ބާސެލޯނާ ކަޓުވާލެވޭނެހާ ބާރު އެތްލެޓިކޯ މެޑްރިޑްގައި އެބަހުރި ކަމަށް އެ ޓީމުގެ ކޯޗު ޑިއެގޯ ސިމިއޯނޭ ބުނެފި އެވެ.
އޭނާ މިހެން ބުނީ ކޮޕާޑެލްރޭގެ ސެމީ ފައިނަލުގައި މިރޭ ބާސެލޯނާއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ.
އާޖެންޓީނާގެ ކޯޗު ބުނީ އޭނާގެ ޓީމު ސެމީގެ ފުރަތަމަ ލެގުގައި 4-0އިން މޮޅުވެފައިވީ ނަމަވެސް ބާސެލޯނާގެ ވަރުގަދަކަން ހަނދާން ނައްތާނުލާނެ ކަމަށެވެ.
"ބާސެލޯނާގެ ވަރުގަދަކަން އަހަރުމެންނަށް އެނގޭ. އަހަރުމެން މަސައްކަތް ކުރާނީ އެހެން މެޗުތަކަށް ވެސް ތައްޔާރުވާ ފަދައިން. ތަފާތެއް ނެތް. އަހަރުމެން މި ވަގުތު މި އޮތީ މި މެޗު ކާމިޔާބުކޮށް ފައިނަލަށް ދެވޭނެހާ ބާރުގައި،" ސިމިއޯނޭ ބުންޏެވެ.
އޭނާ ބުނީ ސްޕެނިޝް ލީގުގައި އެތްލެޓިކޯގެ ނަތީޖާތައް އެހާ ރަނގަޅު ނުވި ނަމަވެސް ކޮޕާ ޑެލްރޭ އާއި ޔޫރަޕިއަން ޗެމްޕިއަންސް ލީގުގައި އެތްލެޓިކޯގެ ނަތީޖާތައް ގޯސް ނޫން ކަމަށެވެ.
މިރޭގެ މެޗު އަމިއްލަ ދަނޑުގައި ކުޅޭތީގެ ބާސެލޯނާ ނުކުންނަނީ ނަތީޖާ އަނބުރާލަން ކުރިއަށްވުރެ ވަރުގަދަ އަޒުމެއްގަ އެވެ. ކޯޗު ހަންސީ ފްލިކް ކުޅުންތެރިންނަށް އިރުޝާދު ދީފައިވަނީ ކޮންމެ ހާފެއް ވެސް ވަކި މެޗެއްގައި ގޮތުގައި ވިސްނައިގެން ކުޅުމަށެވެ. މި ގޮތުން ފުރަތަމަ ހާފުގައި ދެ ގޯލު އަދި ފަހު ހާފުގައި ދެ ގޯލު ޖަހައި ނަތީޖާ ހަމަހަމަ ކުރަން އޭނާ ވަނީ ކުޅުންތެރިންނަށް އިރުޝާދު ދީފަ އެވެ.
މިރޭގެ މެޗަށް ނުކުންނައިރު ބާސެލޯނާގެ މުހިންމު ދެ ކުޅުންތެރިއަކު ވަނީ އަނިޔާގެ ސަބަބުން މެޗާ ވަކިވާން ޖެހިފަ އެވެ. އެއީ މިޑްފީލްޑަރު ފްރޭންކީ ޑިޔޮންގް އާއި ފޯވަޑް ރޮބަޓް ލެވޮންޑޯސްކީ އެވެ. ލެވެންޑޯސްކީގެ ލޮލަށް އަނިޔާވީ އެންމެ ފަހުގެ ފަރިތަކުރުންތަކުގަ އެވެ. ގަވީ އަނިޔާގައި ހުންނަތާ މިހާރު ފަސް މަހަށްވުރެ ގިނަ ވެއްޖެ އެވެ.
"މި ދެ ކުޅުންތެރިންގެ އިތުރުން މިޑްފީލްޑަރު ގަވީ ފަދަ ކުޅުންތެރިން ނެތުމަކީ ހަގީގަތުގައި ޓީމަށް އުނިކަން އަންނާނެ ކަމެއް. އެކަމަކު ތިބި ބަޔަކާއެކު އަހަރުމެން މަސައްކަތް ކުރާނީ މޮޅުވުމުގެ މުހިންމުކަން އެނގިގެން،" ހުސްވި ސީޒަނުގައި ބާސެލޯނާ ކާމިޔާބު ކުރި ތަށި ދިފާއު ކުރުމުގެ މުހިންމުކަން ފްލިކް ކިޔައިދިނެވެ.