ޔަހޫދީންނާއި އެ މީހުންގެ އެންމެ ބޮޑު މަދަދުގާރު، އެމެރިކާ ގުޅިގެން އިސްލާމީ ދައުލަތް، އީރާނާ ދެކޮޅަށް ހަނގުރާމަ ފެށުމުގެ ސަބަބުން އީރާނުގެ ސިޔާދަތާއި މިނިވަންކަން އަދި އިސްތިޤުލާލު ޙިމާޔަތް ކުރުމުގެ ގޮތުން ދެމުންދާ ޙަމަލާތަކުގައި ސާބިތުކަމާ އެކު ދެމިތިބި ކަން ހާމަކޮށްދެމުން އެބަދެއެވެ. އީރާނާ ދެކޮޅަށް ފެށި ހަނގުރާމައިގެ ފަހަތުގައި އޮތީ ޔަހޫދީިންގެ ގޮނޑިކޮއްކޮ ސަރުކާރަކުން ވެރިކަން ކުރާ އެމެރިކާ އަދި ރައީސް ޑޮނަލްޑް ޓްރަމްޕެވެ. އަދި، ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫއެވެ.
ފެބުރުވަރީ 28ވަނަ ދުވަހު ފެށި ހަނގުރާމައިގައި ތެރެއިން އެމެރިކާގެ އަސްކަރިއްޔާއާއި ޔަހޫދީ ފައުޖުން ދަނީ އީރާންގެ ވެރިރަށް ތަހްރާނާއި ޢާންމުން ދިރިއުޅޭ އެހެން ބޮޑެތި ރަށްތަކަށް ވައިގެ ޙަމަލާ ދެމުންނެވެ. އެ ޙަމަލާތަކުގައި އީރާންގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަނާޢީ ވަނީ ޝަހީދު ކޮށްލާފައެވެ. އަދި، އެ މަނިކުފާނުގެ ޢާއިލާގެ ގިނަ މެންބަރުންތަކެއްގެ އިތުރުން އީރާންގެ ދިފާޢީ އިދާރާތަކާއި އަސްކަރިއްޔާގެ އިސްވާރުންގެ ތެރެއިން ބަޔަކު ޝަހީދު ކޮށްލާފައެވެ. އެމެރިކާއާއި ޔަހޫދީންގެ ޙަމަލާތަކުގައި އީރާންގެ ޢާންމުންގެ ގިނަ އަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ. އޭގެ ތެރޭގައި އަންހެން ކުދިންގެ މަދަރުސާއެއްގައި ކިޔަވާ ގިނަ އަދަދެއްގެ ދަރިވަރުން ވެސް ހިމެނެއެވެ.
ބަދަލު ހިފުމުގެ ގޮތުންނާއި، އީރާންގެ މިނިވަންކަން ދިފާޢު ކުރުމުގެ ގޮތުން އެ ޤައުމުގެ އަސްކަރިއްޔާއިން ވަނީ ޔަހޫދީންނާއި އެމެރިކާގެ އަމާޒުތަކަށް ޙަމަލާ ދޭން ފަށާފައެވެ. އަދި، އެމެރިކާއަށް ވާގިވެރިވާ ޤައުމުތަކަށް ވެސް ޙަަމަލާތައް އަމާޒު ކުރަން ފަށާފައެވެ. އަވައްޓެރި ޤައުމުތަކަށް ދެމުންދާ ޙަމަލާތައް އަމާޒު ކުރަމުން ދަނީ އެމެރިކާގެ އަސްކަރީ މަރުކަޒުތަކަށް ކަމުގައި އީރާނުން ބުނެއެވެ. އީރާނުން ޤަބޫލު ކުރާ ގޮތުގައި، ގަލްފުގެ ޤައުމުތަކުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަކީ އިސްތިޢުމާރީ ބާރުން ފޭރިގަނެފައިވާ ބިންތަކެކެވެ. އަދި، އެ މަރުކަޒުތަކުގެ ސިޔާދަތީ ބާރު އޮތީ އެމެރިކާގެ އަތްދަށުގައެވެ.
ޔަހޫދީންގެ ރަށްތަކަށް މެދުކެނޑުމެއް ނެތް މިސައިލް ޙަމަލާތައް
އެ ތަންތަނަށް އަމާޒުކޮށް ދެމުންދާ ވަރުގަދަ، އަދި މެދުކެނޑުމެއް ނެތް ޙަމަލާތަކުގައި އީރާނުން ދަނީ ގިނަ އަދަދެއްގެ ބެލިސްޓިކް މިސައިލާއި އަސްކަރީ ޑްރޯން ބޭނުން ކުރަމުންނެވެ. އެމެރިކާގެ ބާރުގަދަ ދިފާޢީ ހަތިޔާރު ބޭނުން ކޮށްގެން އީރާންގެ ޙަމަލާތައް ދިފާޢު ކުރުމަށް ނުކުޅެދިފައިވާއިރު، އެ ޙަމަލާތަކުގައި އެންމެ ބޮޑު ގެއްލުމެއް ލިބިފައި ވަނީ ޒަޔަނިސްޓު އިސްރާއީލުގެ ރަށްތަކަށެވެ. ހަނގުރާމަ ފެށި ފަހުން އިސްރާއީލުގެ ރަށްތަކުގައި ދިރިއުޅޭ ޔަހޫދީންގެ ގިނަ ބަޔަކު ތިބީ ބިންގަރާސްތަކުގައި ފިލައެވެ. ނަމަވެސް، އެ ފަދަ ބިންގަރާސްތަކަށް ވެސް އީރާނުން ދަނީ ޙަމަލާތައް އަމާޒު ކުރަމުންނެވެ.
