ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕް މުބާރާތުގެ ޗެމްޕިއަންކަން ހޯދައި، ތައްޓާއެކު އެނބުރި އައި ރާއްޖޭގެ ޤައުމީ ފުޓްސަލް ޓީމަށް ދިވެހިން ކީ، ބަޠަލުންނަށް ކިޔާފަދަ ފުރިހަމަ މަރުޙަބާއެއް ކަމަށް ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ބުނެފިއެވެ.
ޤައުމީ ޓީމުން އެނބުރި ރާއްޖެ އައުމުން މަރުޙަބާ ކިޔުމަށް ކުރިއަށް ގެންދިޔަ ހަރަކާތްތަކުގެ މަންޒަރު ފެންނަ ފޮޓޯތައް ހިއްސާކޮށް ސާފްގެ ރަސްމީ މީސްމީޑިއާ އެކައުންޓުން ކޮށްފައިވާ ޕޯސްޓެއްގައި ބުނެފައި ވަނީ، 100 އިންސައްތަ މޮޅުވުމުގެ ރެކޯޑަކާއެކު އެނބުރި ޤައުމަށް އައުމުން، ރާއްޖޭގެ ޤައުމީ ފުޓްސަލް ޓީމަށް ދިވެހިން ކީ، "ހީރޯ" އިންނަށް ކިޔާފަދަ މަރުޙަބާއެއް ކަމަށެވެ.
އަދި މާލޭގައި ހިންގި އެކި ހަރަކާތްތަކުގެ ވާހަކައާއި، ދިވެހި ސަރުކާރުން، ކުޅުންތެރިންނަށް ދޭން ނިންމާފައިވާ ބޯނަސްގެ ވާހަކަ ވެސް އެ ޕޯސްޓުގައި ހިމަނާފައިވެއެވެ.
ފުޓްސަލްގައި ރާއްޖެއިން ހޯދި ފުރަތަމަ ކާމިޔާބީއާއެކު ރާއްޖެ އައި ޤައުމީ ޓީމަށް ބޭއްވި މަރުޙަބާ ކިޔުމުގެ ހަރަކާތްތައް ފެށުނީ ވެލާނާ އިންޓަނޭޝަނަލް އެއާޕޯޓުގެ ވީއައިޕީ އިންނެވެ. އެ ތަނުން އެ ކުޅުންތެރިންނާއި އޮފިޝަލުންނަށް މަރުޙަބާ ދެންނެވީ ރާއްޖޭގެ ކުޅިވަރާ ބެހޭ ވަޒީރު އަބްދުﷲ ރާފިއުއާއި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް އަޙްމަދު ޠާރިޤްގެ އިތުރުން ރާއްޖޭގެ ކުޅިވަރުގައި ފާހަގަކޮށްލެވޭ އިސް ފަރާތްތަކާއި މުހިންމު ޝަޙްސިއްޔަތުތަކެވެ.
ވީއައިޕީން ނުކުތުމަށްފަހު އެމްޓީސީސީގެ ބަހުގައި ޓީމު އައީ މާލޭގެ ސޯޝަލް ސެންޓަރަށެވެ. އަދި ސޯޝަލް ސެންޓަރުން އެމްއެންޑީއެފްގެ ޕިކަޕެއްގައި ކުޅުންތެރިން މަޖީދީ މަގުން އާޓިފިޝަލް ބީޗަށް ދިޔައިރު، މަރުޙަބާ ކިޔުމުގެ މައި ހަރަކާތްތައް އޮތީ އެތަނުގައެވެ. މަގުމަތީގެ އެކި ސަރަހައްދުތަކުން ވެސް ޓީމަށް މަރުޙަބާ ކިޔުމަށް ޙާއްސަ ހަރަކާތްތަކެއް ބާއްވާފައިވެއެވެ.
ޓީމުގެ ކާމިޔާބީ ފާޙަގަކުރުމަށް ހަވާ ވެސް އަރުވާފައިވެއެވެ.
ފުޓްސަލް ޓީމުން ހޯދި ކާމިޔާބީއާއި ސްރީލަންކާގައި މިދިޔައަހަރު ބޭއްވި ސުޕަ ކަޕްގެ ޗެންޕިއަންކަން ހޯދި ފުޓުބޯޅަ ޓީމަށް އެއް މިލިޔަން ރުފިޔާގެ ބޯނަހެއް ދިނުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.
ޖުމްލަ ހަތް ޓީމުން ވާދަކުރި ފުރަތަމަ ސާފް ފުޓްސަލް ޗެމްޕިއަންޝިޕްގެ ތަށި ރާއްޖެއިން ހޯދީ، މުބާރާތުގައި ކުޅުނު ހުރިހާ މެޗަކުން ވެސް މޮޅުވެގެންނެވެ.
ރާއްޖެ ފާހަގަކުރެވުނީ، ކުޅުންތެރިންގެ ހުނަރާއި، ދެއްކި މޮޅު ކުޅުމުގެ ސަބަބުން، މާ ބޮޑު ވާދަވެރިއަކު ނެތި، ވަރަށް ސާބިތުކަމާއެކު މުބާރާތުގެ ތަށި އުފުލާލި ޓީމެއްގެ ގޮތުގައެވެ.