ސްޕެނިޝް ލަލީގާގައި ރެއާލް މެޑްރިޑުން ގެޓާފޭއާ ދެކޮޅަށް ހޯމަ ދުވަހުގެރޭ ކުޅުނު މެޗުން ވީ ބަލީގެ ޒިންމާ ނަގާނީ ހަމައެކަނި އޭނާކަމަށް، ރެއާލް މެޑްރިޑްގެ ކޯޗު އަލްވާރޯ އާބެލޯއާ ބުނެފިއެވެ.
ލީގުގައި އަމިއްލަ ދަނޑުގައި 65,104 ސަޕޯޓަރުންގެ ކުރިމަތީގައި ކުޅެ ގެޓާފޭ އަތުން ރެއާލް ބަލިވީ 0-1 ގެ ނަތީޖާއަކުންނެވެ. މި ބައްޔާއެކު ރެއާލް އަށް ވަނީ، ލީގު ތާވަލުގެ އެއްވަނައިގައި އޮތް ބާސެލޯނާއާ ޕޮއިންޓަކާ ގާތަށް ޖެހިލަން ލިބުނު ފުރުސަތު ނަގާލާފައެވެ.
މެޗަށްފަހު މީޑިއާ އާ ވާހަކަދައްކަމުން އާބެލޯއާ ބުނީ، ލީގުގައި ރެއާލް އަށް ދެން ހޯދެން އޮތީ ޖުމްލަ 36 ޕޮއިންޓު ކަމަށާއި އެންމެ ބޮޑު އަމާޒަކީ އެ 36 ޕޮއިންޓު ހޯދުން ކަމަށެވެ. އަދި މިފަދަ ހާލަތެއްގައި ޓީމު އޮއްވައި، މިވަރުގެ ޓާގެޓެއް ކަނޑައެޅުން މިއީ ސަޕޯޓަރުންނަށް ގަބޫލުކުރަން އުނދަގޫވާނެ ކަމެއްކަން ވެސް އެނގޭ ކަމަށާއި އެހެންނަމަވެސް ގަބޫލުކުރަން ޖެހޭ ހަގީގަތަކީ ރެއާލް އަށްވެސް އަނިޔާގެ މައްސަލަތަކާއި އެހެނިހެން ގޮންޖެހުންތައް ވެސް ހުންނާނެކަން ކަމަށް ވެސް އާބެލޯއާ ބުންޏެވެ.
މި ބަލީގެ ޒިންމާ އެއްވެސް މީހަކު ނަގަންޖެހޭނަމަ އެ މީހަކީ އޭނާކަމަށް އާބެލޯއާ ބުނެފައިވެއެވެ.
މެޗާ ގުޅޭގޮތުން ވާހަކަދައްކަމުން އާބެލޯއާ ބުނީ، މެޗުގައި ގެޓާފޭއަށްވުރެ ހުސް ފުރުސަތުތައް ރެއާލް އަށް ލަނޑުޖަހަން ލިބުނު ކަމަށާއި މެޗުގައި ދުޝްމަނަކަށްވީ ނަސީބު ކަމަށް އޭނާ ބުންޏެވެ.
ލީގު ހޯދިދާނެތޯ އަހައި ކުރި ސުވާލަށް ޖަވާބުދެމުން އާބެލޯއާ ބުނީ، ބާސާއާ ދެމެދުގައި އޮތީ އަރާ ހަމަނުކުރެވޭނެ ވަރުގެ ނަތީޖާއެއް ނޫން ކަމަށާއި، ބާކީ އޮތް 12 މެޗުން ނަތީޖާ ނެރެގެން ރެއާލް އަށް އަދިވެސް ލީގު ޓައިޓަލް ހޯދޭނެ ކަމަށާއި އެ އަޒުމުގައި ހުރިހާ އެންމެން ގުޅިގެން މަސައްކަތްކުރާނެކަމަށް ވެސް އާބެލޯއާ ބުންޏެވެ.
ލީގު ޓައިޓަލްއާ މެދު އުއްމީދު ކަނޑާނުލާކަމަށް އާބެލޯއާ ބުނިއިރު، މީގެ ދެ ހަފްތާއެއްހައި ދުވަސް ކުރިން ރެއާލް އަށް ވަނީ ލީގު ތާވަލުގެ އެއްވަނައިގައި ލީޑު ނަގަން ވެސް ލިބިފައެވެ. އެހެންނަމަވެސް އޮސަސޫނާ އާ ދެކޮޅަށް ކުޅުނު އެ މެޗުގައި ވެސް ރެއާލް ވީ ބައްޔެވެ.
ޖެހިޖެހިގެން ދެވަނަ ބައްޔާއެކު ރެއާލްގެ ކުރިއެރުމަށް މަޑުޖެހުމެއް އައި އިރު ރެއާލް މިވަގުތު ލީގު ތާވަލުގެ ދެވަނައިގައި އޮތީ ކުޅުނު 26 މެޗުން 60 ޕޮއިންޓާއެކުއެވެ. އެއްވަނައިގައި އޮތް ބާސާއަށް، 26 މެޗުން 64 ޕޮއިންޓު ލިބިފައިވެއެވެ.