ޕާކިސްތާނު ބައިވެރިވުމާމެދު ގޮތް ނިންމާނީ ބޮޑުވަޒީރު: ކްރިކެޓް ބޯޑް

އަންނަ މަހު އިންޑިޔާ އާއި ސްރީލަންކާގައި ފަށާ ޓުވެންޓީ20 ކްރިކެޓް މުބާރާތުގައި ޕާކިސްތާނު ބައިވެރިވުމާމެދު ގޮތް ނިންމާލީ ޕާކިސްތާނުގެ ސަރުކާރުން ބޮޑުވަޒީރު ޝާހްބާޒް ޝަރީފް ކަމަށް އެ ގައުމުގެ ކްރިކެޓް ބޯޑުން ބުނެފި އެވެ.

އެ ބޯޑުގެ ޗެއާމަން މޮހްސިން ނަގްވީ މިހެން ވިދާޅުވީ އިންޑިޔާގެ ސަލާމަތީ ކަންކަމާމެދު ހިތްހަމަ ނުޖެހިގެން ބަނގްލަދޭޝް މުބާރާތުން ވަކިވުމާ ގުޅިގެންނެވެ. ބަނގްލަދޭޝް މުބާރާތުން ވަކިވީ މިމުބާރާތް އިންޑިޔާގައި ކުޅެން ޖެހޭތީ އެވެ. ބަނގްލަދޭޝްއިން އެދުނީ އެ ގައުމު މުބާރާތުގައި ކުޅޭނެ ހަމައެކަނި ގޮތަކީ މެޗުތައް އެހެން ގައުމަކަށް ބަދަލުކޮށްދިނުމަށެވެ. މި ގޮތުން ބަނގްލަދޭޝް އެދުނީ އެ ގައުމުގެ މެޗުތައް ސްރީލަންކާ އަށް ބަދަލު ކޮށްދިނުމަށެވެ. ނަމަވެސް އައިސީސީން ވަނީ މި ހުށަހެޅުން ގަބޫލުނުކޮށްފަ އެވެ.

އިންޑިޔާ އަށް ނުދާން ބަނގްލަދޭޝް ނިންމީ އިންޑިޔާގެ އައިޕީއެލް ކުޅެން އެ ގައުމަށް ޑިސެމްބަރު މަހު ދިޔަ ބަންގްލަދޭޝްގެ ބާރު އުކުންތެރިޔާ މުސްތަފިޒުރު ރަހުމާނަށް އިންޑިޔާގެ ހިންދޫން ބިރު ދައްކައި އޭނާ އިންޑިޔާއިން ފޮނުވާލުމުންނެވެ. މުސްތަފިޒުރަކީ 1.5 މިލިއަން އޮސްޓްރޭލިއަން ޑޮލަރަށް އައިޕީއެލް ކުޅުވަން އިންޑިޔާގެ ކުލަބަކުން ސޮއިކުރުވި ކުޅުންތެރިއެކެވެ. ނަމަވެސް ހިންދޫ މެޖޯރިޓީ އޮންނަ އިންޑިޔާއިން މުސްލިމުން ކޮންޓްރޯލް ކުރާ ބަނގްލަދޭޝްގެ ކުޅުންތެރިއަކާ ދިމާކޮށް ގައުމުން ބޭރުކޮށްލުމުން ބަންގްލަދޭޝް ސަރުކާރުން ބުނަނީ ރައްކާތެރިކަން ނެތްތަނަކަށް އެ ގައުމުގެ ކުޅުންތެރިން ނުފޮނުވާނެ ކަމަށެވެ.

މިކަމާ ގުޅިގެން ޕާކިސްތާނުން ބުނީ ވަކގައުމަކަށް ވަކި ގޮތެއް ހަދައިގެން ނުވާނެ ކަމަށެވެ. ނަމަވެސް އައިސީން ފެންނަނީ އިންޑިޔާ ބޭނުންހާ ގޮތަކަށް ކަންކަން ކުރާ ބައެއްގެ ގޮތުގައި ކަމަށެވެ.

މި މުބާރާތުގައި ޕާކިސްތާނުގެ މެޗުތައް ކުޅެން ނިންމާފައިވަނީ ސްރީލަންކާގަ އެވެ. ނަމަވެސް ޕާކިސްތާނުގެ ކްރިކެޓް ބޯޑުން ވަނީ ބަނގްލަދޭޝް އަށް ތާއީދު ކުރުމުން ގޮތުން އެ ގައުމާ ބައިވެރިވާން ގަސްތުކޮށްފަ އެވެ.

"ބޮޑުވަޒީރު މިވަގުތު ހުރީ ގައުމުން ބޭރުގައި. ބޮޑުވަޒީރު ގައުމަށް ވަޑައިގެންނެވުމާއެކު މަޝްވަރާ ކުރުމަށްފަހު އަހަރުމެންގެ ފައިނަލް ނިންމުން އިއުލާނު ކުރާނަން. ބަނގްލަދޭޝްއާ މެދު އައިސީން ކަންކަން އެ ކުރީ ވަރަށް ބޭއިންސާފުކޮށް. އައިސީސީ ވާންޖެހެނީ ކޮންމެ ގައުމަކާމެދު އެއް ހަމައަކުން ކަންކަން ކުރަންޖެހޭ ބަޔަކަށް،" ނަގްވީ ވިދާޅުވި އެވެ.

ޕާކިސްތާނު އިޝާރާތް ކުރާ މައިގަނޑު އެއް މައްސަލައަކީ ޕާކިސްތާނުގައި ބޭއްވި އޭޝިއާ ކަޕް ކުޅެން އެ ގައުމަށް ދާން އިންޑިޔާ ދެކޮޅު ހެދުމުން ޑުބާއީގައި އިންޑިޔާގެ މެޗުތައް ކުޅެން ހަމަޖެއްސާފައިވާތީ އެވެ.