ޔަހޫދީންނާއި އެމެރިކާ ގުޅިގެން އީރާނަށް ދެމުންދާ ނިރުބަވެރި ޙަމަލާތަކުގައި އެ ޤައުމުގެ ހަސްފަތާލުތަކާއި، ޞިއްޙީ މަރުކަޒުތަކުގެ އިތުރުން މަދަރުސާތަކަށް ބޮޑެތި ގެއްލުންތަކެއް ދެމުންދާތީ، އެ ކަން ކުށްވެރިކުރުމަށް އީރާންގެ އިދާރާތަކުން ބައިނަލްއަޤްވާމީ މުޖުތަމަޢަށް ގޮވައިލައިފިއެވެ. ފެބުރުވަރީ 28ވަނަ ދުވަހު ޔަހޫދީންނާއި އެމެރިކާއިން އީރާނާ ދެކޮޅަށް ފެށި ހަނގުރާމައިގައި ޝަހީދު ކޮށްލާފައިވާ މީހުންގެ އަދަދު ވަނީ 555 އަށް އުފުލިފައެވެ. އޭގެ ތެރޭގައި، އެ ޤައުމުގެ ރޫހީ އެންމެ މަތީ ވެރިޔާ، އާޔަތުالله ޢަލީ އަލް-ޚާމަނާޢީއާއި އޭނާގެ ޢާއިލާގެ މެންބަރުންގެ އުތުރުން އީރާންގެ އަސްކަރިއްޔާގެ އިސްވާރުންގެ ތެރެއިން ބަޔަކު ހިމެނެއެވެ.
އީރާނުގެ ރެޑް ކްރެސެންޓު ސޮސައިޓީން ބުނީ، ޔަހޫދީންނާއި އެމެރިކާއިން ދީފައިވާ ޙަމަލާތަކުގައި ގިނަ އަދަދެއްގެ ޞިއްޙީ މަރުކަޒުތަކަކާއި ހަސްފަތާލުތަކަކަށް ބޮޑެތި ގެއްލުންތަކެއް ލިބިފައިވާ ކަމުގައެވެ. އޭގެ ތެރޭގައި، ވެރިރަށް ތަހްރާންގައި ހުންނަ ގާންދީ ހަސްފަތާލު ހިމެނޭއިރު، ޙަމަލާތަކުގައި އެ ހަސްފަތާލުގެ އައިވީއެފްގެ ޚިދުމަތްތައް ދޭ ޑިޕާޓްމަންޓް ވަނީ މުޅިން ހަލާކު ކޮށްލާފައެވެ. އަދި، އެ ޚިދުމަތްތައް ދިނުމަށް ބޭނުން ކުރާ އާލާތްތައް ވަނީ ހަލާކު ކޮށްލާފައެވެ.
މީގެ އިތުރުން، ޔަހޫދީންނާއި އެމެރިކާގެ ޙަމަލާތަކުގައި ގެއްލުން ލިބިފައިވާ މަރުކަޒުތަކުގެ ތެރޭގައި ޚަތުމް އަލް-އަންބިޔާއި ހަސްފަތާލާއި، މުޠަހާރީ ހަސްފަތާލާއި، ވަލިއަޞްރު ހަސްފަތާލު ހިމެނެއެވެ. އަދި، އެ މަރުކަޒުތަކުގައި ފަރުވާ ދެމުން ދިޔަ ގިނަ އަދަދެއްގެ ބަލިމީހުންނާއި މުވައްޒަފުން އެހެން މަރުކަޒުތަކަށް ބަދަލު ކުރަން ޖެހުނެވެ. އީރާނުގެ ހުޅަނގުގައި އޮތް އަލް-އަލްވާޛުގެ އަބޫއިޛާރު ކުޑަކުދިންގެ ހަސްފަތާލުގެ އިތުރުން އިރުމަތީ އަޒަރްބައިޖާން، ސިލްތާން-ބަލޫހިސްތާން އަދި ހަމްދާން ޕުރޮވިންސުގައި ހުރި ޞިއްޙީ މަރުކަޒުތަކާއި، ވެރިރަށް ތަހްރާންގައި ހުރި އިމަޖެންސީ ޞިއްޙީ ފަރުވާދޭ މަރުކަޒަކަށް ވެސް ޔަހޫދީންނާއި އެމެރިކާގެ ވައިގެ ޙަމަލާތަކުގައި ވަނީ ބޮޑެތި ގެއްލުންތަކެއް ދީފައެވެ.
