އޮމާނާއި ގުޅިގެން ހަކަތައިގެ މަޝްރޫއުތައް ކުރިއަށްގެންދިއުމަށް މަޝްވަރާކުރައްވައިފި

ތެލުގެ މުއްސަނދިކަން ލިބިފައިވާ މެދު އިރުމަތީގެ ޤައުމެއްކަމަށްވާ އޮމާނާއި ގުޅިގެން ހަކަތައިގެ މަޝްރޫއުތައް ރާއްޖޭގައި ކުރިއަށްގެންދިއުމާއި ގުޅޭގޮތުން މަޝްވަރާކުރައްވައިފިއެވެ.

މިކަމާއި ގުޅޭގޮތުން މަޝްވަރާކުރެއްވީ މާލީ ކަންކަމާއި ތަރައްގީގެ ރޭވުންތެރިކަމާބެހޭ ވަޒީރު މޫސާ ޒަމީރު އޮމާނަށް ކުރައްވަމުން ގެންދަވާ ދަތުރުފުޅުގެ ތެރެއިން އެ ޤައުމުގެ މާލީ ވަޒީރު ސުލްޠާން ބިން ސާލިމް ބިން ސައިދު އަލް ހަބްސީއާއެކު ބޭއްވި ބައްދަލުކުރެއްވުމުގައެވެ.

މި ބައްދަލުކުރެއްވުމުގައި ދެ ބޭފުޅުން ވަނީ ވިޔަފާރިއާއި އިގްތިސާދުގެ ދާއިރާއިން ގުޅުން ބަދަހިކުރުމާ ގުޅޭގޮތުން މަޝްވަރާ ކުރައްވާފައެވެ. އަދި މެރިޓައިމާއި މަސްވެރިކަމުގެ ދާއިރާއިން ގުޅުން ބަދަހިކުރުމާ ގުޅޭގޮތުންނާއި ދެ ޤައުމު ގުޅިގެން ހަކަތައިގެ މަޝްރޫއުތައް ރާއްޖޭގައި ހިންގުމާ ގުޅޭގޮތުންވެސް މަޝްވަރާ ކުރެއްވިއެވެ.

މީގެ އިތުރުން ދެ ޤައުމަށް ފައިދާހުރި އެހެނިހެން ދާއިރާތަކުންވެސް ގުޅުން ބަދަހިކުރުމާ ގުޅޭގޮތުން ރާއްޖެއާއި އޮމާންގެ މާލީ ވަޒީރުންގެ ބައްދަލުވުމުގައި މަޝްވަރާ ކުރެއްވިއެވެ.