އެމެރިކާއާއި ޔަހޫދީން އީރާނާ ދެކޮޅަށް ކުރަމުންދާ ހަނގުރާމަ ފުޅާވަމުންދާތީ، އީރާނުގެ ސަތޭކައަށްވުރެ ގިނަ ރައްޔިތުން ތުރުކީވިލާތުގެ ބޯޑަރު ހުރަސްކޮށް އެތެރެވަމުންދާ ކަމަށް ރިޕޯޓުކޮށްފިއެވެ. ތުރުކީވިލާތައް އެތެރެވި މީހުން ބުނި ގޮތުގައި ތެހެރާނުގެ މަސްރަޙު އޮތީ ބިރުވެރިކަމެއްގެ ތެރޭގައެވެ.
ތުރުކީވިލާތުން ބުނެފައިވަނީ، ދެ ޤައުމުގެ ދެމެދުގައި އޮންނަ ތިން ބޯޑަރުން އާންމުކޮށް ކުރާ ދަތުރުތައް ވަގުތީ ގޮތުން މެދުކަނޑާލާފައިވާ ކަމަށެވެ. އެވަގުތު ތުރުކީވިލާތުން ހުއްދަ ދެމުންދިޔައީ ހަމައެކަނި އެ ޤައުމުގެ ރައްޔިތުންނަށާއި އެހެން ޤައުމުތަކުގެ މީހުންނަށް އެކަންޏެވެ. ބައެއް ދަތުރުވެރިން މައުލޫމާތު ދިން ގޮތުގައި އީރާނުގެ ބައެއް ރައްޔިތުން ތުރުކީވިލާތައް އެތެރެވުމަށް ހުރަސްތަކެއް ކުރިމަތިވިއެވެ.
ނަމަވެސް، ހޯމަ ދުވަހުގެ މެންދުރުފަހު އީރާނުގެ ފަރުބަދަމަތީ ސަރަހައްދުތަކުގައި ސިލްސިލާކޮށް ސްނޯ ފައިބަމުން ދިޔަ ވަގުތު، "ކަޕިކޯއި" ބޯޑަރުން އީރާނުގެ ރައްޔިތުން ތުރުކީވިލާތައް އެތެރެވާން ފެށިއެވެ. "ތެހެރާނުގެ ޙާލަތު މިހާރު އޮތީ ވަރަށް ނާޒުކު ފައްތަރެއްގައި،" ތެހެރާނުން އައި، ނަން ހާމަކުރަން ބޭނުންނުވާ މީހަކު ބުންޏެވެ. އޭނާގެ އަނތްބަކާއި ދަރިން ތިބީ އިސްތަންބޫލްގައެވެ. އޭނާ އިތުރަށް ބުނީ، ތެހެރާންއަށް ޙަމަލާތަކެއް އަމާޒުވަމުންދާތީ އެންމެންވެސް ތިބީ ބިރުންކަމުގައެވެ. އަދި މީގެ އިތުރުން ހަނގުރާމަ ފެށުނު ފުރަތަމަ ދުވަހު ގޭގެއަށް ބޭނުންވާ ސާމާނު ގަތުމަށް އޭނާ ދިޔައިރު، ފިހާރަތައް އޮތީ ވަރަށް ބޮޑަށް ތޮއްޖެހިފައި ކަމަށްވެސް އޭނާ ބުންޏެވެ.
ތުރުކީވިލާތުގެ ބޯޑަރު ކައިރީގައި އޮންނަ "ގަޒްވިން" ސަރަޙައްދަށް ނިސްބަތްވާ ބިނާލީ ކިލިކް ބުނި ގޮތުގައި، އެ ސަރަހައްދުގައި އާންމު ދިރިއުޅުން ކުރިއަށްދިޔަ ނަމަވެސް، އަސްކަރީ މަރުކަޒުތަކަށް ދެމުންދާ ހަމަލާތަކުގެ ސަބަބުން ރައްޔިތުންގެ ދިރިއުޅުމަށް ބޮޑެތި ދަތިތަކެއް ކުރިމަތިވަމުންދެއެވެ. "އެންމެން ތިބީ ވަރަށް ބޮޑަށް ބިރުގަނެ، ގޭގޭގައި ބަންދުވެފައި،" ކިލިކް ބުންޏެވެ. "ބޮން އެޅުމުގެ ސަބަބުން ގޮވާ އަޑުތައް ކައިރި ސަރަހައްދުތަކުން އިވެމުންދިޔަ،" މަޑުމަޑުން ސްނޯ ފައިބަމުންދިޔަ ވަގުތެއްގައި، ބޯޑަރު ސަރަހައްދުން މީހުން ފޮށިތައް ހިފައިގެން ބަސްތަކަށް އެރުމަށް ދިޔަ މަންޒަރު ފެންނަމުންދަނިކޮށް އޭނާ ކިޔައިދިނެވެ.
"ކާބޯތަކެތީގެ އެއްވެސް ދަތިކަމެއް ނެތް. މިވަގުތު މީހުންނަށް އޮތް އެންމެ ބޮޑު ކަންބޮޑުވުމަކީ ދުރު އަދި ކައިރި ތަންތަނަށް ދަތުރުކުރުމަށް ބޭނުންވާ ތެޔޮ ހޯދުން. ޕެޓްރޯލް ޝެޑްތަކުގައި ބޮޑެތި ކިއޫތައް އެބައޮތް،" އޭނާ އިތުރަށް ބުންޏެވެ.
މީގެ ކުރިން ތުރުކީވިލާތުގެ ޓްރޭޑް މިނިސްޓަރު އުމަރު ބޯލާތު ވިދާޅުވީ، އީރާނުގެ ރައްޔިތުން ތުރުކީ މަގުން އެނބުރި ޤައުމަށް ދިއުމުގެ ހުއްދަ އީރާނުން ދެމުންދާ ކަމަށެވެ. އަދި ބޯޑަރުގެ ތިން ގޭޓުންވެސް ވިޔަފާރި މުދާ އުފުލުމުގެ މަސައްކަތް ވަކި އުސޫލުތަކެއްގެ ދަށުން ކޮންޓްރޯލް ކުރެވިގެން ކުރިއަށްދާކަމަށް އޭނާ ވިދާޅުވިއެވެ.
ތުރުކީވިލާތުގެ ބޯޑަރު ހުރަސްކުރުމުގެ ޚިދުމަތްތަކާއި ވިޔަފާރީގެ މުއާމަލާތްތައް މެދުނުކެނޑި ކުރިއަށް ގެންދިއުމަށްޓަކައި، އަޅުގަނޑުމެންގެ ހުރިހާ ޔުނިޓްތަކެއް މިހާރު ތިބީ ވަރަށް މަތީ ތައްޔާރީ ހާލަތެއްގައި،" ބޯލާތު ވިދާޅުވިއެވެ.