ގައުމީ ޓީމުތަކުން ހޯދާ ކާމިޔާބީ ދެމެހެއްޓުމުގައި ސަރުކާރުގެ ފުރިހަމަ އެއްބާރުލުން ލިބެމުންދާނެކަމަށް ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ކުޅިވަރު ވަޒީރު މިހެން ވިދާޅުވެފަވަނީ ސާފް ފުޓްސަލް ޗެމްޕިއަންޝިޕުގެ ތަށި ގައުމީ ފިރިހެން ފުޓްސަލް ޓީމުން ހޯދުމާއި ގުޅިގެން ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.
ވަޒީރު ވިދާޅުވީ ގައުމީ ޓީމުތަކުން ހޯދާ މިފަދަ ކާމިޔާބީތައް ދެމެހެއްޓުމަށް ބޭނުންވާ އެންމެހާ ވަސީލަތްތައް ފޯރުކޮށްދިނުމުގައި ސަރުކާރުގެ ފަރާތުން އެހީތެރިކަން ފޯރުކޮށްދެމުން ގެންދާނެކަމުގެ ޔަގީންކަން ދެއްވާކަމަށެވެ. މިފަދަ ކާމިޔާބީތަކަކީ ރާއްޖޭގެ ތާރީޚުގައި ރަން އަކުރުން ފަވާލެވޭނެ ފަޚުރުވެރި ކާމިޔާބީތަކަކަށްވާއިރު، މިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ބޭނުންވާ ވަސީލަތްތައް ރާއްޖެއާއި ރާއްޖެއިން ބޭރުން ފޯރުކޮށްދެއްވާނެކަމަށް ވަޒީރު ހާމަކުރެއްވިއެވެ.
އެގޮތުން ކުޅިވަރުތައް ތަރައްޤީކޮށް އިތުރު ހަރުފަތަކަށް ގެންދިއުމަށް ބޭރުގެ ތަޖުރިބާކާރު ކޯޗުންގެ އެހީތެރިކަން ރާއްޖޭގެ އެތުލީޓުންނަށް ހޯދައިދިނުމަށް ސަރުކާރުން ޚާއްސަ އިސްކަމެއްދެއްވާނެކަމަށް ވަޒީރު ވަނީ ވިދާޅުވެފައެވެ.
"މިކަން ދިފާޢުކުރުމަށްޓަކައި ޕްރެކްޓިސްކުރެވޭނެގޮތްތަކާއި، ކޯޗުންގެ އެހީ ހޯދޭނެ ގޮތްތަކާއި އިތުރު ޕްރެކްޓިސް ސެޝަންތައް ނޫނިއްޔާ މިކަންކަން ކުރެވެންދެންވެސް ޕްލޭންތަކެއް ކޮށްގެން ކުޅުންތެރިންނަށް އެވަސީލަތްތައް ލިބޭނެ ގޮތްތައް ރާއްޖެއާއި ރާއްޖެއިން ބޭރުން ހޯދައިދިނުމާއި މޮޅެތި ކޯޗުންގެ އެހީތެރިކަން ފޯރުކޮށްދޭނެ ގޮތް އަޅުގަނޑުމެން ހޯދައިދިނުން" ވަޒިރު ވިދާޅުވިއެވެ.
ވަޒީރު ވިދާޅުވީ ބައިނަލްއަގްވާމީ މައިދާނުގައި ބޮޑެތި ގައުމުތައް ފަހަތަށް ޖައްސާލުމަށްފަހު މީގެ ކުރިންވެސް ގައުމީ ޓީމުތަކުންވަނީ ގައުމަށް ރީތި ނަން ގެނެސްދީފަކަމަށެވެ. އެގޮތުން 2008 ވަނަ އަހަރު ސާފްގެ ތަށި ގައުމީ ފުޓުބޯޅަ ޓީމުން ހިއްލާލާ، ގައުމު ހެއްވާލި ނަމަވެސް އެމަގާމު ދެވަނަ ފަހަރަށް އެތަށި ދިފާޢުކުރުމަށް ހޭދަވި މުއްދަތު މާބޮޑަށް ދިގުލައިގެން ދިޔަކަން ވަޒީރު ފާހަގަކުރެއްވިއެވެ. މިފަދަ ބޮޑެތި ކާމިޔާބީތައް ދެމެހެއްޓުމަކީ ވަރަށް މުހިންމުކަމެއްކަމަށް ވިދާޅުވަމުން ވަޒީރުވަނީ ކާމިޔާބީ ދެމެހެއްޓުމަށް ކަންކަން ތަރުތީބުވެގެން ދިއުމަކީ މުހިންމުކަމެއްކަމަށް ފާހަގަކުރައްވާފައެވެ.
