ސްޕެއިންގެ އަޑަމޫސްގައި މިދިޔަ ހަފްތާގައި ހިނގި ރޭލު އެކްސިޑެންޓެއްގައި މަރުވި މީހުންގެ ޢާއިލާތަކަށާއި ގެއްލުން ލިބުނު މީހުންނަށް ބަދަލުގެ ގޮތުގައި ޖުމްލަ 20 މިލިޔަން ޔޫރޯ ދިނުމަށް އެ ޤައުމުގެ ސަރުކާރުން ނިންމައިފިއެވެ.
މި މަހުގެ 18ވަނަ ދުވަހު ހިނގި ރޭލު އެކްސިޑެންޓުގައި 45 މީހުން މަރުވެ 150އަށްވުރެ ގިނަ މީހުންނަށް ވަނީ ޒަހަމްވެފައެވެ. އެއީ 2013ވަނަ އަހަރުގެ ފަހުން އެ ފަދަ ހާދިޘާއެއްގައި ސްޕެއިންގައިއެހާ ގިނަ މީހުން މަރުވި ޢަދަދެވެ.
ފަހުގެ ތާރީޚެއްގައި ވިލާތުގެ ޤައުމެއްގައި ވެސް އެހާ ގިނަ ޢަދަދެއްގެ މީހުން ރޭލު އެކްސިޑެންޓެއްގައި މަރުވެފައެއް ނުވެއެވެ.
ސްޕެއިންގެ ދަތުރުފަތުރާބެހޭ ވަޒީރު، އޮސްކަރ ޕުއެންޓޭ ވިދާޅުވީ މަރުވި މީހުންގެ ޢާއިލާތަކަށް 216،000 ޔޫރޯ ކުރިއަށް އޮތް ތިން މަސް ދުވަހުގެ ތެރޭގައި ދޫކުރާނެ ކަމަށެވެ. އެ ޢަދަދު ތެރޭގައި ހިމެނެނީ ސަރުކާރުން އެހީގެ ގޮތުގައި ދޭ 72،000 ޔޫރޯއާއި، އިންޝޫރަންސް ފައިސާގެ ގޮތުގައި އެޑްވާންސްކޮށް ދޫކުރާ 72،000 ޔޫރޯއާއި ކޮންމެ ފަސިންޖަރަކު ވެސް ނެގުން މަޖުބޫރު ޓްރެވަލް އިންޝޫރަންސްގެ ދަށުން ލިބޭ 72،000 ޔޫރޯއެވެ.
ޢާންމު ގޮތެެއްގައި ޤާނޫނީ މަރުޙަލާތަކާއި އެހެނިހެން މަރުޙަލާތަކުން ޢާއިލާތަކަށް ބޭނުންޖެހިފައިވާ މިންވަރަށް ރިޢާޔަތް ނުކުރާ ކަމަށް ޕުއެންޓޭ ވިދާޅުވިއެވެ. އެތައް އަހަރަކަށް މަރުޙަލާތައް ދެމިގެންގޮސް ފައިސާ ނުލިބި ޢާއިލާތަކަށް ނުތިބެވޭނެ ކަމަށް އޭނާ ވިދާޅުވިއެވެ. ޕުުއެންޓޯ އިތުރަށް ވިދާޅުވީ ޙާދިޘާގައި ޒަހަމްވި މީހުންނަށް 2،400 ޔޫރޯއާއި 84،000 ޔޫރޯއާ ދެމެދުގެ ޢަދަދަކަށް ފައިސާ ދޫކުރާނެ ކަމަށެވެ.
އަޑަމޫސްގެ ރޭލު އެކްސިޑެންޓު ހިމެނޭހެން އިތުރު ތިން ހާދިޘާއެއް އެއް ހަފްތާގެ ތެރޭގައި ސްޕެއިންގައި ހިނގާފައިވާއިރު، ދަތުރުފަތުރާ ބެހޭ ވަޒީރަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ. ސްޕެއިންގެ މައި އިދިކޮޅު ސިޔާސީ ޕާޓީ، ޕީޕަލްސް ޕާޓީއިން ވަނީ އޭނާގެ އިސްތިޢުފާއަށް ގޮވާލައިފައެވެ.
ވަޒީރުގެ ކުރިމަގާ ގުޅޭގޮތުން ސުވާލުކުރުމުން އޭނާ ވިދާޅުވީ އޭނާއަށް ވަޒީފާ ޢަދާ ކުރެވޭނެ އެންމެ ރަނގަޅަކަށް ވަޒީފާ ޢަދާ ކުރާކަމުގެ ހިތްހަމަޖެހުން ލިބިވަޑައިގެންފައިވާ ކަމަށެވެ. އަދި ވީ އެންމެ ރަނގަޅަކަށް ރައްޔިތުންނާ މަޢުލޫމާތު ޙިއްޞާކުރައްވަމުންދާ ކަމަށް އޭނާ ވިދާޅުވިއެވެ.