މި ވަގުތު އީރާންގައި ވެރިކަން ކުރަމުން ދަނީ ރައީސް މަސްޢޫދު ޕީޒިޝްކިޔާން ހިމެނިވަޑައިގަންނަވާ ތިން މެންބަރުންގެ މައްޗަށް އެކުލެވިގެންވާ މަޖިލީހަކުންނެވެ. ޚާމަނާޢީގެ ބަދަލުގައި ރޫހީ އެންމެ މަތީ ވެރިޔާގެ މަޤާމަށް ބޭފުޅަކު ޢައްޔަން ކުރުމުގެ މަސައްކަތް، އީރާންގެ މުޝީރުންގެ އެންމެ މަތީ މަޖިލީހުން ދަނީ ކުރަމުންނެވެ. ޚާމަނާޢީ ޝަހީދު ކޮށްލުމާ ގުޅިގެން އީރާންގެ ސަރުކާރުން ވަނީ ހަތް ދުވަހުގެ ބަންދެއް އިޢުލާނުކޮށް، ހިތާމަ ފާޅުކުރުމުގެ 40 ދުވަސް ކަނޑައަޅާފައެވެ.
ދިގުދެމިގެންދާނެ ހަނގުރާމައެއް ކުރާނެ ވަސީލަތްތައް އެމެރިކާގައި ނެތް
މަސްރަޙް ދިރާސާ ކުރާ ފަރާތްތަކުން ބުނީ، އީރާނަށް ޙަމަލާދީ، ވެރިކަން ބަދަލުކޮށްގެން އެމެރިކާއަށް ލިބޭނެ އެއްވެސް ފައިދާއެއް، ނުވަތަ މޮޅެއް ނެތް ކަމުގައެވެ. އަދި، ޔަހޫދީންގެ އަޅުވެތިކަމުގެ ދަށުގައި ހުރި ކަމަށް މަސްރަޙް ދިރާސާ ކުރާ ގިނަ ބަޔަކު ޤަބޫލުކުރާ ޓްރަމްޕް އީރާނަށް ޙަމަލާ ދިނުމަށް ނިންމަވާފައި ވަނީ، އޭނާގެ މުޝީރުން ދެއްވަމުން ގެންދެވި ލަފަޔާއި އިރުޝާދާ ޚިލާފަށް ކަމުގައެވެ. މަސްރަޙް ދިރާސާ ކުރާ ފަރާތްތަކުން ބުނީ، މިއީ އަނިޔާވެރި ނަތަންޔާހޫ ބޭނުންވެގެން، ޔަހޫދީންނަށް ވާގިވެރިވުމުގެ ގޮތުން ޓްރަމްޕް ފަށްޓަވާފައިވާ ހަނގުރާމައެއް ކަމުގައެވެ.
އީރާނަށް ޙަމަލާދީ، ގަދަބާރުން ވެރިކަން ބަދަލު ކުރުވައިގެން އެމެރިކާއަށް ލިބޭނެ މޮޅެއް ނެތް ތަނުގައި، މި ކަމުގައި އެމެރިކާއަށް ބޮޑެތި ގެއްލުންތަކެއް ވެސް ލިބިގެންދާނެއެވެ. ދިފާޢީ ދާއިރާގެ މާހިރުން ބުނީ، އީރާނާ ދެކޮޅަށް އެމެރިކާއިން ފަށާފައިވާ ހަނގުރާމަ ދިގުލައިގެން ގޮސްފި ނަމަ، އެމެރިކާއަށް ބޮޑެތި ގޮންޖެހުންތަކެއް ކުރިމަތިވެގެންދާނެ ކަމުގައެވެ. މި ގޮތުން، ހަފުތާތަކެއް ނުވަތަ މަސްތަކަކަށް މި ހަނގުރާމަ ދެމިގެން ގޮސްފި ނަމަ، އެމެރިކާގެ ހަތިޔާރުގެ ސްޓޮކުތައް ވަރަށް ބޮޑަށް މަދުވެގެންދާނެ ކަމުގައި، ދިފާޢީ މާހިރުން އިންޒާރު ކުރެއެވެ.
އެ މަގުން ކަން ހިނގައިފި ނަމަ، ކުރިއަށް އޮތް 10 ވަރަކަށް އަހަރު އެމެރިކާއަށް އެއްވެސް ހަނގުރާމައެއްގައި ބައިވެރިނުވެވޭނެ ފަދަ މިންވަރަށް އެ ޤައުމުގެ ދިފާޢީ ކަންކަން އަދި ހަތިޔާރުގެ އަދަދުތައް ބަލިކަށިވެގެންދާނެ ކަމުގައި ވެސް އެ ފަރާތްތަކުން ބުންޏެވެ. އެމެރިކާގެ ބާރުގަދަ ހަތިޔާރުގެ ސްޓޮކުތައް މިހާރު ވެސް ހުރީ މަދުންނެވެ. ސަބަބަކީ، ފަލަސްޠީނުގެ ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީން ހިންގި ޤަތުލުޢާންމަށް އެހީވުމަށް އެމެރިކާއިން ގިނަ އަދަދެއްގެ ހަތިޔާރު ފޯރުކޮށްދިނުމެވެ. ޔޫކްރެއިންގެ ދިފާާޢުގައި ކުރަމުންދާ ހަނގުރާމައަށް ވެސް އެމެރިކާއިން ވަނީ އެތަކެއް ބިލިޔަން ޑޮލަރެއްގެ ހަތިޔާރު ފޯރުކޮށްދީފައެވެ.