މާދަމާ ހެނދުނު ރައީސް ނޫސްވެރިންނާ ބައްދަލުކުރައްވަނީ

ރައީސުލްޖުމްހޫރިއްޔާ ޑރ މުހައްމަދު މުއިއްޒު، މާދަމާ ހެނދުނު ނޫސްވެރިންނާއި ބައްދަލުކުރެއްވުމަށް ހަމަޖައްސަވައިފިއެވެ.

ރައީސުލްޖުމްހޫރިއްޔާ އޮފީހުގެ ތަރުޖަމާނު ހީނާ ވަލީދު ވިދާޅުވީ ރައީސުލްޖުމްހޫރިއްޔާ ނޫސްވެރިންނާ ބައްދަލުކުރެއްވުން އޮންނާނީ ރައީސުލްޖުމްހޫރިއްޔާގެ އޮފީހުގައި މާދަމާ ހެނދުނު 10:00 ޖަހާއިރުކަމަށެވެ.

ރައީސް މާދަމާ ނޫސްވެރިންނާ ބައްދަލުކުރެއްވުމަށް ހަމަޖެހިފައިވާއިރު، މިމަހުން ފެށިގެން ކޮންމެ ހޯމަ ދުވަހަކު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނޫސްވެރިންނާ ބައްދަލުކުރައްވާނޭކަން މިއަހަރުގެ ރިޔާސީ ބަޔާނުގައި އެމަނިކުފާނު ވަނީ ހާމަކުރައްވާފައެވެ.

ރިޔާސީ ބަޔާނުގައި ރައީސް ވިދާޅުވީ އެމަނިކުފާނާއި މީޑިއާތަކާއި އޮންނަ ގުޅުން އިތުރަށް ވަރުގަދަ ކުރުމަށްޓަކައި މި މަހުން ފެށިގެން އާންމު އުޞޫލެއްގެ މަތިން ކޮންމެ ހަފްތާއެއްގެ ހޯމަދުވަހު ނޫސްވެރިންނާ 1 ގަޑިއިރަށް ބައްދަލުކުރައްވާނޭކަމަށެވެ.

އެގޮތުން ކޮންމެ ހޯމަ ދުވަހެއްގެ ހެނދުނު 10:00 އިން 11:00 އަށް ރައީސް ނޫސްވެރިންނާ ބައްދަލުކުރައްވާނެއެވެ. މީގެއިތުރުން މި މަހުން ފެށިގެން ހަފްތާގެ އެއްފަހަރު ކޮންމެވެސް އެއް ވަޒީރަކު ނޫސްވެރިންނާ އެއްގަޑިއިރަށް ބައްދަލުކުރައްވާނެކަމަށާއި މި ބައްދަލުވުންތަކުގެ ތާވަލު ރައީސް އޮފީހުން ހާމަކުރައްވަމުން ގެންދަވާނެކަމަށްވެސް ރައީސް ވިދާޅުވިއެވެ.

"ދަތުރެއް ކުރަން ޖެހުން ނުވަތަ ބަންދު ދުވަހަކާ ދިމާވުން ނުވަތަ އެނޫންވެސް ޝެޑިއުލަށް ބަދަލު އަންނަ ފަދަ ކަމެއް މެދުވެރި ނުވާހާ ހިނދު މިކަން މިގޮތުގައި ކުރިއަށްގެންދިޔުމުގައި ދެމިހުންނާން." ރައީސުލުޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރިޔާސީ ބަޔާނުގަައި ރައީސުލްޖުމޫރިއްޔާ ވިދާޅުވީ، ސަރުކާރުގެ ހަރަކާތްތައް ހިއްސާ ކުރައްވާ ސުވާލުތަކަށް ޖަވާބު ދިނުމުގެ ގޮތުން މިދިޔަ އަހަރު ރާއްޖެއާއި ރާއްޖެއިން ބޭރުގެ މީޑިއާތައް ހިމެނޭގޮތަށް 424 ފަހަރަކު ވަޒީރުން އެކި މީޑިއާތަކަށް މަޢޫލޫމާތާއި އިންޓަވިއު ދިފައިވާކަމަށެވެ.

ރައީސް ވިދާޅުވީ އާންމު ރައްޔިތުން ސާފުކުރަން ބޭނުންވާ މަޢުލޫމާތެއް ހުރިނަމަ އެކަމަށް އެދި ފޯމް ހުށަހެޅުމުން ޤާނޫނީ ހުދޫދުގެ ތެރެއިން އާންމު ކުރެއްވެން އޮތް އެންމެ ފުޅާމިނުގައި ސަރުކާރުގެ ހުރިހާ އިދާރާތަކުން ހާމަކުރަމުންދާކަމަށެވެ.