ފުޓްސަލް ރަސްގެފާނުގެ ގޮތުގައި ރާއްޖެއިން ރަން ތަށި އުފުލާލައިފި

ދެކުނު އޭޝިއާގެ ފުޓްސަލްގެ ރަސްގެފާނުން ކަމުގައިވާ ދިވެހިރާއްޖެއިން، ސާފް ފުޓްސަލް ޗެމްޕިއަންޝިޕްގެ ޓްރޮފީ އުފުލާލައިފިއެވެ.

ރާއްޖެއިން މުބާރާތުގެ ތަށި އުފުލާލީ، މުބާރާތުގެ އެންމެ ފަހު މެޗަށްފަހު އޮތް ޙާއްސަ ރަސްމިއްޔާތުގައެވެ.

ރާއްޖެއިން ދެކުނު އޭޝިއާގެ ފުޓްސަލްގެ ރަސްކަމުގެ ތަހުތަށް އިސްވެ، ހަމަޖެހިލީ، ސާފް ފުޓްސަލް ޗެމްޕިއަންޝިޕުގައި ކުޅުނު ހުރިހާ މެޗަކުން ވެސް މޮޅުވެގެންނެވެ.
އެގޮތުން ފުރަތަމަ މެޗުގައި ޕާކިސްތާނުގެ މައްޗަށް 1-7 އިން ކުރިހޯދިއިރު ދެވަނަ މެޗުގައި ބަންގްލަދޭޝްގެ މައްޗަށް 1-6 އިން ވަނީ ކުރިހޯދާފައެވެ. އެއަށްފަހު 0-5 އިން އިންޑިއާ ބަލިކޮށް، ޖެހިގެން އައި މެޗުގައި ނޭޕާލްގެ މައްޗަށް 1-2 އިން ކުރިހޯދިއެވެ.

މުބާރާތުގެ ފަސްވަނަ މެޗުގައި ރާއްޖެއިން ކުޅުނީ ބޫޓާނާ ދެކޮޅަށެވެ. އެ މެޗުން 1-4 އިން މޮޅުވިއިރު ފަހު މެޗުގައި ސްރީލަންކާ އަތުން މޮޅުވީ 2-5 ގެ ނަތީޖާއަކުންނެވެ.

ރާއްޖެއިން މުބާރާތުގެ ޗެމްޕިއަންކަން ކަށަވަރުކުރީ ލަންކާއާ ދެކޮޅަށް ކުޅެން އޮތް މެޗު ބާކީ އޮއްވައި، ބޫޓާނުގެ މައްޗަށް ހޯދި މޮޅާއެކުއެވެ.

ތާވަލުގެ އެއްވަނައިގައި ރާއްޖެ އޮތީ 6 މެޗުން 18 ޕޮއިންޓާއެކުއެވެ.

މުބާރާތުގައި އެންމެ ގިނަ ލަނޑު ޖެހީ ވެސް ރާއްޖެއިންނެވެ. އަދި އެންމެ ގިނަ ލަނޑު ޖެހި ކުޅުންތެރިއަކީ ރާއްޖޭގެ ކެޕްޓަން މުޙައްމަދު އިމްރާނެވެ. އޭނާ ވަނީ ޖުމްލަ ނުވަ ލަނޑު ޖަހާފައެވެ.

މީގެއިތުރުން ރާއްޖެއަކީ މި މުބާރާތުގައި ބައިކޮޅަށް އެންމެ މަދުން ލަނޑު ވަން ގައުމުވެސް މެއެވެ. ރާއްޖެ ކޮޅަށް މުޅި މުބާރާތުގައި ވަދެފައި ވަނީ އެންމެ 6 ލަނޑެވެ.

މިއީ ސާފް އިން ބޭއްވި ފުރަތަމަ ފުޓްސަލް މުބާރާތް ކަމަށްވާއިރު، ފުރަތަމަ މުބާރާތުގެ ރަން ކާމިޔާބީއާއެކު ރާއްޖެއިން މިވަނީ ސަރަހައްދީ ފުޓްސަލްގެ ތާރީޚުގައި ރަން އަކުރުން ނަން ފަވާލާފައެވެ.