އެމެރިކާއިން އީރާނަށް ޙަމަލާ ދިނުމަށް ތާއީދުކުރަނީ އެމެރިކާގެ ކޮންމެ ހަތަރު ރައްޔިތުންގެ ތެރެއިން އެކަކު ކަަމަށް ޚިޔާލު ހޯދުމުގެ ދިރާސާއަކުން ދައްކައިފިއެވެ.
ދިރާސާގައި ބައިވެރިވި މީހުންގެ ތެރެއިން ދެބައިކުޅަ އެއްބައި މީހުން ބުނީ އަސްކަރީ ބާރު ބޭނުންކުރުމަށް އެ ޤައުމުގެ ރައީސް ޑޮނަލްޑް ޓްރަމްޕް ޝައުޤުވެރިވެވަޑައިގަންނަވާލެއް މާ ބޮޑު ކަމަށެވެ.
އީރާން ބަލިކަށިވާތަން ދެކެން ބޭނުންވާ، އަދި ޚާރިޖީ ސިޔާސަތުތަކަށް އިސްކަންދޭ ފަރާތްތަކުން ދަނީ އީރާނަށް ހަމަލާ ދިނުމަށް ޓްރަމްޕް ނިންމެވި ނިންމެވުމަށް މަރުޙަބާ ކިޔަމުންނެވެ. ނަމަވެސް ޓްރަމްޕް އީރާނަށް ޙަމަލާ ދީފައި ވަނީ އޭނާގެ އަރިސް ބޭފުޅުން އެކަމާ ދެކޮޅަށް ނަސޭހަތްތެރިވަމުން ދަނިކޮށެވެ. އެ ބޭފުޅުން ދިޔައީ އީރާނަށް ޙަމަލާ ދީފި ނަމަ ހަމަނުޖެހުން ބޮޑުވެ، މި އަހަރުގެ ނޮވެމްބަރު މަހުގެ ތެރޭގައި ބޭއްވުމަށް ހަމަޖެހިފައިވާ އެމެރިކާގެ މެދު ދައުރުގެ އިންތިޚާބަށް އޭގެ ނޭދެވޭ އަސަރުކުރާނެ ކަމުގެ އިންޒާރު ދެމުންނެވެ. ޚާރިޖީ ސިޔާސަތުތަކަށް އިސްކަން ދިނުމުގެ ސަބަބުން އިންތިޚާބުގައި ނާކާމިޔާބީއާ ކުރިމަތިލާން ޖެހުމުގެ ފުތުޞަތު އޮތް ކަމަށް އެ ބޭފުޅުން ޤަބޫލުކުރާ މައިގަނޑު ސަބަބަކީ، އެމެރިކާގެ ރައްޔިތުން ދިރިއުޅުމުގެ އަގުބޮޑުވުން ފަދަ އަމިއްލަ ޤައުމަށް ކުރިމަތިވެފައިވާ މައްސަލަތަކަށް ޙައްލު ހޯދުމަށް ބޭނުންވެފައި ތިބިލެއް ބޮޑުވުމުންނެވެ. އަދި ބޭރު ޤައުމަކާއެކު ކުރާ ހަނގުރާމައަކަށް ރައްޔިތުންގެ ޝައުޤެއް ނެތުމެވެ.