"އަޅުގަނޑުމެން މީގެ ކުރިންވެސް ދެކެފިން 2008 ގައި ފުޓުބޯޅައިގައި އަޅުގަނޑުމެން ސާފްގެ ޗެމްޕިއަންކަން ނެގި ތަން. އެހެންނަމަވެސް 2018 ގައި ދިހަ އަހަރުފަހުން އަޅުގަނޑުމެންނަށް އެހިސާބަށް ދެވުނީ. އެހެންވީމަ މިއީ އަޅުގަނޑުމެން ދަސްކުރަންޖެހިފަ އޮތްކަމެއް. އެފިލާވަޅުން މިހާ ދިގު ވަގުތެއް ނުނަގާ އަޅުގަނޑުމެން މިކަން ދިފާޢުކޮށް ނޫނިއްޔާ މި ލެވެލްގައި އަޅުގަނޑުމެންނަށް ހިފަހައްޓާލައިގެން ތިބެވޭނެ ގޮތަކަށް އަޅުގަނޑުމެންގެ ކަންކަން ތަރުތީބުކުރުމަކީ ވަރަށް މުހިންމުކަމެއްގެ ގޮތުގައި ދެކެން" ވަޒީރު ވިދާޅުވިއެވެ.
މުޅިން އަލަށް ބޭއްވި ސާފް ފުޓްސަލް ޗެމްޕިއަންޝިޕުގެ ތަށި ވާދަވެރި ފަސް ގައުމު ފަހަތަށް ލާ ގައުމީ ޓީމުން އުފުލާލާފައިވަނީ އައުޓްޑޯ ކޯޓެއްގައި ފަރިތަކުރުންތައް ބޭއްވުމަށްފަހުއެވެ.
މުބާރާތާއި ގާތްވުމުން އިންޑޯއަށް ފަރިތަވުމަށްޓަކައި ޗައިނާއަށް ކުރި ޓްރޭނިންގ ދަތުރު ފިޔަވާ އެހެންގޮތަކުން ގައުމީ ޓީމަށް އިންޑޯ ހޯލެއްގެ ތަޖުރިބާއެއް ރާއްޖެއިން ލިބިފައިނުވާއިރު، މިކަމަށް ހައްލެއް ހޯދައިދިނުމަށް ސަރުކާރުންދަނީ ގިނަގުނަ މަސައްކަތްކުރަމުންނެވެ. މިގޮތުން ރައީސުލްޖުމްހޫރިއްޔާ ޑރ. މުހަންމަދު މުޢިއްޒުގެ އިސްނެންގެވުމުގެ މަތިން އިންޑޯ ކޯޓެއް ގާއިމުކުރުމަށްޓަކައި އެކަމުގެ މަޝްވަރާތައް އެފްއޭއެމްއާއި އެކު މިހާރު ކުރެވިފައިވާކަމަށް ވަޒީރު ހާމަކުރައްވާފައެވެ.
ވަޒީރު ވިދާޅުވީ މިކަންކުރާނެގޮތުގެ ޕްލޭނެއް އެފްއޭއެމްއާއި ގުޅިގެން ކުރިއަށްގެންދަވާނެކަމަށާއި އުންމީދަކީ އަވަސް މުސްތަގުބަލެއްގައި މިކަން ހަގީގަތަކަށްވުންކަމަށް ވަޒީރު ވިދާޅުވެފަވެއެވެ.
ގައުމީ ޓީމުތަކުން ހޯދަމުންދާ ފަޚުރުވެރި ކާމިޔާބީތައް ފާހަގަކުރެއްވުމަށް ސަރުކާރުން ޚާއްސަ ސަމާލުކަމެއްދެއްވައެވެ. އެގޮތުން ސާފް ފުޓްސަލް ޗެމްޕިއަންޝިޕު ކާމިޔާބުކުރި ގައުމީ ފުޓްސަލް ޓީމަށާއި ސްރީލަންކާގައި މިދިޔައަހަރު ބޭއްވި ސުޕަ ކަޕްގެ ޗެންޕިއަންކަން ހޯދި ގައުމީ ފުޓުބޯޅަ ޓީމުގެ ކުޅުންތެރިންނާއި އޮފިޝަލުން ހިމެނޭ ގޮތަށް އެއް މިލިޔަން ރުފިޔާގެ ބޯނަހެއް ދިނުމަށް ރައީސުލްޖުމްހޫރިއްޔާ ނިންމެވި ނިންމެވުން ފާހަގަކޮށްލެވެއެވެ.