އީރާނާ ދެކޮޅަށް ޔަހޫދީންނާއި އެމެރިކާ ގުޅިގެން ފަށާފައިވާ ޣައިރުޤާނޫނީ ހަނގުރާމައިގައި ޝަހީދު ކުރަމުންދާ މީހުންގެ އަދަދު ވެސް ދަނީ އިތުރުވަމުންނެވެ. އީރާންގެ ރެޑް ކްރެސެންޓުން ބުނީ، އެ ޤައުމުގެ 131 ސަރަޙައްދަކަށް ދީފައިވާ ޙަމަލާތަކުގައި މަދުވެގެން 555 މީހުން ވަނީ ޝަހީދު ކޮށްލާފައިވާ ކަމުގައެވެ. މީގެ ތެރޭގައި އެންމެ ގިނަ ބަޔަކު ޝަހީދު ކޮށްލާފައި ވަނީ ދެކުނުގެ ސިޓީއެއް ކަމަށްވާ މީނާބްގައި ހުންނަ އަންހެން ކުދިންގެ މަދަރުސާއަކަށް ދީފައިވާ ޙަމަލާގައެވެ. މި ޙަމަލާގައި 165 މީހުން ޝަހީދުކޮށްލައި، 95 މީހުން ޒަޚަމު ކޮށްލާފައިވާއިރު، މީގެ ތެރޭގައި ގިނައީ ކުޑަކުދިންނެވެ. މީގެ އިތުރުން ތަހްރާންގެ ނަރްމާކް ސަރަޙައްދުގެ ހައި ސްކޫލަކަށް ދިން ޙަމަލާއެއްގައި ވެސް މަދުވެގެން ދެ ކުޑަކުދިން ވަނީ ޝަހީދު ކޮށްލާފައެވެ.
ޔަހޫދީންނާއި އެމެރިކާގެ ނިރުބަވެރި ޙަމަލާތަކާ މެދު ބައިނަލްއަޤުވާމީ ޖަމުޢިއްޔާތަކުން ދަނީ އިންތިހާއަށް ކަންބޮޑުވުން ފާޅުކުރަމުންނެވެ. އީރާނުގެ ރެޑް ކްރެސެންޓް ސޮސައިޓީގެ އިސްވެރިޔާ ޕީރް ޙުސައިން ކުލިވަންދް ވަނީ، އިންޓަނޭޝަނަލް ކޮމިޓީ އޮފް ދި ރެޑް ކްރޮސް އެންޑް ރެޑް ކްރެސެންޓް ސޮސައިޓީޒް (އައިސީއާރްސީ)ގެ ރައީސަށް ސިޓީއެއް ފޮނުއްވައި، ކުޑަކުދިންނާއި ޞިއްޙީ އަދި ތަޢުލީމީ މަރުކަޒުތަކަށް އަމާޒުކޮށް ދެމުންދާ ޙަމަލާތައް ކުށްވެރިކުރުމަށް ގޮވައިލައްވާފައެވެ. އަދި ގެއްލުން ލިބުނު މަރުކަޒުތަކަކީ އަސްކަރީ ބޭނުމަށް ބޭނުންކުރާ ތަންތަން ނޫންކަން ފާހަގަކުރައްވައި، ޖެނީވާ މުޢާހަދާގެ ދަށުން މި ފަދަ ކަންކަން ހުއްޓުވުމަށް ވަގުތުން ފިޔަވަޅު އެޅުމަށް އޭނާ ވަނީ އެދިވަޑައިގެންފައެވެ.
ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިއޭސޮސް ވެސް ވަނީ ޔަހޫދީންނާއި އެމެރިކާގެ ޙަމަލާތަކާ މެދު ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ، ހަސްފަތާލުތަކަށް ގެއްލުން ލިބުނު ކަމުގެ ރިޕޯޓުތަކަކީ "ވަރަށް ބޮޑަށް ކަންބޮޑުވާ" ކަމެއް ކަމަށާއި، މި ހާދިސާތައް ކަށަވަރު ކުރުމުގެ މަސައްކަތް އެކުވެރި ދައުލަތްތައް (އދ)ގެ އޭޖެންސީތަކުން ކުރަމުންދާ ކަމުގައެވެ.