އީރާނަށް ޙަމަލާ ދިނުމުގެ ކުރިން ޓްރަމްޕް ވަނީ އެ ޙަމަލާ ދިނުމުން ޓްރަމްޕްގެ ހައިބަތާއި ވަރުގަދަކަން ޤައުމުގެ ރައްޔިތުންގެ ކުރިމަތީގައި އިތުރުވާނެތޯ އޭނާގެ މުޝީރުންކުރެ ތަކުރާރުކޮށް އައްސަވައިފައެވެ. ނަމަވެސް އޭނާގެ މުޝީރުން ވަނީ ޙަމަލާ ދިނުމުން އުފެދޭ ޙާލަތު އެމެރިކާއަށް ކޮންޓްރޯލް ކުރެވިދާނެ ކަމުގެ ޔަޤީންކަމެއް ނެތް ކަމަށް އެމެރިކާގެ ޖާސޫސީ އިދާރާތަކުން ބުނެފައިވާ ކަމަށް ޓްރަމްޕްގެ އަރިހުގައި ދަންނަވައިފައެވެ. އަދި ޙަމަލާއަށް ފަހު އުފެދޭ ޙާލަތަށް ސިޔާސީ ގޮތުން ސަރުކާރުން ޒިންމާވާން ޖެހިދާނެ ކަމުގެ އިންޒާރު ވެސް އެ ބޭފުޅުން ދެއްވާފައިވެއެވެ. ނަމަވެސް ޓްރަމްޕް ބުރެވެވަޑައިގަތީ ޙަމަލާ ދޭން ނިންމުމުގެ ސަބަބުން ދިގު މުއްދަތަށް އެ ކަމުގެ ނޭދެވޭ އަސަރު ދެމިގެން ދިޔަ ކަމުގައި ވި ނަމަވެސް، އޭނާއަކީ ވަރުގަދަ ލީޑަރެއްގެ ގޮތުގައި ދެކެވޭނެ ކަމަށް ނިންމަވައި އެ މަގުން ކުރިއަށް ވަޑައިގަތުމަށެވެ.
އެމެރިކާގެ ރައްޔިތުންގެ މެދުގައި ޓްރަމްޕްއާއި ސަރުކާރަށް އޮންނަ ތާއީދު ކުއްލިއަކަށް ގެއްލޭނެ ކަމަށް އެެއްވެސް ބަޔަކު ޤަބޫލެއް ނުކުރެެއެވެ. އޭގެ ބަދަލުގައި ޙަމަލާތައް ގިނަ ދުވަހަށް ދެމިގެން ދިޔުމާއި، އެމެރިކާއަށް އީރާނުގެ ޙަމަލާތައް ރައްދުުވުމާއި، ހަމަނުޖެހުމުގައި އެމެރިކާގެ ރައްޔިތުން މަރުވުމާއި، ތެލުގެ އަގަށް ބަދަލު އަންނަން ފެށުމުން މަޑުމަޑުން މަގުބޫލުކަން ގެއްލެމުން ދާނެ ކަމަށް ބެލެވެއެވެ.
ވައިޓް ހައުސްގެ އޮފިޝަލުންނާއި ޓްރަމްޕްގެ މުޝީރުން ނަސޭހަތްތެރިވަމުން ދިޔައީ ޞިއްޙީ ފަރުވާއާއި ދިރިއުޅުމުގެ އަގު ދަށް ކުރުން ފަދަ އެމެރިކާގެ އާންމު ރައްޔިތުން އެ ކަންކަމާ މެދު ކަންބޮޑުވާ މައްސަލަތަކަށް ސަމާލުކަން ދިނުމަށެެވެ. އެއާއެކު ޙަމަލާތައް ދިނުމުގެ ހަތަރު ދުވަސް ކުރިން ޓްރަމްޕް ވަނީ އެ މައްސަލަތަކަށް އަލިއަޅުވާލައްވަވައި ވާަހަކަ ދައްކަވައިފައެވެ. ނަމަވެސް މިހާރު އަނެއްކާ ވެސް ސަމާލުކަން އޮތީ އެ މައްސަލަތަކަށް ނޫން ކަމަށް މި ވަނީ ހާމަވެގެން ގޮސްފައެވެ. ހަތަރެއް ނުވަތަ ފަސް ހަފްތާއަށް އީރާނާ ދެކޮޅަށް ހިންގަމުންދާ އޮޕަރޭޝަން ދެމިގެން ދާނެ ކަމަށް ޓްރަމްޕް ވަނީ ވިދާޅުވެފައެވެ. އަދި ޙަމަލާތަކުގައި އެމެރިކާގެ އިތުރު މަރުވުން އެކަށީގެންވާ ކަމަށް ވެސް އޭނާ ވަނީ ވިދާޅުވެފައެވެ.