މި އަހަރުގެ ޖޫން މަހު އެމެރިކާ އާއި މެކްސިކޯ އަދި ކެނެޑާގައި ކުޅޭ ވޯލްޑް ކަޕް ފުޓްބޯޅަ މުބާރާތުގައި އިރާނުން ކުޅޭނެ ކަމުގެ އެއްވެސް ޔަގީންކަމެއް މިވަގުތު ދެވެން ނެތް ކަމަށް އިރާނުން ބުނެފި އެވެ.
އެ ގައުމުގެ ފުޓްބޯޅަ ފެޑަރޭޝަނުގެ ރައީސް މެހްދީ ތާޖް މިހެން ވިދާޅުވީ އެމެރިކާ އާއި އިޒްރޭލުން އިރާނަށް ހަމަލާދީ އެ ގައުމުގެ ރޫހީ ލީޑަރު އަވަހާރަ ކޮށްލުމުން ރައްދުގައި އިރާނުން ވެސް ހަމަލާދޭން ފަށާފައި ވަނިކޮށެވެ.
ވޯލްޑް ކަޕުގައި އިރާން ހިމެނެނީ ގްރޫޕް ޖީގައި ނިއުޒީލޭންޑާއި ބެލްޖިއަމް އަދި މިސުރާއެކުގަ އެވެ. އަދި އިރާނުން ވޯލްޑް ކަޕުގެ ގްރޫޕް ސްޓޭޖުގައި ކުޅެން ޖެހޭ ތިން މެޗު ވެސް އޮތީ އެމެރިކާގަ އެވެ. މިހެންވެ އެމެރިކާ އަށް ދަތުރު ކުރުމަކީ އިރާނުން މިވަގުތު ކުރާނެ ކަމެއް ކަމަށް ނުފެންނަ ކަމަށެވެ.
"މި ހަމަލާތަކާ ގުޅިގެން އަހަރުމެންނަށް އުއްމީދީ ނަރަޒަކުން ވޯލްޑް ކަޕާމެދު ނުވިސްނޭ. އަދި މިކަމާމެދު އަހަރުމެން މި ވަގުތު ނުވިސްނަން، އެންމެ މުހިންމު ކަމަކީ އަހަރުމެންގެ ސަލާމަތާއި ރައްކާތެރިކަން،" މެހެދީ ތާޖް ވިދާޅުވި އެވެ.
އިރާނާއި އެމެރިކާގެ ހަނގުރާމައިގެ ސަބަބުން ޔަގީނުން ވެސް އިރާނުގެ ސަޕޯޓަރުން އެމެރިކާ އަށް ދަތުރު ކުރާނެ ކަމަށް ނުބެލެވެ އެވެ.
މިކަމާ ގުޅޭ ގޮތުން ދުނިޔޭގެ ފުޓްބޯޅަ ޖަމިއްޔާ ފީފާއިން އަދި ވަކި އެއްޗެއް ނުބުނެ އެވެ. ފީފާގެ ރައީސް ޖިއާނީ އިންފަންޓީނޯ ވިދާޅުވީ އޭނާ އުއްމީދު ކުރަނީ ކޮލިފައިވެފައިވާ ހުރިހާ ގައުމަކުން ވެސް ވޯލްޑް ކަޕުގައި ކުޅޭނެ ކަމަށް ކަމަށެވެ. އަދި އިރާނާއި އެމެރިކާގެ ހަނގުރާމަ ފެށިފައިވީ ނަމަވެސް ފުޓްބޯޅައިގެ ކަންކަމުގައި އެންމެ ފަހު ބަސް ބުނާނީ އިރާނުގެ ފުޓްބޯޅަ ފެޑަރޭޝަނުން ކަމަށެވެ.
އިންފަންޓީނޯ މިހެން ވިދާޅުވިއިރު އޭނާ އަކީ އެމެރިކާގައި ބޭއްވި ވޯލްޑް ކަޕް ގުރު ނެގުމުގެ ރަސްމިއްޔާތަށް ވަޑައިގަތުމަށް އިރާނުގެ ފުޓްބޯޅަ ފެޑަރޭޝަނުގެ ރައީސަށް ވިސާ ހަމަޖައްސައި ނުދެވުނު ބޭފުޅެކެވެ. އެ ކަމަށް އިރާނުން އެދުމުން ވެސް އެމެރިކާގެ ރައީސް ޑޮނަލްޑް ޓްރަމްޕާ ގާތް ގުޅުމެއް އޮންނަ އިންފަންޓީނޯ ހުންނެވީ ވަކި އެއްޗެއް ވިދާޅުނުވެ ހަނު އެވެ.