ރަސްކަމުގެ ގަނޑުވަރާއި ދަރުބާރުގެ ގޮތުގައި ބޭނުންކުރި މުހިންމު ބިނާއެކެވެ.
ޔުނެސްކޯއަށް ފޮނުވި ސިޓީގައި އިރާނުން ބުނެފައިވަނީ، ޙަމަލާތަކުގެ ސަބަބުން އުފެދުނު ގޮވުންތަކާއި ޝޮކްވޭވްތަކުގެ ސަބަބުން އެ ތަންތަނުގެ އޮނިގަނޑަށާއި ޒީނަތްތެރިކުރުމަށް ބޭނުންކޮށްފައިވާ ފަންނީ މަސައްކަތްތަކަށް ބޮޑެތި ގެއްލުންތަކެއް ލިބިފައިވާކަން ޤައުމީ ފެންވަރުގެ ދިރާސާތަކުން ކަށަވަރުވާ ކަމަށެވެ. މި ތަންތަން އިތުރަށް ހަލާކުވިޔަނުދީ ހިމާޔަތްކުރުމަށްޓަކައި، ކަމާބެހޭ ފަންނީ ދިރާސާތަކެއް ކުރުމާއި، ކުއްލި ޙާލަތުގައި އަޅަންޖެހޭ ރައްކާތެރިކަމުގެ ފިޔަވަޅުތައް އެޅުން މިހާރު ވަނީ ކޮންމެހެން ބޭނުންތެރިވެފައެވެ.
އީރާނުން ފާހަގަކޮށްފައިވާ ގޮތުގައި މިފަދަ އަމަލުތަކަކީ ބައިނަލްޢަގްވާމީ މުއާޙަދާތަކާ ކަނޑައެޅިގެން ޚިލާފު ކަންކަމެވެ. އޭގެ ތެރޭގައި އދ ގެ ސަލާމަތީ މަޖިލީހުގެ ގަރާރު 2347 (2017)، 1972 ވަނަ އަހަރުގެ ވޯލްޑް ހެރިޓޭޖް ކޮންވެންޝަން، އަދި ހަނގުރާމައިގެ ވަގުތުތަކުގައި ސަގާފީ ތަންތަން ހިމާޔަތްކުރުމާ ބެހޭ 1954 ވަނަ އަހަރުގެ ހޭޤް ކޮންވެންޝަން ހިމެނެއެވެ.
މި ސިޓީގައި އީރާނުން ވަނީ ޔުނެސްކޯގެ ކިބައިން ދިން ޙަމަލާތައް ކުށްވެރިކުރުމަށާއި، ސަގާފީ ބިނާތަކަށް އަމާޒުކޮށް ޙަމަލާދިނުން ހުއްޓާލުމަށް ގޮވާލަން އެދިފައެވެ. އަދި ޔުނެސްކޯގެ ތަޖުރިބާކާރުން ވަގުތުން އެ ޤައުމަށް ފޮނުވުމަށާއި އާސާރީ ތަންތަން އާބާތުރަފިލުވައި، އެ ތަންތަނުގެ މަޢުލޫމާތު ރައްކާތެރިކޮށް ބެލެހެއްޓުމުގައި އެހީތެރިވެދިނުމައްއެދިފައެވެ. އަދި ހަމަ އެހެންމެ ދުނިޔޭގެ ތަރިކަ ހިމާޔަތްކުރުމުގެ ބައިނަލްޢަގްވާމީ ނިޒާމުތައް ހަރަކާތްތެރިކުރުމަށް ގޮވާލާފައެވެ.
އެމެރިކާއިން އިސްވެ އީރާނަށް ޙަމަލާ ދޭން ފަށާފައި ވަނީ ބައިނަލްއަޤުވާމީ ޤާނޫނުތަކުގެ އިތުރުން އެމެރިކާގެ ދާޚިލީ ޤާނޫނުތަކާ ވެސް ޚިލާފަށެވެ. އަދި، ޤާނޫނުހަދާ މަޖިލިސް، ކޮންގްރެސްގެ ރުހުމާ ނުލައެވެ. މިއީ، އެމެރިކާގެ ރައީސް ޑޮނަލްޑް ޓްރަމްޕް، އޭނާ ކޮންޓުރޯލު ކުރާ ޔަހޫދީ ވެރިން ރުއްސުމަށް ޓަކައި ފަށްޓަވާފައިވާ ހަނގުރާމައެކެވެ. މި ކަން ހާމަވެގެންދާ އެއް ސަބަަބަކީ، މި ހަނގުރާމައިން އެމެރިކާއަށް ލިބޭނެ އެއްވެސް ފައިދާއެއް ނެތް ކަމުގައި މަސްރަޙް ދިރާސާ ކުރާ ފަރާތްތަކުން ޤަބޫލު ކުރުމެވެ. މި ކަމުގެ ފައިދާ އޮތީ ހަމައެކަނި ޔަހޫދީންނަށެވެ.