ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުގެ މުޖާހިދުންގެ ތެރެއިން ހަތިޔާރު ބެހެއްޓުމަށް އެއްބަސްވާ މުޖާހިދުންނަށް މަޢާފު ދިނުމުގެ ފުރުޞަތު އޮތް ކަމުގައި އެމެރިކާ ސަރުކާރުގެ އިސް އޮފިޝަލަކު ހާމަކޮށްފިއެވެ. ނަން ހާމަކޮށްފައި ނުވާ އެމެރިކާ ސަރުކާރުގެ އޮފިޝަލަކު މި ކަން ހާމަކޮށްފައި މި ވަނީ، ޙަމާސުން ރަހީނު ކޮށްފައި ތިބި ޔަހޫދީ އަސީރުންގެ ތެރެއިން އެންމެ ފަހު މީހާގެ ހަށިގަނޑު ފެނިފައިވާ ކަން އިޢުލާނު ކޮށްފައިވާ ދަނޑިވަޅެއްގައެވެ.
ފަލަސްޠީނުގެ ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީން ހިންގަމުން ދިޔަ ޤަތުލުޢާންމު މެދުކަނޑައިލާފައި ވަނީ ހުސްވި އަހަރުގެ އޮކްޓޫބަރު މަހުގެ 10ވަނަ ދުވަހުއެވެ. އެއާ އެކު، ޙަމަލާ ބަދަލު ކުރުން މެދުކަނޑައިލައި، އަސީރުން ބަދަލު ކުރުމަށް ވެސް ޙަމާސާއި ޔަހޫދީންނާ ދެމެދު އޮތީ އެއްބަސްވެފައެވެ. އަދި، ޙަމާސުން ވަނީ، އެ ޖަމާޢަތުން ރަހީނު ކޮށްފައި ތިބި އަސީރުންގެ ތެރެއިން ދިރިތިބި މީހުން މިނިވަންކޮށް، މަރުވި އަސީރުންގެ ހަށިތައް ޙަވާލު ކުރަން ފަށާފައެވެ. އޭގެ ތެރެއިން އެންމެ ފަހު މީހާގެ ހަށިގަނޑު ފެނުމާ އެކު، ޙަމާސާއި ޔަހޫދީންނާ ދެމެދު ވެފައިވާ އެއްބަސްވުމުގެ ކުރިއަށް އޮތް މަރުހަލާގެ މަސައްކަތް ފެށުމުގެ ފުރުޞަތު ފަހިވެގެން ގޮސްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ.
"ހަތިޔާރު ބެހެއްޓުމާ ގުޅޭ ގޮތުން އެ މީހުންގެ [ޙަމާސްގެ] ގިނަ ބަޔަކު ވާހަކަ ދައްކަމުންދާ އަޑު މި ދަނީ އަހަމުން. އަޅުގަނޑުމެންނަށް ޤަބޫލު ކުރެވެނީ އެ މީހުން އެ ކަން [ހަތިޔާރު ބެހެއްޓުން] ކުރާނެ ކަމަށް،" ނޫސްވެރިންނާ ވާހަކަ ދައްކަމުން ނަން ހާމަކޮށްފައި ނުވާ އެމެރިކާގެ އޮފިޝަލު ބުންޏެވެ. "އެ މީހުން އެ ކަން ނުކުރުމަކީ އެއްބަސްވުމާ ޚިލާފުވުން. ހަތިޔާރު ބަހައްޓަން އެއްބަސްވާ މީހުންނަށް މަޢާފު ދެވޭނެ ކޮންމެ ވެސް އިންތިޒާމެއް ހަަމަޖެއްސޭނެ ކަމަށް ޤަބޫލު ކުރެވޭ."
ޙަމާސުން ހަތިޔާރު ބެހެއްޓުމަށް އެއްބަސްވެފައިވާ ކަމުގައި ވެސް އެ އޮފިޝަލު ހާމަކުރިއެވެ. ނަމަވެސް، ޙަމާސް ޖަމާޢަތުން މި ކަން ރަސްމީ ސިފައެއްގައި ކަށަވަރު ކޮށްދީފައެއް ނެތެވެ. ހަތިޔާރު ބެހެއްޓުމަށް އެއްބަސްވާ މުޖާހިދުންނަށް މަޢާފު ދެވޭނެ ގޮތްތަކެއް ދެނެގަތުމަށް މަޝްވަރާ ކުރަމުންދާ ކަން ވެސް އެމެރިކާ ސަރުކާރުގެ އޮފިޝަލު ހާމަކުރިއެވެ.
ޙަމާސްގެ ބެލުމުގެ ދަށުގައި ހުއްޓައި މަރުވި އަސީރުންގެ ތެރެއިން އެންމެ ފަހު މީހާގެ ހަށިގަނޑު ޙަވާލު ކޮށްފައިވާ ކަން ޔަހޫދީ ސަރުކާރުން ވެސް ވަނީ ކަށަވަރު ކޮށްދީފައެވެ. މިއީ، ޙަމާސުން އެއްބަސްވުމަށް އިޙުތިރާމު ކުރަމުންދާ ކަން ސާފުކޮށްދޭ ދަލީލެއް ކަމުގައި އެ ޖަމާޢަތުން ބުންޏެވެ. އަދި، އެއްބަސްވުމާ އެއްގޮތަށް ޙަމާސުން ޒިންމާދާރުކަމާ އެކު އަމަލު ކުރަމުންދާ ކަމަށާއި، ކުރިއަށް އޮތީ ޔަހޫދީން އެއްބަސްވުމަށް އިޙުތިރާމު ކުރުން ކަމުގައި ވެސް އެ ޖަމާޢަަތުން ބުންޏެވެ.