ކުނަހަންދޫ ކްރިކެޓް: ކުނަހަންދޫ ގާލްސްއަށް މޮޅެއް

ކްރިކެޓް ބޯޑް އޮފް މޯލްޑިވްސް (ސީބީއެމް)އިން އިންތިޒާމުކޮށްގެން ލ. ކުނަހަންދޫގައި ކުރިއަށްދާ ރަމަޟާން ކްރިކެޓް ކާނިވަލުގެ ހަވަނަ ދުވަހުގެ މެޗް މުބާރާތުގައި ވާދަކުރަމުންދާ ހަމައެކަނި އަންހެން ޓީމުކަމަށްވާ ކުނަހަންދޫ ގާލްސް ޓީމުން ކާމިޔާބުކޮށްފިއެވެ.

ވާދަވެރިކޮށް ކުރިއަށްދިޔަ މިމެޗު އެޓީމުން ކާމިޔާބުކޮށްފައިވަނީ އިދިކޮޅުން ނުކުތް ކުރުނބާ އެސްސީ ބަލިކޮށްގެންނެވެ.

މެޗުގެ ގުރުދިމާވެގެން ކުރުނބާ އެސްސީން ގަސްތުކުރީ ކުޅެންށެވެ. އެޓީމުން ކުޅެން އަރާ 8 އޯވަރު ތެރޭ 7 ވިކެޓަށް ހެދިފައިވަނީ 59 ލަނޑެވެ. އެޓީމުން އެންމެ އެންމެ ރަނގަޅަށް ކުޅުނީ މާޒިޔާ ސްޕޯޓްސް އެންޑް ރެކްރިއޭޝަން އަދި ރާއްޖޭގެ ޤައުމީ ފުޓްބޯޅަ ޓީމުގެ ޑިފެންޑަރު ހުސައިން ސިފާއުއެވެ. މިމުބާރާތުގައި ވެސް މޮޅު ކުޅުމެއް ދައްކަމުން އަންނަ ސިފާއު ވަނީ 21 ލަނޑު ހަދާފައެވެ.

ކުނަހަންދޫ ގާލްސް ޓީމުން އެންމެ ރަނގަޅަށް އުކީ 15 ލަނޑަށް 6 ވިކެޓް ނެގި، ހަފްސާ ޢަބްދުﷲ އެވެ.

ޖަވާބުގައި ކުނަހަންދޫ ގާލްސް ޓީމުން ކުޅެން އަރާ 6 އޯވަރު، 3 ބޯޅައަށް 62 ލަނޑު ހަދާ މެޗުވަނީ ކާމިޔާބުކޮށްފައެވެ. އެޓީމުން އެންމެ ރަނގަޅަށް ކުޅުނީ 36 ލަނޑު ހެދި ހަފްސާ ޢަބްދުﷲ އެވެ. އަދި ކުރުނބާ އެސްސީއިން އެންމެ ރަނގަޅަށް އުކާފައިވަނީ އަހުމަދު ނާޒިމް އެވެ. މިމެޗުގެ މޮޅު ކުޅުންތެރިޔާގެ ޝަރަފު ހޯދާފައިވަނީވެސް ކުނަހަންދޫ ގާލްސް ޓީމުގެ ކެޕްޓަން ހަފްސާ ޢަބްދުﷲ އެވެ.

ފޯރިއާއި އެކު ކުރިއަށްދާ ކުނަހަންދޫ ކުރިކެޓް ކާނިވަލުގެ ހަތްވަނަ ދުވަހުގެ މެޗުގައި ވާދަކުރާނީ ޓީމް ޑީއެކްސްއާއި ޓީމް ވިޔަޒޯރުއެވެ. ޓީމް ޑީއެކްސްއިން ވަނީ މިމުބާރާތުގައި މިހާތަނަށް ވާދަކުރި ހުރިހާ މެޗަކުން މޮޅުވެ 6 ޕޮއިންޓާއި އެކު ތާވަލުގެ އެއްވަނައިގައި ހަމަޖެހިލާފައެވެ. އެޓީމާއި ވާދަކުރަން އިދިކޮޅުން ނުކުންނަ ޓީމް ވިޔަޒޯރަށް ލިބިފައި ވަނީ 3 ޕޮއިންޓެވެ.

ކުނަހަންދޫ ކްރިކެޓް ކާނިވަލުގައި ޖުމްލަ 7 ޓީމަކުން ވާދަކުރެއެވެ. އެއީ ކުނަހަންދޫ ބޯއިޒް، ކުނަހަންދޫ ގާރލްސް، ކުރުނބާ އެސްސީ، ކަދުރު އެސްސީ، ވިޔަޒޯރު، ޓެން ސްޓަރ އަދި ޓީމް ޑީއެކްސްއެވެ.

ކުނަހަންދޫގައި ކުރިއަށްދާ މައިލޯ ރަމަޟާން ކްރިކެޓް ކާނިވަލުގެ ކުޅުން ކުރިއަށްދަނީ މިދިޔަމަހުގެ 23 އިން މިމަހުގެ 15 ވަނަ ދުވަހުގެ ނިޔަލަށް ކުނަހަންދޫ ކްރިކެޓް ދަނޑުގައެވެ. ކްރިކެޓްގެ ފޯރި ގަދަ ކުނަހަންދޫ އަކީ ވަކި އުމުރެއްނެތި ދެ ޖިންސުން ކްރިކެޓްގައި ހަރަކާތްތެރިވަމުން އަންނަ ރަށެއްކަން ފާހަގަކުރެވެއެވެ. އަދި ރާއްޖޭގެ ޤައުމީ އަންހެން ކްރިކެޓް ޓީމުގެ ގިނަ ކުޅުންތެރިންނަކީވެސް ކުނަހަންދޫއަށް ނިސްބަތްވާ ކުޅުންތެރިންނެވެ.