މާލޭގައި 13،000 ޓަނުގެ 2، ފެން ތާނގީ ބެހެއްޓުމުގެ މަސައްކަތް ފަށައިފި

މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިޔުއެސްސީގެ ފެން ރައްކާކުރުމުގެ ގާބިލްކަން އިތުރުކުރުމަށްޓަކައި މާލޭގައި 13،000 ޓަނުގެ 2، ފެން ތާނގީ ބެހެއްޓުމުގެ މަސައްކަތް ފަށައިފިއެވެ.

އެމްޑަބްލިޔުއެސްސީން ވިދާޅުވީ މާލޭގައި ބަހައްޓާ 13،000 ޓަނުގެ 2 ތާނގީ ބެހެއްޓުމުގެ މަސައްކަތުގެ ދަށުން ގްރައުންޑް ތައްޔާރުކޮށް އެކަމަށް ބޭނުންވާ ސާމާނު ގެނެސް ތައްޔާރުވެފައިވާކަމަށެވެ. އަދި ފައުންޑޭޝަންގެ މައިގަނޑު މަސައްކަތްތަކަށް ތައްޔާރުވުމުގެ ގޮތުން ޓެސްޓް ޕައިލިންގެ މަސައްކަތްތައް މިހާރު ކުރަމުންދާކަމަށް އެމްޑަބްލިޔުއެސްސީން ވިދާޅުވިއެވެ.

13،000 ޓަނުގެ މި 2 ތާނގީއާއެކު 26،000 ޓަނުގެ ފެން ރައްކާކުރުމުގެ ގާބިލްކަން ލިބޭނެކަމަށް އެމްޑަބްލިޔުއެސްސީން ވިދާޅުވިއެވެ. މިއީ މިހާރު މާލޭގައި ފެން ރައްކާކުރުމުގެ ގާބިލްކަން ހުރި ވަރާ އެއްވަރުގެ އަދަދެއްކަން އެމްޑަބްލިއުއެސްސީގެ މެނޭޖިން ޑިރެކްޓަރ މަތީން ފާހަގަކުރެއްވިއެވެ.

Establishment of Two 13,000 CBM Water Storage Tanks in Male’

Ground preparation and piling equipment setup have been completed, and test piling is currently underway in preparation for the main foundation works.

Once completed, the two tanks will provide a combined storage… pic.twitter.com/WU3j0N5dNX

— Male' Water and Sewerage Company Pvt. Ltd. (@MWSC_Official) January 29, 2026

ފެން ރައްކާކުރެވޭނެ ގާބިލްކަން އިތުރުކުރުމަށްޓަކައި އެމްޑަބްލިއުއެސް ވަނީ މިދިޔަ އަހަރު ހުޅުމާލޭގައި 10000 ޓަނުގެ ފެން ރައްކާކުރެވޭ ނިޒާމެއް ގާއިމުކޮށްފައެވެ. މިއީ ރާއްޖޭގައި މިހާތަނަށް ބެހެއްޓި އެންމެ ބޮޑު ފެން ތާނގީއެވެ. މިއާއެކު ހުޅުމާލޭގައި ފެން ރައްކާކުރެވޭ މިންވަރު 22600 ޓަނަށް ވަނީ އިތުރުވެފައެވެ. އަދި މިދިޔަ އަހަރުގެ ޖޫން މަހުގެ ތެރޭގައި ދުވާލެއްގެ މައްޗަށް 1،000 ޓަނުގެ ފެން އުފެއްދޭވަރުގެ އާރުއޯ ޕްލާންޓެއް މާލޭގައި ބަހައްޓާ ބޭނުން ކުރަންވަނީ ފަށާފައެވެ.

މާލޭގައި ޤާއިމްކުރާ މި 2 ތާނގީގެ އިތުރުން ހުޅުމާލޭގައި ޤާއިމްކުރާ 5000 ޓަނުގެ ފެން އުފެއްދޭ ނިޒާމުގެ މަސައްކަތް ނިންމާ އަންނަ މަހު ބޭނުންކުރަން ފެށޭނެކަމަށް އެމްޑަބްލިޔުއެސްސީން ވަނީ ވިދާޅުވެފައެވެ.

އެމްޑަބްލިޔުއެސްސީން ވިދާޅުވީ މިއާރްއޯ ފެސިލިޓީއަކީ މާލެއާއި ހުޅުމާލޭގެ ފެނުގެ ޚިދުމަތުގެ ކަށަވަރުކަން އިތުރުކުރުމަށް އެޅިގެން ދިޔަ ފިޔަވަޅެއްކަމަށެވެ. އަދި އަމާޒަކީ މެދުކެނޑުމެއްނެތި، ދެމެހެއްޓެނިވި ގޮތެއްގައި ސާފު ބޯފެނާއި ރައްކާތެރި ނަރުދަމާގެ ޚިދުމަތް އެންމެހާ ރައްޔިތުންނަށް ފޯރުކޮށްދިނުން ކަމަށް އެކުންފުނިން ވިދާޅުވެއެވެ.