ގޯލްޑަން ފުޓްސަލް ޗެލެންޖް 2026 ގެ ޒޯން 6 ގައި ލ. އިސްދޫއާއި ތ. ތިމަރަފުށި އެއްވަރުވުމުން ތ. ކިނބިދޫއަށް މުބާރާތުގެ ގަދަ 16 ގެ ފުރުސަތު ގެއްލިއްޖެއެވެ.
މި ޒޯނުގައި ހުކުރު ދުވަހުގެރޭ އިސްދޫއާއި ތިމަރަފުށީގެ ކުރިމަތިލުން އެއްވަރުވީ 2-2 ގެ ނަތީޖާއަކުންނެވެ. މި މެޗުން މިއިން އެއްވެސް ޓީމެއް ބަލިވި ނަމަވެސް ކިނބިދޫއަށް ގަދަ 16 ގެ ފުރުސަތު ބޮޑުވީހެވެ.
މެޗުގައި އިސްދޫގެ ލަނޑުތައް ޖަހައިދިނީ ލޫތު އަޙްމަދު ފަހުމީއެވެ. ތިމަރަފުށީގެ ދެ ލަނޑު ޖަހައިދިނީ އަތޮޅު ބުރުގައި، ތ. އަތޮޅުގެ އެންމެ މޮޅު ކުޅުންތެރިޔާގެ މަގާމު ހޯދި އަޙްމަދު އަފްލާޒެވެ.
މެޗުގެ މޮޅު ކުޅުންތެރިއަކަށް ހޮވުނީ އިސްދޫގެ ލޫތުއެވެ.
މި ޒޯނުގައި ކިނބިދޫއިން ވަނީ އެ ޓީމުގެ ފަހު މެޗުގައި ގަމުގެ މައްޗަށް 2-4 އިން ކުރިހޯދާފައެވެ.
މެޗުގައި ކިނބިދޫގެ ލަނޑުތައް ޖަހައިދިނީ މުޙައްމަދު ސަޚާއު (ބޭލް) އާއި އަޙްމަދު ހަމްދާން ޙުސެއިންގެ އިތުރުން ޢަބްދުﷲ ސަމީޙުއެވެ.
ގަމުގެ ލަނޑުތައް ޖަހައިދިނީ އަޙްމަދު ހަލީމެވެ.
މި މެޗުގެ މޮޅު ކުޅުންތެރިއަކަށް ހޮވުނީ ސަޚާއުއެވެ.
ފާހަގަކޮށްލަން ޖެހޭ ގޮތުގައި މި މެޗުގައި ގަމު ޓީމުން، ރާއްޖޭގެ ޤައުމީ ފުޓްސަލް ޓީމުގެ ދެ ކުޅުންތެރިއަކު ފެނިގެންދިޔައެވެ. އެއީ ޙުސެއިން ޝަރީފް (އޮންލީ) އާއި އަބްދުﷲ ޖުނައިދު (ޖެންނޭ) އެވެ.
މި ނަތީޖާތަކާއެކު ގޯލްޑަން ފުޓްސަލް ޗެލެންޖުގެ ރައުންޑް އޮފް 16 ގެ ޖާގައެއް ތިމަރަފުށިން ހޯދީ ޒޯން 6 ގެ އެއްވަނައިގެ ގޮތުގައި، ފަސް ޕޮއިންޓާއެކުއެވެ. ދެވަނައިގެ ގޮތުގައި ގަދަ 16 ގެ ޖާގައެއް ހޯދި އިސްދޫއަށް ވެސް ފަސް ޕޮއިންޓު ލިބިފައިވެއެވެ. ތިންވަނައިގައި އޮތް ކިނބިދޫއަށް ލިބުނީ ހަތަރު ޕޮއިންޓެވެ. ފުލުގައި އޮތް ގަމަށް ލިބިފައިވަނީ އެންމެ ޕޮއިންޓެކެވެ.