ޕާކިސްތާނުގެ ވިސްނުމަކީ އިންޑިޔާ މެޗު ބޮއިކޮޓް ކުރުން

ޓުވެންޓީ20 ކްރިކެޓް މުބާރާތުގައި އިންޑިޔާއާ ދެކޮޅަށް ކުޅެން ޖެހޭ މެޗުތައް ބޮއިކޮޓް ކުރަން ޕާކިސްތާނުން މަޝްވަރާކޮށްފި އެވެ.

މިއީ އިންޑިޔާ އާއި ލަންކާގައި ބާއްވާ މުބާރާތުގައި ޕާކިސްތާނުން ބައިވެރިނުވުމަށް ކުރި މަޝްވަރާތަކުގެ ތެރެއިން އުފަންވި ހިޔާލެއް ކަމަށް މީޑިޔާތަކުން ބުނެ އެވެ. މި މުބާރާތުގައި ބައިވެރިވުމާމެދު މަޝްވަރާ ކުރެއްވުމަށް ޕާކިސްތާނުގެ ކްރިކެޓް ބޯޑުގެ ރައީސް މޮހްސިން ނަގްވީ އިއްޔެ ވަނީ އެ ގައުމުގެ ބޮޑުވަޒީރު މުހައްމަދު ޝާހްބާޒް ޝަރީފާ ބައްދަލުކުރައްވައި މަޝްވަރާ ކުރައްވާފަ އެވެ. މިއަށްފަހު މިއަދުގެ ވަގުތެއްގައި ނަގްވީ ނޫސްވެރިންނާ ބައްދަލުކުރައްވަން ވަނީ ހަމަޖެހިފަ އެވެ. ނަމަވެސް ރަސްމީކޮށް މިކަމާމެދު ގޮތެއް ނިންމާނީ އަންނަ ހުކުރާއި ހޯމަ ދުވަހާ ދެމެދު ކަމަށްވެ އެވެ.

ޓުވެންޓީ20 ކްރިކެޓް މުބާރާތުގައި ބައިވެރި ނުވާން ޕާކިސްތާން ގަސްތުކުރަން ފެށީ ދެ ކަމަކާ ގުޅިގެންނެވެ. ފުރަތަމަ ކަމަކީ އިންޑިޔާ އަށް މާބޮޑަށް ބަރޯސާވެގެން އިންޓަނޭޝަނަލް ކްރިކެޓް ކައުންސިލް (އައިސީސީ) އިން ކަންކަން ނިންމަމުންދިއުމެވެ. މި ގޮތުން އައިސީސީން ވަނީ އިންޑިޔާގެ ބަދަލުގައި ބަނގްލަދޭޝްގެ މެޗުތައް ލަންކާ އަށް ބަދަލުކޮށްދިނުމަށް އެ ގައުމުން އެދުމުން އެކަމަށް ދެކޮޅު ހަދާފަ އެވެ. ބަނގްލަދޭޝް މިކަމަށް އެދުނީ އިންޑިޔާގައި ބަނގްލަދޭޝްގެ ކުޅުންތެރިންނާއި އޮފިޝަލުންގެ ސަލާމަތާއި ރައްކާތެރިކަން ކަށަވަރުނުވާ ކަމަށް ބުނެ އެވެ. އެ ގައުމުން މިހެން ބުނީ އިންޑިޔާގެ އައިޕީއެލްގައި ކުޅުވަން ގެންދިޔަ ބަނގްލަދޭޝްގެ ކުޅުންތެރިއަކަށް މަޖުބޫރުކޮށް އިންޑިޔާއިން ފޮނުވާލާފައިވާތީ އެވެ. މިއީ އިންޑިޔާގެ ހިންދޫގެ އަމަލެއް ކަމަށް ވެސް ބަނގްލަދޭޝް ބުނެ އެވެ.

ނަމަވެސް އައިސީސީން މެޗުތައް ލަންކާ އަށް ބަދަލުކޮށް ނުދިނުމުން ބަނގްލަދޭޝް މިހާރު ވަނީ މުބާރާތުން ވަކިވެފަ އެވެ. އެ ޖާގަ ދީފައިވަނީ ސްކޮޓްލޭންޑަށެވެ.

ބަނގްލަދޭޝްއާ މެދު އައިސީސީން އަމަލު ކުރާ މެދު ޕާކިސްތާން ނުރުހެ އެވެ. އެ ގައުމުން ބުނަނީ މިއީ އައިސީސީން އެއް ކަމެއްގައި ދެ ގައުމަކަކާމެދު ތަފާތުކޮށް އަމަލު ކުރުން ކަމަށެވެ. ޕާކިސްތާން އިޝާރާތް ކުރަނީ ހުސްވި އަހަރު އެ ގައުމުގައި ބޭއްވި އޭޝިއާ ކަޕް ކުޅެން ޕާކިސްތާނަށް އައުމަށް އިންޑިޔާ ދެކޮޅު ހެދުމުން އެ ގައުމުގެ މެޗުތައް ޑުބާއީ އަށް ބަދަލު ކުރުމާ ގުޅިގެންނެވެ. މީގެ ސަބަބުން ޕާކިސްތާނުގައި ބޭއްވި މުބާރާތުގެ ސެމީ ފައިނަލާއި ފައިނަލް މެޗު ވެސް ކުޅެން ޖެހުނީ ޑުބާއީގަ އެވެ. ހަގީގީ މުބާރާތެއް ބޭއްވި ކަމުގެ އިހުސާސް ޕާކިސްތާނަށް ނުކުރެވުނެވެ.

މިހެންވެ ޕާކިސްތާނުގެ ޓުވެންޓީ20 ބޮއިކޮޓް ކުރަން ވިސްނި ނަމަވެސް އިންޑިޔާ އަށް ޖެއްސުން ކުރެވޭނެ ގޮތަކީ އެ ގައުމާ ދެކޮޅަށް ނުކުޅުން ކަމަށް މިހާރު ވަނީ ބެލެވެން ފަށައިފަ އެވެ. މި ގޮތަށް ހަދައިފިނަމަ ޕާކިސްތާނަށް ގްރޫޕް ސްޓޭޖުގެ ދެ ޕޮއިންޓް ގެއްލޭނެ އެވެ. ގްރޫޕް އޭގައި ހިމެނެނީ އިންޑިޔާ އާއި ޕާކިސްތާނާއި ނެމީބިއާ އާއި ނެދަލޭންޑްސް އާއި އެމެރިކާ އެވެ. މި ޓީމުތަކަށް ބަލާއިރު އިންޑިޔާ މެޗު ދޫކޮށްލާފައި ވެސް ޕާކިސްތާނަށް ދެ ވަނަ ބުރަށް ދިއުމަށް ހުރަސްއެޅޭ ވަރުގެ ގަދަ ޓީމެއް ނެތެވެ.