ޒަކާތު ފަންޑުން ނޮވެންބަރުމަހު 3 މިލިޔަން ރުފިޔާ

މިދިޔަ އަހަރުގެ ނޮވެންބަރު މަހު ޒަކާތު ހައުސްއިން އެކި ކަންކަމަށް 3 މިލިޔަނަށްވުރެ ގިނަ ރުފިޔާ ޚަރަދުކޮށްފައިވާ ކަމަށް ތަފާސްހިސާބުތަކުން ދައްކައިފިއެވެ.

މި ހިސާބުތަކުން ދައްކާގޮތުގައި ޒަކާތު ފަންޑުގެ އެކި ބައިތަކުން ބަލިމީހުންނަށާއި، ހާލުގައި ޖެހިފައިވާ ފަރާތްތަކުގެ އިތުރުން ދީނީ ކަންކަމަށް ބޮޑެތި ހޭދަތަކެއް ވަނީ ކޮށްފައެވެ.

ދިވެހިރާއްޖޭގެ ޒަކާތު ހައުސްއިން އާންމުކޮށްފައިވާ ތަފާސްހިސާބުތަކަށް ބަލާއިރު މިދިޔަ އަހަރުގެ ނޮވެންބަރު މަހުގެ ތެރޭގައި އެ އިދާރާއިން ވަނީ އެކި ކަންކަމަށް 3،698،322 ރުފިޔާ ޚަރަދުކޮށްފައެވެ. މީގެ ތެރެއިން އެންމެ ބޮޑު ޚަރަދެއް ކޮށްފައިވަނީ ފަގީރުންނާއި މިސްކީނުންގެ ބޭސްފަރުވާއަށެވެ. އެގޮތުން ނޮވެންބަރު މަހުގެ ތެރޭގައި ޖުމްލަ 165 މީހަކަށް އެހީގެ ގޮތުގައި 1,513,656 ރުފިޔާ ވަނީ ޚަރަދުކޮށްފައެވެ.

ފަޤީރުންނާއި މިސްކީނުންގެ ބޭސްފަރުވާއަށް ކުރި ޚަރަދު:

ކެންސަރު - 449،493 ރުފިޔާ
ހިތުގެ ބަލިތަކަށް - 63،607 ރުފިޔާ
ޓްރާންސްޕްލާންޓް - 50،886 ރުފިޔާ
ސިކުނޑީގެ ބަލިތަކަށް - 50،886 ރުފިޔާ
ފުއްޕާމޭގެ ބަލިތަކަށް - 25،443 ރުފިޔާ
ކިޑްނީގެ ބަލިތަކަށް - 33،924 ރުފިޔާ
އެހެނިހެން ބަލިތަަކަށް - 796،320 ރުފިޔާ

ހުސްވި ނޮވެންބަރު މަހުގެ ތެރޭގައި ފަގީރުންނާއި މިސްކީނުންގެ ބައިން ޟަރޫރީ އެހީގެ ގޮތުގައި 84,200 ރުފިޔާ ޚަރަދުކުރުމަށް ހަމަޖެހިފައިވާއިރު، 53,750 ރުފިޔާ ވަނީ މިބައިން ޚަރަދުކުރެވިފައެވެ. އަދި ބޯންމެރޯ ޓްރާންސްޕްލާންޓަށް 212,910 ރުފިޔާ ވަނީ ޚަރަދުކޮށްފައެވެ. މީގެ އިތުރުން، ރާއްޖެއާއި ރާއްޖޭން ބޭރުގައި ހާލުގައި ޖެހުނު ފަރާތްތަކަށް އެހީވުމަށް އިބްނުސަބީލް ބައިން 69,165 ރުފިޔާ ވަނީ ޚަރަދުކޮށްފައެވެ.

ފީސަބީލިﷲ ބައިން އެންމެ ބޮޑު ޚަރަދެއް ކޮށްފައިވަނީ ގުރުއާން ހިތުދަސްކުރުމާއި ގުރުއާންގެ އިލްމު ފެތުރުމަށެވެ. އެކަމަށް 1,034,671 ރުފިޔާ ހޭދަކޮށްފައިވެއެވެ. މީގެ އިތުރުން މަތީ ތައުލީމަށް 100,398 ރުފިޔާ އަދި ދީނީ އެކިއެކި ޕްރޮގްރާމްތަކަށް 353,218 ރުފިޔާ ވަނީ ޚަރަދުކޮށްފައެވެ.

ޒަކާތު ހައުސްގެ އިދާރީ ހިންގުމަށް ބަލާއިރު، އާމިލުންގެ ބައިން މުވައްޒަފުންގެ އުޖޫރައަށް 248,120 ރުފިޔާ އަދި މުވައްޒަފުން ތަމްރީނުކުރުމަށް 81,984 ރުފިޔާވެސް މިދިޔަ ނޮވެންބަރު މަހުގެ ތެރޭގައި ޚަރަދުކޮށްފައިވެއެވެ.

މޯލްޑިވްސް ޒަކާތު ހައުސްއަކީ މިއަހަރުގެ ޖަނަވަރީ މަހުގެ 1 ވަނަ ދުވަހު ޢަމަލުކުރަންފެށި ޒަކާތުގެ ޤާނޫނުގެ ދަށުން "މޯލްޑިވްސް ޒަކާތު ހައުސް" ގެ ނަމުގައި އުފައްދާފައިވާ އިދާރާއެކެވެ. އިސްލާމީކަންތައްތަކާ ބެހޭ ވުޒާރާގެ ދަށުން ހިންގާ މި އިދާރާގެ މަސްއޫލިއްޔަތަކީ ޒަކާތު ޤާނޫނުގެ މަޤްޞަދުތައް ހާސިލުކުރުމަށްޓަކައި ދިވެހިރާއްޖޭގެ ޒަކާތުގެ ނިޒާމު ހަރުދަނާކޮށް އެ ނިޒާމާ ގުޅޭ އެންމެހާ ކަންކަން ކުރުމެވެ.