ހުޅުމާލެ ހޮސްޕިޓަލްގެ ވޯޑުތަކަށް ޖާގަ އިތުރުކުރަން އާރްޑީސީއަށް

ހުޅުމާލެ ހޮސްޕިޓަލުގެ މެޑިކަލް އަދި ޕީޑިއެޓްރިކް ވޯޑަށް ޖާގަ އިތުރުކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން، އާރްޑީސީއާ ހަވާލުކުރައްވައިފިއެވެ. މިކަމުގެ ޢަމަލީ މަސައްކަތް އަންނަ ހަފުތާގައި ފެށުމަށްވަނީ ހަމަޖެހިފައެވެ.

ހުޅުމާލެ ހޮސްޕިޓަލުގެ މެޑިކަލް އަދި ޕީޑިއެޓްރިކް ވޯޑަށް ޖާގަ އިތުރުކުރުމުގެ މަސައްކަތް ހަވާލުކުރުމަށް ހުޅުމާލޭ ހޮސްޕިޓަލްގައި ބޭއްވި ރަސްމިއްޔާތެއްގައި މިކަމުގެ އެއްބަސްވުމުގައި ސޮއިކުރެއްވީ މާލެ ގްރޫޕް އޮފް ހޮސްޕިޓަލްސްގެ ސީއީއޯ ޢަބްދުއްރައްޒާގު ހަލީމެވެ. އާރްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އިބްރާހީމް ނަޡީމެވެ.

Signing Ceremony of the Civil & Interior Finishing Agreement for the Medical Ward and Paediatric Ward Expansion Project between Malé City Group of Hospitals – Hulhumalé Hospital and Road Development Corporation @rdcmaldives pic.twitter.com/CFSK7tLGUq

— Hulhumalé Hospital (@HMH_mv) February 15, 2026

މިމަސައްކަތް ނިމޭއިރު ހުޅުމާލެ ހޮސްޕިޓަލަށް 28 އެނދު އިތުރުކުރެވޭނެއެވެ. މީގެތެރެއިން 4 އެނދު މެޑިކަލް ހައި ޑިޕެންޑެންސީ ޔުނިޓު، އެޗްޑީޔޫއަށް އިތުރުކުރެވޭއިރު ޖެނެރަލް ވޯޑަށް 15 އެނދު އަދި ކުޑަކުދިންގެ ވޯޑަށް 9 އެނދު އިތުރުކުރެވޭނެއެވެ.

ހުޅުމާލެ ހޮސްޕިޓަލުގެ ކުޑަކުދިންގެ ވޯޑުގައި މިހާރު ހުރީ 6 އެނދެވެ. މިމަސައްކަތް ނިމޭއިރު ކުޑަކުދިންގެ ވޯޑުގައި ޖުމްލަ 15 އެނދު އަދި ޖެނެރަލް ވޯޑުގައި 27 އެނދު ހުންނާނެ ކަމަށް ހުޅުމާލޭ ހޮސްޕިޓަލުން މަޢުލޫމާތުދެއްވައެވެ.

އާރްޑީސީގެ އަމާޒަކީ މިމަސައްކަތް 90 ދުވަހުގެ ތެރޭގައި ނިންމާލުމެވެ.

މި މަސައްކަތުގެ މައިގަނޑު މަގްސަދަކީ ހޮސްޕިޓަލަށް ކުރިމަތިވެފައިވާ އެނދުގެ ދަތިކަމަށް ލުޔެއް ހޯދައިދިނުންކަމަށް ހުޅުމާލެ ހޮސްޕިޓަލުން ވިދާޅުވެއެވެ.